Hina hi landzela khwatsi a zvileletelo zva Bhibhiliya laha hi mahako a Cilalelo ca Hosi ci tiviwako kambe ku “Cilalelo co Gumesa” kutani Cialakanyiso ca kufa ka Jesu. (1 Va Le Korinte 11:20, Versão Rei Jaime) Kanilezvi, lezvi a wukhongeli go tala gi zvi kholwako ni ku zvi maha ka cimaho leci a zvi seketelwi lomu ka Bhibhiliya.

 Leci ci hi mahako hi maha a Cilalelo ca Hosi ku fela ku alakanya Jesu, hi kombisa a kubonga ka hina hi muphahlo wakwe lowu a hi maheleko. (Matewu 20:28; 1 Va Le Korinte 11:24) A cilalelo ca hosi a hi sacramento kutani mukhuwo wa wukhongeli wu mahako vanhu va ringanelwa hi ku kuma a tipswalo ta Nungungulu kutani ku tsetselelwa a zviwonho zvabye. a A Bhibhiliya gi gondzisa lezvaku a zviwonho zva hina zvi nga tsetselelwa ntsena hi ku kombisa kukholwa ka Jesu na ku nga hi hi kota ya mukhuwo wokari wa wukhongeli. — Va Le Roma 3:25; 1 Johani 2:1, 2.

 Jesu i leletele a vapizani vakwe lezvaku va maha a Cilalelo ca Hosi, kanilezvi a nga wulangi hi kukongoma ku makhati mangani. (Luka 22:19) A vokari va alakanya lezvaku ci fanele ku mahiwa hweti ni hweti, kuveni a van’wani va alakanya ku ci fanele ku mahiwa vhiki ni vhiki, siku ni siku, kutani makhati yo tala hi siku. A van’wani kambe va wula lezvaku a mun’we ni mun’we a nga boha ku makhati mangani a to maha Cilalelo ca Hosi. b Kanilezvi, ku na ni timhaka to kari hi faneleko ku chela kota hi tona.

 Jesu i yimisile a Cilalelo ca Hosi ka siku legi ku nga mahiwa a Phasika ga ciJudha niku i nofa ni gambo ga kona, ka siku galego. (Matewu 26:1, 2) A hi ku khwatsi a zvilo lezvo zvi no kotlana. A Mitsalo yi fananisa a muphahlo wa Jesu ni lowu wa yivhana ya Phasika. (1 Va Le Korinte 5:7, 8) A Phasika gi wa mahiwa khati gin’we hi lembe. (Eksodhusi 12:1-6; Levhi 23:5) Hi kufanana, a Cialakanyiso ca kufa ka Jesu ci wa mahiwa khati gin’we hi lembe hi maKristu yo sangula, c niku a Vakustumunyu va Jehovha va landzela cikombiso leco ci seketelwako ka Bhibhiliya.

 Lezvi Jesu a nga mahisa zvona a zvi hi vhuni basi a ku tiva ku a Cialakanyiso ci fanele ku mahiwa a makhati mangani, kanilezvi zva hi vhuna kambe a ku tiva a siku ni cikhati. Yena i yimisile a cialakanyiso andzhako ka kupela ka gambo, hi 14 ka Nisani, hi lembe ga 33 Nguveni ya Hina, hi kuya hi kalendariyo ga tihweti ga Bhibhiliya. (Matewu 26:18-20, 26) Hi simama ku maha Cialakanyiso hi siku galego lembe ni lembe, hi landzela a cikombiso ca maKristu yo sangula. d

 Hambu lezvi a siku ga 14 ka Nisani wa 33 Nguveni ya Hina gi nga hi Wazihlanu, a siku gi yelanako ni lego ka kalendariyo ya hina gi nga wela ka siku go hambana ga vhiki hi kuya hi lembe. Kasi hi tiva a siku gi yimelako a 14 ka Nisani lembe ni lembe hi tirisa a mahela galegi gi tirisilweko masikwini ya Jesu, na ku nga hi ku tirisa a mahela legi gi tirisiwako ka makalendariyo ya ciJudha ya masikwana lawa. e

 Ka cialakanyiso leci Jesu a nga ci yimisa, i tirisile a pawa yo kala comelo ni vhinyo yo pswhuka zvi nga sele a cikhati leci va ngaga Phasika. (Matewu 26:26-28) Na hi landza cikombiso cakwe, hi tirisa pawa yo kala comelo kutani zvin’wani zvilo ni vhinyo yo pswhuka yo kala ku engetelwa nchumu, na ku nga hi dosi ga mauvha kutani vhinyo yi chelilweko zva ku yi tsombelisa, ku yi bavisa kutani zvin’wani.

