Ina. A cikhati leci a nga hi laha misaveni, Jesu i tatisile a zviphrofeto zvo tala xungetano hi “Mesiya, a Murangeli”, loyi a nga wa tava “muhanyisi wa tiko.” (Dhaniyeli 9:25; 1 Johani 4:14) Hambu andzhako ka kufa kakwe, Jesu i no simama ku tatisa a zviphrofeto lezvi zvi nga wulawula hi Mesiya. — Lisimu 110:1; Mitiro 2:34-36.

•  A gezu “Mesiya” gi wula yini?

•  Xana a zviphrofeto zvi wulawulako hi Mesiya zvi nga tatiseka ka vanhu vo tala?

•  Xana ha ha rindzela ku Mesiya a humelela cikhatini ci tako?

•  Zviphrofeto zvingani zvi wulawulako hi Mesiya zvi nga lomu ka Bhibhiliya?

•  Zviphrofeto zvo kari zvi wulawulako hi Mesiya zvi tatisilweko hi Jesu

 A gezu ga ciHebheru ga ku Mashíahh (Mesiya) ni legi ga ciGreki ga ku Khristós (Kristu) hi wumbiri ga wona ma wula ku: “A Totilweko.” Hikwalaho, a ku “Jesu Kristu” zvi wula ku “Jesu loyi a Totilweko”, kutani “Jesu a Mesiya”.

 Zvikhatini zva kutsaliwa ka Bhibhiliya, loku a munhu a nyikiwa a cikhundla co hlawuleka, a kutala ka zvikhati i wa totiwa hi ku chulula mafura hlokweni yakwe. (Levhi 8:12; 1 Samuweli 16:13) Jesu i amukele cikhundla ca hombe hi ka Nungungulu, ca kuva Mesiya. (Mitiro 2:36) Kanilezvi wutshan’wini ga ku tota Jesu hi mafura, Nungungulu i no mu tota hi moya wo basa. — Matewu 3:16.

 Ahihi. A ku fana ni lezvi a ma impressão digital ma tivekisako a munhu mun’we basi, a kutatiseka ka zviphrofeto zva Bhibhiliya zvi tivekisa Mesiya mun’we basi kutani Kristu. Kanilezvi a Bhibhiliya ga hi tlharihisa giku: “Ku ta humelela vaKristu va mawunwa ni vaphrofeti va mawunwa va maha zviwoniso zva hombe ni zvihlamaliso kasi va hambukisa hambu ni vahlawulilweko, loku zvi koteka”. — Matewu 24:24.

 Ahihi. A Bhibhiliya gi phrofetile lezvaku Mesiya i wa tava pswalo wa Dhavhidha, a hosi ya Izrayeli. (Lisimu 89:3, 4) Kanilezvi a matimu ya lixaka la pswalo wa Dhavhidha ma lahlekile. Zvi wonekisa ku khwatsi ma lovisilwe a cikhati leci a vaRoma va nga hlula Jerusalema hi 70 Nguveni ya Hina. a Kusukela ka cikhati leco, a nga kona a nga kombako lezvaku wa ngango wa wuhosi wa Dhavhidha. Kanilezvi a matimu lawo ma wa hi kona cikhatini ca Jesu, niku hambu a valala vakwe a va zvi kotangi ku kaneta lezvi a nga wula zvaku i wa hi n’wana wa Dhavhidha. — Matewu 22:41-46.

 A zvi koteki a ku wula a ntsengo wo kongoma wa zviphrofeto zvi wulawulako hi Mesiya. Hi cikombiso, hambu ka matimu lawa zvi dlunyatekako lezvaku ma wulawula hi Mesiya, a mahlayela ya zviphrofeto ma nga hambana. Isaya 53:2-7 i kumbuka a zvilo zvo hambanahambana zva ciphrofeto xungetano hi Mesiya. A vanhu vo kari va nga ha wona a matimu wontlhe lawa kota ciphrofeto cin’we kuveni a van’wani va nga ha wona nchumu ni nchumu wu wuliwako ka matimu lawa kota ciphrofeto.