Samuwele Wa Ku Sungula 13:1-23
13 Sawulo a a li ni . . .* wa malembe nkama a nga sungula ku fuma.+ A fume malembe mambirhi aIsrayele.
2 Sawulo a lange 3.000 wa vavanuna aIsrayele; 2.000 wa vona a va li na yena aMikimaxi ni ka ndhawu ya tintshava aBetele, kasi 1.000 wa vona a va li na Yonatani+ aJibiya,+ ku nga doropa leli nga ka ndhawu ya lixaka la Benjamini, kasi vanhu lavan’wani hinkwavu a va tshika va famba, mun’wani ni mun’wani a ya ka tende la yena.
3 Kutani Yonatani a dlaya masonchwa ya Vafilista+ lawa a ma li Jeba,+ se Vafilista va swi twa. Sawulo a gama a rhuma vanhu swaku va chaya limhondzo+ ka tiko hinkwalu, va ku: “Vaheberu a va swi twe!”
4 Tiko hinkwalu la Israyele li twa swaku: “Sawulo a dlaye masonchwa ya Vafilista, swoswi se ha nyenyiwa hi Vafilista.” Se vanhu va vitaniwa swaku va landzela Sawulo aJiligali.+
5 Vafilista na vona va tlhangana swaku va ya lwa ni Vayisrayele, a va li ni 30.000 wa tinyolo* ta nyimpi ni 6.000 wa vanhu lava fambisaka makavhalu. A va ni masonchwa ya manyingi ku fana ni misava ya lwandle;+ se va khupuka va ya gwimba matende aMikimaxi ka tlhelo la le wuxeni la Beti-Avheni.+
6 Kutani vavanuna va Israyele va vona swaku minchumu yi va bihelile, hikusa se a va lava ku hlaseliwa; vanhu va tsutsuma va ya tumbela ka mimhakwa,*+ ka swikhele, ka maribye ni ka swihlovo.
7 Vaheberu van’wani va ze va tsemakanya ni Nambu wa Yordani va ya fika ka tiko la Gadi ni la Jiliyadi.+ Kambe Sawulo a nga zanga a suka Jiligali naswona lava a va li na yena a vo rhurhumela hi ku chava.
8 Sawulo a tame a nyimela Samuwele 7 wa masiku anze nkama lowu Samuwele a a wu vekile wu hela, kambe Samuwele a nga tanga Jiligali naswona vanhu se a va sungula ku hangalaka va siya Sawulo.
9 Hi wugamu Sawulo a ku: “Ni tiseleni gandzelo la ku hisiwa ni magandzelo ya ku kombela ku rhula.” Kutani va mu tisela wona a gama a yendla gandzelo la ku hisiwa.+
10 Kambe a nkama a nga gama ku yendla gandzelo la ku hisiwa, Samuwele a fika. Se a huma a ya mu tlhangaveta a tlhela a mu hoyozela.
11 Samuwele a mu vutisa a ku: “Hi mhaka muni u yendle leswi?” Sawulo a ku: “Ni vone swaku vanhu vo hangalaka va ni siya,+ naswona wena a wu tanga hi nkama lowu nga vekiwa naswona Vafilista se a vo tlhangana aMikimaxi.+
12 Ni pimise leswi: ‘Phela Vafilista va le ku teni swaku va ta lwa na mina aJiligali, kuve mina a ni se mu kombela Yehovha swaku a ni pfuna.’ Se ni vone swaku a swo boha ni nyikela gandzelo la ku hisiwa.”
13 Kutani Samuwele a byela Sawulo a ku: “Leswi u nga swi yendla i wuphunta. A wu swi yingisanga leswi Yehovha Xikwembu xa wena a nga ku byela swona.+ Loko a wu swi yingisile, Yehovha a a ta yendla swaku wuhosi la wena li tiya aIsrayele li tlhela li tshama li li kona minkama hinkwayu.
14 Kambe swoswi wuhosi la wena li ta tekiwa.+ Yehovha a ta langa munhu mun’wani lweyi a tsakisaka mbilu ya yena.+ Se Yehovha a ta mu veka swaku a fuma vanhu va yena,+ hikusa wena a wu swi yingisanga leswi Yehovha a nga ku byela swona.”+
15 Samuwele a gama a suka Jiligali a ya Jibiya, ku nga doropa leli nga ka ndhawu ya lixaka la Benjamini, kasi Sawulo yena a sale a konta vanhu lava a nga sala na vona; kutani a kuma swaku a sale ni kolomuyani ka 600 wa vavanuna.+
16 Sawulo na Yonatani n’wana wa yena ni vanhu lava a nga sala na vona a va tshame Jeba,+ ku nga doropa li nga ka ndhawu ya lixaka la Benjamini, kasi Vafilista vona a va gwimbe matende ya vona aMikimaxi.+
17 Se mintlawa hinkwayu ya yinharhu ya masonchwa yi huma hi ka matende ya Vafilista. Ntlawa wun’we a wu famba hi ka ndlela leyi yaka aOfira, ka tiko la Xuwali;
18 ntlawa wun’wani a wu famba hi ka ndlela leyi yaka Beti-Horoni;+ kasi ntlawa wa wunharhu a wu famba hi ndlela leyi yaka lani ndhawu leyi a yi txuvukane ni nkova wa Zeboyimi a yi sungulela kona, hi ka tlhelo leli yaka amananga.
19 Hi nkama wolowo a ku nga na munhu ka tiko hinkwalu la Israyele lweyi a a kota ku yendla minchumu hi nsimbi, hikusa Vafilista a va ku: “A hi swi lavi swaku Vaheberu va yendla swipada kumbe matlharhi.”
20 Vayisrayele hinkwavu a va ya ka Vafilista loko va lava ku loteliwa swikomu, mapiki, mabewula kumbe masikelo.*
21 A va hakela 8 wa magrama ya prata* loko va ya lota swikomu, mapiki, mafoxolo ya matinyu manharhu kumbe mabewula ni loko va ya lunghiseliwa tinhonga* leti a va khayima swifuyu hi tona.
22 Se hi siku la nyimpi, hinkwavu lava a va li na Sawulo na Yonatani+ a va nga na swipada kumbe matlharhi; a ko va Sawulo ni n’wana wa yena Yonatani lava a va ni matlharhi.
23 Hi nkama wolowo masonchwa ya Vafilista a ma sukile ma ya ka nkova wa Mikimaxi.+
Tinhlamunselu ta le hansi
^ Ka matsalwa ya Xiheberu a ku tsaliwanga swaku a a ni malembe mangani.
^ Kumbe: “tin’qolo; makalichi”.
^ Ku nga mbhovo lowu kumekaka ka ntshava kumbe ka ribye.
^ Ku nga minchumu leyi tirhisiwaka ka ku tsema byanyi kumbe ku tshovela hi yona.
^ Hi Xiheberu: “pimi”. Vona Xiyengetelo B14.
^ Kumbe: “tinsimbi leti tshamaka ka ponta ya tinhonga”.
