A Hubye yi Fumako i ntlawa wutsongwani wa maKristu yo buvha lawa ma nyikako a wurangeli ka Vakustumunyu va Jehovha misaveni yontlhe. A ntiro wabye wu patsa zvilo zvimbiri:

•   Ku rangela a ntiro wa ku longisela gondziselelo yi seketelwako ka Bhibhiliya yi nyikiwako hi ku tirisa a mabhuku, mitlhangano ni zvikola zva Vakustumunyu va Jehovha. — Luka 12:42.

•   Ku rangela a ntiro wa Vakustumunyu va Jehovha misaveni yontlhe, lezvi zvi patsako ku rangela a ntiro wa ku chumayela ni lezvi a minyikelo yi faneleko ku tirisiwa zvona.

 A Hubye yi Fumako yi landzela cikombiso ci vekilweko hi “vapostoli ni madhota le Jerusalema” ka zana ga malembe go sangula, lava va nga kari va maha zviboho zva lisima kasi ku vhuna a mabandla wontlhe ya wuKristu. (Mitiro 15:2) A ku fana ni vavanuna lavo vo tsumbeka, a zviro zva Hubye yi Fumako a hi varangeli va hlengeletano ya hina. Vona va hlota wurangeli ga Bhibhiliya, na va tiva lezvaku Jehovha Nungungulu i yimisile Jesu Kristu kota hloko ya bandla. — 1 Va Le Korinte 11:3; Va Le Efesusi 5:23.

 A mavito ya zviro zva Hubye yi Fumako hi lawa: Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane na Jeffrey Winder. A zviro zva Hubye yi Fumako zvi tira le tsindza ga misava yontlhe, a Warwick, Nova Iorque, Estados Unidos.

 A Hubye yi Fumako yi yimisile a 6 wa tikometi kasi ku wonelela zvilo zvo hambanahambana zva ntiro wa hina, niku a ciro cin’we ci tira ka kometi yin’we kutani to hundza yin’we.

•   Kometi ya Vatlhanganyisi: Yi wonelela a timhaka ta wulamuli niku yi maha cokari loku kuva ni timhango ta ntumbuluko, kuvhukelwa ni zvilo zvin’wani zva citshuketi zvi humelelako a Vakustumunyu va Jehovha.

•   Kometi ya Vatiri: Yi wonelela zvilo zvi yelanako ni zviro zva mingango ya Bheteli.

•   Kometi ya Kuhumesa mabhuku: Yi wonelela a ntiro wa ku gandla ni ku rumela mabhuku ma seketelwako ka Bhibhiliya, ku akiwa ka matshamu ya ku khozela ka wona, tihofisa ta wuhundzuluseli ni tiyindlu ta maravi.

•   Kometi ya Ntiro: Yi wonelela a ntiro wa kuchumayela a ‘mahungu ya manene ya Mufumo’. — Matewu 24:14.

•   Kometi ya Gondziselelo: Yi wonelela a kulongiselwa ka gondziselelo ya moya hi yi kumako ka mitlhangano, ka zvikola ni ka tiaudhio ni tivhidhio.

•   Kometi ya Kutsala: Yi wonelela a kulongiselwa ka zvakuga zva moya, a zvo gandliwa ni lezvi zvi nga ka saite ya hina niku yi wonelela kambe a ntiro wa ku hundzulusela.

 Ahandle ka ntiro wu mahiwako ka tikometi leti, a Hubye yi Fumako ya tlhangana vhiki ni vhiki kasi yi khatalela a zvilaveko zva hlengeletano. Ka mitlhangano leyo, a Hubye yi Fumako yi kambisisa lezvi a Bhibhiliya gi wulako yi tlhela yi landzela a wurangeli ga moya wo basa wa Nungungulu, na yi hi ni kungo ga ku maha zviboho hi kuzwanana. — Mitiro 15:25.

 A vavhuneteli va Hubye yi Fumako maKristu yo tsumbeka ma vhunetelako a tikometi ta Hubye yi Fumako. (1 Va Le Korinte 4:2) Va na ni wutlhari ni wuzvikoti ga ku wonelela ntiro ka tikometi leti va tirako ka tona niku va tlhela va hlengela ka mitlhangano ya vhiki ni vhiki ya tikometi leto. Hambu lezvi va kalako va nga mahi zviboho, a vavhuneteli va nyika mawonela ni ku hlota mitlhamuselo yo engeteleka ya mhaka yo kari, ku ringisa lezvi a tikometi ti bohileko ni ku hlola a mihandzu ya zviboho lezvo. Va nga yimisiwa kambe hi Hubye yi Fumako lezvaku va endzela a vamakabye va hina ka matshamu yo hambanahambana ya misava ni ku veka tikanelo ka zvimaho zvo kota mitlhangano ya lembe kutani ka gradhuwasawu ya zvikola zva Gileyadhe.