A hlengeletano ya Vakustumunyu va Jehovha ya masikwini ya hina yi sangulile kumbheleni ka sekulo 19. Ka cikhati leco, a ntlawana wutsongwani wa zvigondzani zva Bhibhiliya, zvi nga hanya kusuhani ni Pittsburgh, Pensilvânia, le Estados Unidos, zvi no sangula ku hlola a Bhibhiliya hi wukheta. Va no fananisa a tigondzo ti nga gondzisiwa hi tichichi ni lezvi hakunene a Bhibhiliya gi gondzisako. Lezvi va nga kari va zvi gondza, va no sangula ku humesa lomu ka mabhuku, majornali, ni ka revhista legi nyamutlha gi vitaniwako ku A Murindzeli — I Huwelela a Mufumo wa Jehovha.

 Cikari ka zvigondzani lezvo zva Bhibhiliya zvi nga lava ku tiva lisine, ku wa hi ni wanuna a nga vitaniwa ku hi Charles Taze Russell. Hambu lezvi Russell a nga rangela a ntiro wa ku gondzisa a Bhibhiliya cikhatini leco ni kuva yena wo sangula ku humesa a revhista A Murindzeli, a nga yimisangi wukhongeli giswa. A kungo ga Russell ni zvigondzani zvin’wani zva Bhibhiliya, kota lezvi a ntlawa lowo wu nga vitanisiwa zvona, ku wa hi ku vhuvhumisa tigondzo ta Jesu Kristu ni ku landza lezvi a bandla ga wuKristu ga zanga ga malembe go sangula gi nga tirisa zvona. Kota lezvi Jesu ku nga yena a nga yimisa a wuKristu, hi mu wona kota yena a yimisileko a hlengeletano ya hina. — Va Le Kolosi 1:18-20.