 A wukhongeli go kari gi tirisa a pawa yi chelilweko comelo, kanilezvi lomu ka Bhibhiliya, a kutala ka zvikhati a comelo gi tirisiwa kota cikombiso ca ciwonho kutani kubola. (Luka 12:1; 1 Va Le Korinte 5:6-8; Va Le Galatiya 5:7-9) Hikwalaho, ntsena a pawa yo kala comelo kutani zvilo zvin’wani hi yona yi nga yimelako khwatsi a miri wa Jesu wo kala ciwonho. (1 Pedro 2:22) A mahela gin’wani gi kalako gi nga seketelwi hi Bhibhiliya ku tirisa a dosi ga mauvha wutshan’wini ga vhinyo. A tichichi to kari ti maha lezvo hakuva ta betela a kunwa byala. Kanilezvi a cileletelo leco a ci seketelwi lomu ka Bhibhiliya. — 1 Timote 5:23.

 A pawa yo kala comelo ni vhinyo yo pswhuka lezvi zvi tirisiwako Cialakanyisweni zvikombiso ntsena zvi yimelako a miri ni nkhata wa Kristu. A zvi cici hi cihlamaliso ne a zvi patsiwi ni miri zvin’we ni nkhata wa Jesu, a ku khwatsi hi lezvi a van’wani va zvi pimisako. Wona lezvi a Bhibhiliya gi wulako hi mhaka leyo.

•   Loku Jesu i wa no laya a vapizani vakwe a kunwa a nkhata wakwe, na o va byela lezvaku va tshova a nayo wa Nungungulu lowu wu nga betela a kuga nkhata. (Genesisi 9:4; Mitiro 15:28, 29) Hambulezvo, a nga mahangi lezvo, hakuva Jesu i wa nga ta tshuka a kuca van’wani ku va tshova a nayo wa Nungungulu wu yelanako ni kubasa ka nkhata. — Johani 8:28, 29.

•   Loku a vapostoli va wa nonwa a nkhata wa Jesu hi kukongoma na a nga wulangi lezvaku a nkhata wakwe ‘wu ta halatiwa’, lezvi zvi kombako lezvaku a muphahlo wakwe wu wa ha lava ku maheka. — Matewu 26:28.

•   A muphahlo wa Jesu wu mahilwe “khati gin’we zvi enela”. (Mahebheru 9:25, 26) Kanilezvi, loku a pawa ni vhinyo zvi tirisiwako Cilalelweni ca Hosi zvi wo cica zvi maha miri ni nkhata wa Jesu, lava va gako cialakanyisweni leco va wa ta ngha na vo phinda a muphahlo wakwe.

•   Jesu i te: “Simamani ku maha lezvi kasi mu ndzi alakanya hi zvona” na ku nga hi ku: “Simamani ku maha lezvi kasi mu phinda a muphahlo wa mina”. — 1 Va Le Korinte 11:24.

 Lava va kholwako ka transubstanciação, ku nga lezvaku a pawa ni vhinyo zvi cica zvi maha miri ni nkhata wa Jesu hi kukongoma, va zvi seketela ka lezvi a mavhesi yo kari ya Bhibhiliya ma nga hundzuluseliswa zvona. Hi cikombiso, ka wuhundzuluseli go tala ga Bhibhiliya, a magezu ya Jesu xungetano hi vhinyo ma hundzuluselisilwe lezvi: “I nkhata wa mina.” (Matewu 26:28) Kanilezvi, a magezu ya Jesu ma nga hundzuluselwa kambe maku: “A vhinyo leyi yi yimela a nkhata wa mina”, kutani “A vhinyo leyi yi wula a nkhata wa mina”. f A ku khwatsi hi lezvi a nga tala ku maha, Jesu i wo gondzisa hi ku fananisa zvilo. — Matewu 26:28.

 Loku a Vakustumunyu va Jehovha va maha Cilalelo ca Hosi, vanhu va tsongwani ntsena va gako a pawa ni kunwa a vhinyo. Hikuyini?

 A nkhata wa Jesu lowu wu halatilweko wu yimisile a “civhumelwano ciswa” leci ci nga vhaleta a civhumelwano leci Jehovha Nungungulu a nga ci mahile ni Israyeli wa kale. (Mahebheru 8:10-13) Lava va patsekako ka civhumelwano ciswa vaga ni kunwa a vhinyo ya Cialakanyiso. A ntlawa lowo a wu patsi a maKristu wontlhe, kanilezvi ntsena “lava va vitanilweko” hi ndlela yo hlawuleka hi Nungungulu. (Mahebheru 9:15; Luka 22:20) A vanhu lavo va ta fuma na Kristu le tilweni niku a Bhibhiliya gi wula lezvaku i 144 000 ntsena wa vanhu va amukelako a thomo lego. — Luka 22:28-30; Kuvhululelwa 5:9, 10; 14:1, 3.

 A ku hambana ni “ntlhambi wu tsongwani” lowu wu vitanilweko a ku ya fuma na Kristu, a kutala ka hina hi na ni kutsumba ka kuva cipandze ca “citshungu ca hombe” leci ci to kuma wutomi ga pindzukelwa laha misaveni. (Luka 12:32; Kuvhululelwa 7:9, 10) Hambu lezvi hina lava hi nga ni kutsumba ka ku hanya laha misaveni hi kalako hi ngagi a pawa ni kunwa a vhinyo ya Cialakanyiso, ha ti patsa navo kasi ku kombisa kubonga hi muphahlo lowu Jesu a maheleko hontlheni. — 1 Johani 2:2.