Samuwele Wa Ku Sungula 10:1-27
10 Se Samuwele a teka bolhela la mafurha a ma chela ka nhloko ya Sawulo.+ A mu bejara,* a gama a ku: “Yehovha wa ku langa swaku u ta va murhangeli+ wa vanhu va yena.+
2 Nkama u nga ta suka lani namuntlha u ta kumana ni vavanuna vambirhi kusuhi ni sirha la Rakel,+ ka tiko la Benjamini aZeliza. Va ta ku byela leswi: ‘Timbongolo leti a wu famba u ti lava ti kumekile, kambe swoswi papayi wa wena a nga ha karhateki hi tona+ se a karhateka hi wena. A li: “N’wana wa mina a nga se vuya, se ni ta ku yini?”’
3 Loko u suka lanu famba anze u ya fika ka nsinya wawukulu aTabori, lani u nga ta kumana ni vavanuna vanharhu na va ya Betele+ swaku va ya gandzela Xikwembu xa ntiyiso; mun’we a ta va na a li ni swimbutani swinharhu, mun’wanyani a ta va na a li ni mapawu manharhu kasi mun’wani a ta va na a li ni khuwani lalikulu la vhinyu.
4 Va ta ku xoweta va gama va ku nyika mapawu mambirhi, se u fanele u ma teka.
5 U ta gama u fika ka ntshava ya Xikwembu xa ntiyiso, lani ku nga ni masonchwa ya Vafilista. A nkama u nga ta fika ka doropa, u ta tlhangana ni ntlawa wa vaprofeta na va ngirimela va suka ka ndhawu ya ku tlakuka na va profeta, phambheni ka vona ku ta va na ku ni vanhu lava chayaka xitende,* xingomana, flawuta* ni haripa.
6 Moya wa ku kwetsima wa Yehovha wu ta ku nyika matimba.+ U ta profeta na vona naswona swi ta yendla ingaku se wo va munhu mun’wani.+
7 Nkama ku nga ta yendleka minchumu leyi, yendla leswi u nga ta swi kota swaku u yendla ntirho wa wena, hikusa Xikwembu xa ntiyiso xi na wena.
8 Se rhanga u ya Jiligali,+ hi ta tlhangana kohala swaku ni ta yendla magandzelo ya ku hisiwa ni magandzelo ya ku kombela ku rhula. U fanele u ni nyimela 7 wa masiku anze ni ku tela. Ni ta gama ni ku byela swaku u ta yendla yini.”
9 Nkama Sawulo a nga suka ka Samuwele, Xikwembu xi sungula ku txintxa mbilu ya yena, se hinkwaswu leswi Samuwele a nga swi hlaya swi gama swi yendleka hi siku lolelo.
10 Se va suka lanu va ya ka ganga la Xikwembu xa ntiyiso, Sawulo a gama a tlhangana ni ntlawa wa vaprofeta. Moya wa ku kwetsima wa Xikwembu wu sungula ku tirha ka yena,+ a sungula ku profeta+ na vona.
11 Kutani hinkwavu lava a va mu tiva, nkama va nga mu vona na a profeta ni vaprofeta van’wani, va vutisana va ku: “Ku yendleke yini hi n’wana wa Kixi? Eeh swi li na yena Sawulo se i muprofeta?”
12 Se wanuna mun’wani lweyi a a li kolanu a vutisa a ku: “Kasi i mani papayi wa vona?” Hi leswi swi nga yendla vanhu va tolovela ku hlaya leswi: “Swi li Sawulo na yena i muprofeta?”+
13 Nkama a nga gama ku profeta a ye ka ndhawu ya ku tlakuka.
14 Hi ku famba ka nkama, tiyu* wa Sawulo a vutisa Sawulo ni mutirhi wa yena a ku: “A mi ye kwini?” Sawulo a hlamula a ku: “A hi fambe hi lava timbongolo+ kambe a hi ti kumanga, se hi gama hi ya ka Samuwele.”
15 Se tiyu wa Sawulo a ku: “Ni kombela u ni byela swaku Samuwele a mi byele yini.”
16 Sawulo a gama a mu hlamula a ku: “A hi byele swaku timbongolo ti kumekile.” Kambe Sawulo a nga mu byelanga hi mhaka ya ku va hosi leyi Samuwele a nga vulavula hi yona.
17 Se Samuwele a gama a hlengeleta vanhu phambheni ka Yehovha aMizpa,+
18 a byela Vayisrayele a ku: “Yehovha Xikwembu xa Israyele a li: ‘Hi mina ni nga mi humesa ka tiko la Gibita ni ku mi ponisa ka mavoko ya Vagibita+ ni ka mavoko ya mimfumu hinkwayu leyi a yi mi xanisa.
19 Kambe namuntlha mi tshike Xikwembu+ xa n’wina lexi a xi mi ponisa ka mahlomulu ni ka swikarhatu swa n’wina hinkwaswu, se mi te: “Ihim, hi vekeli hosi.” Swoswi, nyimani phambheni ka Yehovha hi ku ya hi tinxaka ta n’wina ni mindjangu ya n’wina.’”
20 Kutani Samuwele a byela tinxaka hinkwatu ta Israyele swaku ti ta kusuhi na yena,+ se ku gama ku langiwa lixaka la Benjamini.+
21 Se a byela lixaka la ka Benjamini swaku li ta kusuhi na yena hi ku ya hi mindjangu ya lona, ku gama ku langiwa ndjangu wa Matriti. Kutani hi wugamu ku langiwa Sawulo n’wana wa Kixi.+ Kambe nkama va nga mu lavetela a va mu kumanga.
22 Va gama va vutisa Yehovha va ku:+ “Indjhe munhu wa kona a kona lani ke?” Yehovha a va hlamula a ku: “Hi lwiya, a tumbele ka swidjumba.”
23 Kutani va tsutsuma va ya mu teka. Loko a nyima xikarhi ka vanhu, a a lehe ku tlula vanhu hinkwavu.+
24 Samuwele a byela vanhu hinkwavu a ku: “Ma mu vona lweyi Yehovha a nga mu langa?+ Phela a nga kona wa ku fana na yena xikarhi ka vanhu hinkwavu.” Se vanhu hinkwavu va sungula ku huwelela va ku: “Hanya hi masiku hosi!”
25 Samuwele a byela vanhu leswi tihosi ti nga ta va ni mfanelo ya ku swi lava ka vona,+ a tlhela a swi tsala ka buku a gama a li veka ka tabernakela ya Yehovha. Kutani Samuwele a tshika vanhu hinkwavu va muka, va ya makaya ka vona.
26 Na yena Sawulo a gama a muka kaya ka yena Jibiya na a heleketiwa hi tinhenha leti Yehovha a nga khumba timbilu ta tona.
27 Kambe vavanuna van’wani va swiphunta, va ku: “A ta hi ponisisa ku yini yelweyi?”+ A va mu vonela hansi naswona a va mu nyikanga nchumu.+ Kambe yena a yo zwee a nga hlayanga nchumu hi mhaka leyi.
Tinhlamunselu ta le hansi
^ Kumbe: “nq’uta; nyunta”.
^ I nchumu xa ku chaya.
^ Kumbe: “xitiringo”.
^ Ku nga makwavu wa papayi wa yena.
