A Vakustumunyu va Jehovha va nyikela a Tradução do Novo Mundo da Bíblia Sagrada ni ka wihi munhu a lavako ku gi lera.

Hambu lezvi ku gandliwako a maBhibhiliya ya tsandza-vahlayi ya mavito ni tirimi to tsalangana hi tihlengeletano to tala to humesa maBhibhiliya, a wusiwana ni livengo la wukhongeli zvi vhalela vanhu vo tala a ku kuma a Bhibhiliya hi lirimi labye la mabeleko. Hi cigelo leco, a Vakustumunyu va Jehovha va nyikela a Wuhundzuluseli ga misava yiswa hi 115 wa tirimi ni ku hundza.

Wona zvikombiso zvo kari:

• Ruanda: Silvestre na Venantie, va nga ni mune wa vana, va tlhamusela lezvi: “Hi zvisiwana zva hombe, hikwalaho hi wa nga zvi koti ku xava maBhibhiliya yo eneta zviro zvontlhe zva ngango wa hina. Kanilezvi, zvezvi a munhu ni munhu wa laha ngangweni wa hina i na ni Bhibhiliya gakwe ga Wuhundzuluseli ga misava yiswa hi ciKinyarwanda, niku hi lera zvin’we a Bhibhiliya siku ni siku.”

  A mufundisa wo kari wa chichi ya Anglikana tikweni lego, i wulile lezvi: “Legi hi gona Bhibhiliya ga ku ndzi nga gi zwisisa. Gi chukwana nguvhu ku hundza maBhibhiliya wontlhe lawa ndzi lerileko. Hakunene a Vakustumunyu va Jehovha va khatala hi vanhu!”

• República Democrática do Congo: A tichichi to kari ta ala a ku xavisela a Vakustumunyu va Jehovha a maBhibhiliya ya ciLingala, li nga lin’we la tirimi ta hombe tikweni legiyani.

  Hikwalaho, a zvi hlamalisi lezvi a kusukela loku ku humisilwe a Wuhundzuluseli ga misava yiswa hi ciLingala a Vakustumunyu va Jehovha va le tikweni ga Congo va gi tirisako nguvhu a Bhibhiliya legi ni ku gi nyikela. Phela a Wuhundzuluseli ga misava yiswa gi tsakisile vanhu a cikhati leci gi nga humesiwa hi cona ka gotsovanyano wa Vakustumunyu va Jehovha laha ka kuza a maphoyisa lawa ma nga hi laha estádio ma tsika ku phoyisela ma ya folela a Bhibhiliya.

• Fiji: A maBhibhiliya hi ciFiji ma dhura nguvhu laha ka ku cikhatini ci hundzileko, a kutala ka Vakustumunyu va Jehovha va wa tirisa a Wuhundzuluseli ga misava yiswa hi ciNgiza. Kanilezvi hi 2009, a vaFiji va amukele a Wuhundzuluseli ga misava yiswa ga Mitsalo ya ciGreki ya wuKristu (Testamenta ga Giswa) hi lirimi labye la mabeleko.

  A wanuna wo kari i hlamalisilwe nguvhu hi kudlunyateka ka Bhibhiliya legi ga Wuhundzuluseli ga misava yiswa hi ciFiji laha ka kuza a kombela gin’we. Kanilezvi a Vakustumunyu va Jehovha va wutshamu lego va mu tlhamusele lezvaku i wa fanele ku rindzela hweti hi wutsongwani ga kona kala a maBHibhiliya lawa ma nga ta rumelwa ma chikela ka cidhoropana leci a nga hanya ka cona. A mhaka ya ku rindzela a Bhibhiliya gakwe yi no mu tsona wurongo, hikwalaho i no famba 35 kilometro a lavetela a yin’wani Kustumunyu ya Jehovha yi nga hi ni Wuhundzuluseli ga misava yiswa kasi yi mu nyika. A wanuna loye i te ngalo: “A wuhundzuluseli legi gi nene nguvhu a ku hundza legi hi tolovelako ku gi tirisa. Ga dlunyateka niku ga olova ku gi zwisisa.”

• Malawi: Andzhako ka loku Davide a sangulile ku gondza ni Vakustumunyu va Jehovha, a zviro zva chichi ya Bhatista zvi noya kaya kakwe zvi ya mu wutlela a Bhibhiliya legi zvi nga mu nyikile. Kota lezvi a maBhibhiliya ma dhurako nguvhu le Malawi, Davide i wa tshamela ku ti wutisa ku wa ha ta tshuka a kuma a Bhibhiliya gin’wani ke.

  Hikwalaho, a cikhati leci ku nga humesiwa a Wuhundzuluseli ga misava yiswa hi ciCewa a noro wa Davide wa ku kuma Bhibhiliya wu no tatiseka. Laha a nga amukela a Bhibhiliya ga Wuhundzuluseli ga misava yiswa i te: “Makunu ndzi na ni Bhibhiliya ga gi nene nguvhu a ku hundza legi ndzi nga hi nago!”

A cikhati leci ku nga humesiwa a cipandze co sangula ca Wuhundzuluseli ga misava yiswa hi ciNgiza ka 60 wa malembe ni ku hundza ndzhako, ka gotsovanyano wu mahilweko dhoropeni ga Nova York, a mukaneli i no kuca lava va nga hi kona aku: “Lerane gontlhe kala mu mbheta. Gi gondzeni . . . Mu tlhela mu gi nyikela ka lava va gi lavako.” Kasi ku tatisa a kungo lego, a Vakustumunyu va Jehovha va humesile a 175 000 000 ni ku hundza wa maBhibhiliya ya Wuhundzuluseli ga misava yiswa. A ku hundza lezvo, zvezvi u nga lera Bhibhiliya ka internet hi cipimo ca 50 wa tirimi.