Samuwele Wa Ku Sungula 15:1-35
15 Se Samuwele a byela Sawulo a ku: “Yehovha a ni rhume swaku ni ta ku langa u va hosi ya vanhu va yena, ku nga Vayisrayele;+ swoswi yingisa leswi Yehovha a ku byelaka swona.+
2 Yehovha murhangeli wa tintsumi a li: ‘Ni ta hakelisa ka Vaamaleki hi mhaka ya leswi va nga swi yendlela Vayisrayele nkama a va li ndleleni na va suka Gibita.+
3 Famba u ya dlaya Vaamaleki,+ u va helisa+ ni hinkwaswu leswi va nga na swona. U nga tshuki u va twela wusiwana; u fanele u va dlaya,+ vavanuna ni vavasati, vana ni swibebetani, tihomu ni tinyempfu, makamela ni timbongolo.’”+
4 Sawulo a vitana vanhu va ya Telayimi a gama a va konta. A ku li ni 200.000 wa masonchwa lawa ma fambaka hi minenge ni 10.000 wa masonchwa ya lixaka la ka Yuda.+
5 Sawulo a famba anze a ya fika ka doropa la Amaleki, a gama a veka masonchwa swaku ma tumbela ka nkova.
6 Sawulo a byela Vakena a ku:+ “Sukani ka Vaamaleki swaku ni nga mi helisi na vona.+ Hikusa mi ve ni timpsalu ka Vayisrayele hinkwavu+ nkama va nga huma Gibita.” Se Vakena va suka ka Vaamaleki.
7 Kutani Sawulo a dlaya Vaamaleki+ ku sukela aAvhila+ anze aXuri+ akusuhi ni Gibita.
8 A khoma Agagi+ hosi ya Vaamaleki a nga mu dlayi kambe vanhu lavan’wani hinkwavu a va helisa hi xipada.+
9 Sawulo a mu twela wusiwana Agagi ni swifuyu hinkwaswu swaswinene, ku nga tinyempfu, tihomu, swifuyu swin’wani ni minchumu hinkwayu yayinene leyi a yi li kona.+ A va nga lavi ku swi helisa, kambe minchumu hinkwayu leyi a yi nga li ya nchumu leyi a va nga yi lavi, va yi helisile.
10 Se Yehovha a vulavula na Samuwele a ku:
11 “Na tisola hileswi ni nga veka Sawulo swaku a va hosi, hikusa a tshike ku ni yingisa naswona a nga swi yendlanga leswi ni nga mu byela swona.”+ Kutani Samuwele a vaviseka hintamu, a rilela Yehovha wusiku hinkwalu.+
12 A nkama Samuwele a nga pfuka nimpundzu swaku a ya tlhangana na Sawulo, va mu byele leswi: “Sawulo a ye Karmeli+ naswona nkama a nga fika koseniyani a fike a tiyendlela pilari swaku a ta khumbukiwa hi lona.+ A gama a suka a ya Jiligali.”
13 A nkama Samuwele a nga mu kuma, Sawulo a te: “Yehovha a a ku katekisi. Ni swi yendlile leswi Yehovha a nga ni byela swona.”
14 Kambe Samuwele a ku: “Loko ku li leswo, se a guwa la tinyempfu ni tihomu leli ni li twaka i la yini?”+
15 Sawulo a mu hlamula a ku: “Hi tekele Vaamaleki. Masonchwa ma teke tinyempfu tatinene ni tihomu tatinene swaku va ta yendlela Yehovha Xikwembu xa wena magandzelo; kambe leswin’wani hi swi helisile.”
16 Kutani Samuwele a byela Sawulo a ku: “Hi nga nyimanyana! Twana leswi Yehovha a nga ni byela swona tolo niwusiku.”+ Se yena a ku: “Ni byeli!”
17 Samuwele a ku: “A hi wena a wu tivona u nga li wa nchumu+ nkama u nga langiwa swaku u va murhangeli wa tinxaka ta Israyele ni nkama Yehovha a nga ku langa swaku u va hosi ya Israyele?+
18 Yehovha a ku rhumile a ku: ‘Famba u ya helisa Vaamaleki lava nga vadjohi.+ Lwani na vona anze u va helisa.’+
19 Se hi mhaka muni u nga mu yingisanga Yehovha? U ve ni magolo* hi ku tsutsumela ku teka minchumu ya valala va wena,+ u yendla minchumu ya ku kala yi nga mu tsakisi Yehovha!”
