A Vakustumunyu va Jehovha va tirisa a wuhundzuluseli go hambanahambana ga Bhibhiliya. Kanilezvi, hi tsakisiwa hi ku tirisa Wuhundzuluseli ga Misava Yiswa, legi gi nga kona hi tirimi to tala, hakuva gi tirisa vito ga Nungungulu, gi wula lisine niku a gi karati ku gi zwisisa.

•   Ku tiriswa ka vito ga Nungungulu. A vahumesi vo kari va Bhibhiliya a va mu nyiki wudzundzo a Mutumbuluxi wa gona. Hi cikombiso, a wuhundzuluseli go kari ga Bhibhiliya gi xaxameta a 70 wa mavito ya vanhu lava hi ndlela yo kari va patsekileko kuhumeseni ka Bhibhiliya lego. Hambulezvo, a Bhibhiliya galego gi susile hi kumbhelela a vito ga Mutumbuluxi wa gona, Jehovha Nungungulu!

   A kuhambana ni lezvo, a Wuhundzuluseli ga Misava Yiswa gi tlhelisela a vito ga Nungungulu ka makume ya mazana ya matshamu lawa gi nga hi kona ka mitsalo yo sangula niku a kometi leyi yi humesileko a wuhundzuluseli legi a yi ti tivekisangi.

•   Gi wula lisine. A hi wontlhe a maBhibhiliya ma hundzuluselako hi kutsumbeka a mahungu ya mitsalo yo sangula ya Bhibhiliya. Hi cikombiso, a wuhundzuluseli go kari gi hundzulusele Matewu 7:13 hi ndlela leyi: “Nghenani hi nyangwa yo hlongana, hakuva a nyangwa leyi yi yisako kusweni le tilweni yi anamile, ni ndlela yi yako kona a yi karati”. Kanilezvi ka mitsalo yo sangula ku tirisilwe a gezu “kulovisweni” na ku nga hi “kusweni le tilweni”. Kuzvilava a vahundzuluseli va chelile a gezu “kusweni le tilweni” hakuva va wa kholwa lezvaku a vanhu va kubiha va ta xanisiwa kala kupindzuka lomu ndzilweni. Kanilezvi a maalakanyo lawo a ma seketelwi hi Bhibhiliya. Hikwalaho, a Wuhundzuluseli ga Misava Yiswa gi hundzulusela a mutsalo lowu hi ndlela yo tsumbeka, giku: “Nghenani hi nyangwa yo hlongana, hakuva a nyangwa leyi yi yako kulovisweni yi anamile, ni ndlela yi yako kona ya hombe”.

•   Ku zwisiseka. A wuhundzuluseli ga ginene a gi tsumbekangi basi kanilezvi a gi karati ku gi zwisisa kambe. Wona cikombiso cin’we. Ka Matewu 5:3, Jesu i tirisile a gezu legi gi nga wulako ku “zvisiwana moyeni”. Kota lezvi a magezu lawa ma kalako ma nga zwisiseki hi ciTshwa ca nyan’waka, a Wuhundzuluseli ga Misava Yiswa gi hundzulusele a vhesi legi hi ndlela yi olovako ku gi zwisisa, giku: “Va tsaka lava va tivako ku va ni tora ga ku tiva Nungungulu”.

 Ahandle ka ku tirisa vito ga Nungungulu, ku wula lisine ni ku zwisiseka, ku na ni wun’wani nchumu wu hambanisako a Wuhundzuluseli ga Misava Yiswa ni maBhibhiliya man’wani: Gona a gi xavisiwi. Hi kota ya lezvo, a vanhu va timiliyoni lava a kale va nga vhumala mali ya ku xava Bhibhiliya, zvezvi va nga lera Bhibhiliya hi lirimi labye.