Mawunwa: A Vakustumunyu va Jehovha a va zvi lavi ku tiriwa hi vadhokodhela hakuva va kholwa lezvaku a matirela ni mimiri ya vadhokodhela a yi vuni.

Lisine: Hi lava matirela ya ma nene ya vadhokodhela kasi ku tiriwa mababyi ya hina ni ya maxaka ya hina. Loku hi babya zvi lava ku mahiwa operasawu, hi lava vadhokodhela lava va vhumelako ku hi maha operasawu na va nga hi cheli nkhata. Ha yi bonga nguvhu a mizamo yi mahilweko kasi ku chukwatisa matirela ya vadhokodhela. Hi lisine, lezvi a titlhari ta ku tira mababyi ti zvi mahileko kasi ku tira Vakustumunyu va Jehovha na ti nga tirisi nkhata, zvi vhuna vanhu vo tala nyamutlha va nga hiko Vakustumunyu. Matikweni yo tala inyamutlha, a vanhu va nga hlawula ku tiriwa na ku nga tirisiwangi nkhata kasi va potsa zvikarato zvi vangiwako hi ku cheliwa nkhata, zvo kota mababyi ya nkhata, ku tshuka a miri wu nga ha zvi koti ku ti vhikela mababyi man’wani hi kota ya nkhata lowo, kutani zvihoxo zvin’wani zvi vangiwako hi kuphazama ka vanhu.

Mawunwa: A Vakustumunyu va Jehovha va kholwa lezvaku a kukholwa ku nga hanyisa munhu loku a babya.

Lisine: A hi mahi zvihlamaliso kasi ku hanyisa vanhu hi kukholwa.

Mawunwa: A ku tiriwa na u nga cheliwangi nkhata zva dhura nguvhu.

Lisine: A ku tiriwa na u nga cheliwangi nkhata a zvi lavi mali yo tala nguvu. *

Mawunwa: Lembe ni lembe kufa Vakustumunyu vo tala hi ku ala ku cheliwa nkhata — lezvo ni vanana.

Lisine: A mhaka leyo a hi lisine niku a yi na wumboni. Zvi tolovelekile a ku a vadhokodhela va maha operasawu go karata nguvhu na va nga chelangi nkhata. Lezvo zvi patsa ku maha operasawu laha ka mbilu, ka longo ni ku teka ciro ca munhu va ci chela ka mun’wani — zvontlhe lezvo na va nga chelangi nkhata. * A kutala ka zvikhati, lava va tiriwako na va nga cheliwi nkhata — a ku patsa ni vanana — va tolovela ku hanya khwatsi a ku hundza lava va nga cheliwa nkhata. Ka zviyimo zvontlhe lezvo, a ku na munhu a nga wulako na a tiyiseka lezvaku loku munhu a ala ku cheliwa nkhata i tafa kutani ku loku a vhumela ku cheliwa nkhata i ta hanya.

A mhaka leyi yi yelana ni wukhongeli ga hina. A yi yelani ni ku tiriwa mababyi ntsena. A Testamenta ga Kale ni le’ ga Giswa ma laya zviku dlunya lezvaku hi fanele ku potsa nkhata. (Genesisi 9:4; Levhi 17:10; Dewuteronome 12:23; Mitiro 15:28, 29) Ahandle ka lezvo, Nungungulu i wona nkhata kota wutomi. (Levhi 17:14) Hikwalaho, a hi vhumeli ku cheliwa nkhata hakuva hi ingisa lezvi Nungungulu a hi layako, niku hi kombisa cichawo ka yena kambe hakuva hi yena a nga hi nyika wutomi.

Masiku ndzhako, loku a munhu a ala ku cheliwa nkhata zvonake a hlawula matirela man’wani, a titlhari ta ku tira mababyi ti wa zvi wona na zvi hi ku ti sunga, kutani ku zvi wona zvi hi ku hundzeleta. Kanilezvi ka malembana lawa, a zvilo zva cica. Hi cikombiso, hi 2004 ku humesilwe ndzima lomu ka revhista go kari gi wulawulako hi matirela ya mababyi, leyi yi nga wula lezvi: “Ka malembe ma tako, a matirela ya mababyi lawa ma nga sangulisiwa kasi ku tira a Vakustumunyu va Jehovha, ma ta gumesa hi kuva wona hi to ma tirisa ka vontlhe.” * A ndzima yin’wani yi nga humesiwa hi 2010 ka revhista Lung and Circulation, yi wulile lezvi: “A ku maha operasawu a munhu loye a nga cheliwi nkhata, a zvi faneli ku mahiwa ka Vakustumunyu va Jehovha basi. Kanilezvi, zvi fanele ku mahiwa ka vanhu vontlhe va mahiwako a operasawu.”

A vadhokodhela vo tala misaveni yontlhe va kari va maha operasawu go karata nguvhu na va nga cheli nkhata, hi ku tirisa tindlela tin’wani ta ku hlayisa nkhata. Ni ka matiko lawa ma kalako ma nga ganyangi, ka tiriwa vanhu na va nga cheliwangi nkhata niku ku na ni vanhu vo hlaya va nga hiko Vakustumunyu va Jehovha va hlawulako ku tiriswa lezvo.