Odval i hanya Mongólia. A nga zvi tivi khwatsi ku malembe mangani a nga nawo, kanilezvi i alakanya ku i pswalilwe hi 1921. Na a ha hi n’wanana i wa risa zvifuyo zva vapswali vakwe; i noya cikoleni zva lembe gin’we basi. A nga zvi tivi ku lera. Hambulezvo, zvezvanyana a broxura go kari gi nga ni mifota yo saseka gi mu vhunile ku gondza a tiva Nungungulu zvin’we ni zvilo zvo tsakisa zva ha tako zvi to kumiwa hi lava va mu ingisako. A wutivi lego gi khumbile a mbilu yakwe.

A broxura legi, gi humesilweko hi Vakustumunyu va Jehovha hi 2011, ga kumeka hi mihlowo yimbiri. Hi wumbiri ga wona ma na ni mifota yo saseka, kanilezvi ma hambana hi ku a gin’we gi na ni magezu ma tsongwani a ku hundza legi gin’wani.

Legi ga magezu yo tala, gi nga legi gaku: Ingisa Nungungulu Kasi U Hanya Kala Kupinzuka, gi ta kumeka zvezvanyana hi 583 wa tirimi; legi gin’wani gaku: Ingisa Nungungulu, gi ta kumeka hi 483 wa tirimi. Hi nga ringanisa a mitsengo leyo ni Declaração Universal dos Direitos Humanos, ga Nações Unidas, legi kala Outubro wa 2013 gi nga hundzuluselwe hi 413 wa tirimi. A ku hundza lezvo, kala ka cikhati leci, ku gandlilwe a cipimo ca 80 000 000 wa tikopiya ta mabroxura lawa hi wumbiri ga wona.

Le Brazil, a wasati wo kari a kulileko i no amukela a broxura legi ga ku Ingisa Nungungulu hi kutsaka a gumesa aku: “A zvo ku tsakisa a ku tiva lezvaku ku na ni vanhu va khatalako hi lava vo khwatsi hi mina. Ndzi wa nga vhumeli ku amukela a marevhista hakuva a ndzi zvi tivi ku lera. Kanilezvi a broxura legi ndza gi lava.”

A wasati wo kari a nga gondzangiko wa ku hi Brigitte a hanyako França i te ngalo: “Siku ni siku gi cako ndzi ti nyika cikhati ca ku wona mifota yi nga ka broxura legi.”

A kustumunyu yo kari ya le Joni yi tsalile lezvi: “A ndzi se wona a broxura ga gi nene ga ku sangula hi gona mabhulo ni vaChina xungetano hi lisine la Bhibhiliya a ku hundza legi. Ndzi bhula ni vanhu va mbhetileko a zvigondzo zva Univhersidhadhe, ni vanhu vo tlhariha nguvhu, ni lava vo kala va nga zvi tivi ku lera — ndzi nga zvi wulisa ku ndzi bhula ni vanhu va matshamela wontlhe. A broxura legi gaku: Ingisa Nungungulu Kasi U Hanya Kala Kupinzuka ga ndzi vhuna ku gondzisa a zvigondzo zvo sangula zva Bhibhiliya hi kuhatlisa. Hi 30 minuto ntsena, hi na ni mhaka yo bhula hi yona.”

A maphayona mambiri ya cisati le Alemanya ma gondza Bhibhiliya ni patswa wu gondzileko. A nuna wa kona i hlamalisilwe nguvhu hi broxura legi a tlhela aku: “Hikuyini mu nga kala ku ndzi nyika a broxura legi kusanguleni? Ga ndzi vhuna ku zwisisa a matimu ni mahungu ya lomu ka Bhibhiliya hi ndlela yo olova.”

A wasati wo kari wofa tindleve le Austrália i te: “Ndzi hanyile malembe yo tala ni vafreira mutini wabye (convento). Ndzi waga ni kunwa ni varangeli va chichi siku ni siku. Hambulezvo, a ku kala ni mun’we wa ku ndzi gondzisa ku cini a Mufumo wa Nungungulu. A mifota yi nga ka broxura legi ya ndzi vhuna a ku zwisisa lezvi Matewu 6:10 a wulako hakunene.”

A hofisa ya ravi ya Vakustumunyu va Jehovha le Canadá yi bika lawa: “Andzhako ka loku va wonile a broxura legi gaku: Ingisa Nungungulu hi ciKrio, a vanhu vo tala va comunidade ya Serra Leoa va hanyako ka tiko legi va wulile lezvaku a Vakustumunyu va Jehovha hakunene va ti karata kasi ku hangalasa a mahungu ya Bhibhiliya. A vokari va te: ‘N’wina ma khatala, kuveni a votala a va khatali.’”