20 Sawulo a hlamula Samuwele a ku: “Mina ni mu yingisile Yehovha! Ni swi yendlile leswi Yehovha a nga ni rhuma swona; ni khome Agagi hosi ya Vaamaleki ni gama ni dlaya Vaamaleki hinkwavu.+
21 Kambe masonchwa ma titekele tinyempfu ni tihomu ka minchumu ya valala va hina, ma teke minchumu yayinene leyi a yi fanele yi helisiwa, swaku ma ta yendlela Yehovha Xikwembu xa wena magandzelo aJiligali.”+
22 Samuwele a gama a ku: “I ntxini lexi tsakisaka Yehovha? I ku nyikela magandzelo ya ku hisiwa+ kumbe i ku yingisa leswi yena Yehovha a ku byelaka swona? Phela ku yingisa swa yampsa ku tlula ku yendla magandzelo+ ni ku yingisa kahle swa yampsa ku tlula ku nyikela mafurha+ ya nyempfu;
23 hikusa a ku yala ku yingisa+ i xidjoho xa ku fana ni ku hlahluva,+ ni ku tibyela swa fana ni ku yendla masalamusi ni ku gandzela swikwembu swa mavunhwa.* Leswi u kalaka u nga mu yingisanga Yehovha,+ na yena wa ku susa swaku u nga ha vi hosi.”+
24 Se Sawulo a byela Samuwele a ku: “Ni djohile hi mhaka ya leswi ni kalaka ni nga mu yingisanga Yehovha ni leswi u nga ni byela swona. Ni yo chava vanhu ni za ni yendla leswi va nga ni byela.
25 Swoswi ni kombela u ni rivalela xidjoho xa mina, u famba na mina swaku ni ya gandzela Yehovha.”+
26 Kambe Samuwele a hlamula Sawulo a ku: “A ni nga ta famba na wena hikusa a wu mu yingisanga Yehovha, kutani Yehovha na yena wa ku susa swaku u nga ha vi hosi ya Israyele.”+
27 Nkama Samuwele a nga ndzuluka swaku a famba, Sawulo a mu khoma hi mpahla,* yi gama yi handzuka.
28 Se Samuwele a mu byela a ku: “Leswi hi leswi nga ta ku yendlekela! Yehovha a ta ku tekela wuhosi la Israyele a li nyika munhu wa ku yampsa ku tlula wena.+
29 Kutani Xikwembu Lexikulu xa Israyele+ a xi hembi+ kumbe xi txintxa mimpimiso ya xona, hikusa a xi fani ni munhu swaku xi nga za xi txintxa leswi xi swi pimisaka.”+
30 Se a ku: “Ni djohile. Kambe ni kombela u nga ni danisi phambheni ka madoda ni phambheni ka Vayisrayele. Famba na mina swaku ni khizamela Yehovha Xikwembu xa wena.”+
31 A gama Samuwele a famba na yena, kutani Sawulo a fika a khizamela Yehovha.
32 Samuwele a ku: “Tisani Agagi hosi ya Vaamaleki.” Se Agagi a famba na a kanakana,* hikusa a a tibyelile a ku: ‘Ni ponile ka lifu.’
33 Kutani Samuwele a ku: “Leswi u nga rilisa vavasati va vanyingi hi ku dlaya vana va vona hi xipada, mamani wa wena na yena a ta rila ku fana na vona.” Se Samuwele a tsemelela Agagi phambheni ka Yehovha aJiligali.+
34 Samuwele a gama a ya Rama, kambe Sawulo a muka kaya ka yena aJibiya.
35 Samuwele a za a ya fa na a nga ha vonananga na Sawulo, hikusa Samuwele a a rila hi mhaka ya Sawulo.+ Kutani Yehovha a tisola hileswi a nga langa Sawulo swaku a va hosi ya Israyele.+
Tinhlamunselu ta le hansi
^ Kumbe: “makolo”.
^ Hi Xiheberu: “swifaniso swa materafimi.” Ku nga swikwembu swa ndjangu.
^ Ku nga nkhantxu wa ku pfumala mavoko.
^ Kumbexana: “titshemba”.
