Pedru Wa Ku Sungula 4:1-19
4 Leswi Kreste a nga xaniseka nkama a a li munhu wa nyama,+ na n’wina tilunghiseleleni leswaku mi pimisa ku fana na yena; hikusa lweyi a xanisekaka na a li wa nyama a swi tshikile swidjoho,+
2 leswaku a nga ha hanyeli ku yendla leswi rhandziwaka hi vanhu,+ kambe a hanyela ku yendla ku rhandza ka Xikwembu.+
3 Hikusa wa xega nkama lowu a mi hanyela ku yendla ku rhandza ka matiko,+ ku nga mahanyelo ya tingana,* ku navela ku yendla swa ku biha, ku dakwa, mafexta ya mpfilumpfilu,* ku phikizana hi ku phuza byala ni ku gandzela swifaniso.+
4 Swa va hlamalisa leswi mi kalaka mi nga ha yendli swilo swa manyala ku fana na vona, se va vulavula swa ku biha hi n’wina.+
5 Kambe vanhu lava va ta tihlamulela ka lweyi a nga lunghekela ku yavanyisa lava hanyaka ni lava nga fa.+
6 Phela leswi hi swona swi nga yendla swaku mahungu ya ku tsakisa ma chumayeliwa ni le ka lava nga fa,+ leswaku hambiloko vanhu va va yavanyisa hi ku ya hi mavonelo ya vanhu, va kota ku hanya hi ku pfumelelana ni moya wa ku kwetsima hi ku ya hi vonelo la Xikwembu.
7 Kambe magamu ya swilo hinkwaswu ma kusuhi. Se vanani ni mimpimiso yayinene,+ tshamani mi lunghekele ku khongela.+
8 Kambe ka hinkwaswu, rhandzanani swinene+ hikusa lirhandzu li mbhonya swidjoho swa swinyingi.+
9 Yamukelanani hi mbilu hinkwayu na mi nga nguranguri.+
10 Leswi mun’wani ni mun’wani a nga yamukela nyiko, a a yi tirhisi swaku a pfuna van’wani, hileswi mi nga vatirheli va Xikwembu lava xi nga va komba timpsalu tatikulu hi tindlela ta tinyingi.+
11 Loko munhu a lava ku vula nchumu, a a vulavuli marito lawa ma taka hi ka Xikwembu; lweyi a tirhelaka van’wani, a a tirhi na a tshemba matimba lama taka hi ka Xikwembu+ leswaku Xikwembu xi ta dzunisiwa ka swilo hinkwaswu+ hi ku tirhisa Yesu Kreste. Ku dzuneka ni matimba i swa xona hi masiku ni masiku. Amen.
12 Varhandziwa, mi nga hlamalisiweni hi mindzingo ya ku tika* leyi mi kumanaka na yona,+ ingaku hiloko mo humeleliwa hi nchumu xa ku kala xi nga tolovelekanga.
13 Kambe tamani mi tsaka+ hileswi mi xanisiwaka ku fana na Kreste,+ leswaku mi ta tsaka mi tlhela mi tsaka hintamu ka nkama lowu ku nga ta kombisiwa ku phatima ka yena.+
14 Tsakani+ loko mi rhuketeliwa hi mhaka ya vito la Kreste, hikusa leswo swi komba swaku mi ni moya wa ku kwetsima wa Xikwembu ni ku phatima ka xona.
15 Ku nga vi ni munhu lweyi a xanisiwaka hi mhaka ya ku va mudlayi, muyivi, muyendli wa swa ku biha, kumbe hi mhaka ya ku tipeta ka timhaka ta van’wani.+
16 Kambe lweyi a xanisiwaka hileswi a nga Mukreste a nga fanelanga a dana;+ a a tami a dzunisa Xikwembu hi ku va Mukreste.
17 Hikusa se i nkama wa leswaku ku rhanga ku yavanyisiwa yindlo ya Xikwembu.+ Loko hi va va ku sungula ku yavanyisiwa,+ se ku ta yendleka yini ka lava kalaka va nga yingisi mahungu ya ku tsakisa ya Xikwembu ke?+
18 “Naswona loko swi tika kuva munhu wa ku lulama a ponisiwa, swi ta ku yini hi lweyi a kalaka a nga xi hloniphi Xikwembu ni lweyi a nga mudjohi?”+
19 Hi mhaka leyo, lava xanisekaka hi mhaka ya leswi va yendlaka ku rhandza ka Xikwembu, a va tame va hanyela Mutumbuluxi wa ku tshembeka na va yendla swaswinene.+
Tinhlamunselu ta le hansi
^ Hi Xigriki: “asélgeia”. Vona Ntlhamuselo.
^ Kumbe: “ya ku kala ma nga lawuleki”.
^ Kumbe: “leyi pfurhaka ku fana ni ndzilu”.
