Samuwele Wa Ku Sungula 2:1-36
2 Se Ana a khongela a ku:
“Mbilu ya mina ya tsaka hi wena Yehovha;+Yehovha u ni nyike ntamu.*
A ni chavi ku vulavula ni valala va mina,Hikusa ni tsakisiwa hi ku ponisa loku ku taka hi ka wena.
2 A ku na mun’wani wa ku kwetsima ku fana na wena Yehovha,A ku na mun’wani ko va wena ntsena,+A ku na ribye la ku fana na wena Xikwembu xa hina.+
3 Vanhu a va tshiki ku tibyela loko va vulavula;Va nga vulavuli marito ya ku tibyela hi minomo ya vona,Hikusa wena Yehovha u Xikwembu xa wutivi,+U kota ku kambisisa leswi vanhu va swi yendlaka.
4 Matlharhi ya vanhu va matimba ma tshoviwa,Kambe lava nga hela ntamu va nyikiwa matimba.+
5 Lava a va xurha, swi ta lava va tirha swaku va kuma pawu,Kambe lava a va ni ndlala a va ha siki hi ndlala.+
Lweyi a a nga psali, a psale 7 wa vana,+Kambe lweyi a a ni vana va vanyingi a nga ha psali.
6 Wena Yehovha wa helisa naswona wa hanyisa;Wa va yisa vanhu aSirheni* u tlhela u va pfuxa.+
7 Wena Yehovha u nga yendla swaku munhu a va xisiwana u tlhela u yendla swaku munhu a ganya;+U nga mu veka hansi munhu u tlhela u mu tlakusa.+
8 U susa xisiwana ka wuthulu;U tlakula lava kalaka va nga li va nchumu ka nsila,*+Swaku va tshama ni vanhu va ku ganya,U tlhela u va nyika switulu swa lisima.
Leswi misava yi nga tiya hi swona i swa wena Yehovha,+U tlhateke misava henhla ka swona.
9 Lava ku tshembeka wa va vhikela ka tindlela leti va fambaka ka tona,+Kambe lava va yendlaka swa ku biha va ta miyetiwa ka ku mphuma,+Hikusa munhu a nga hluli hi matimba ya yena.+
10 Wena Yehovha u ta pfotlosa lava lwaka na wena;*+U ta kombisa ku kwata ka wena ku fana ni ku duma ka tilo.+
Wena Yehovha u ta yavanyisa misava hinkwayu,+U ta yi nyika matimba hosi ya wena,+U tlhela u mu nyika ntamu lweyi u nga mu langa.”*+
11 Se Elkana a muka kaya ka yena aRama, kambe xidjahana xi tirhela Yehovha+ phambheni ka muprista Eli.
12 Kambe vana va Eli a va yendla swilo swa ku biha;+ a va nga mu hloniphi Yehovha.
13 Minkama hinkwayu loko vanhu va ta va ta nyikela magandzelo, a va nga teki leswi a swi va fanela ntsena hileswi a va li vaprista, kambe a va yendla leswi:+ A nkama nyama a yi swekiwa, mupfunisi wa muprista a a ta na a khome a garfu ya matinyu manharhu,
14 a fika a yi peta ka tipanela leti a va swekela ka tona.* Nyama hinkwayu leyi a a yi tsavula hi garfu, muprista a a yi teka yi va ya yena. Hi leswi a va yendlisa swona ka Vayisrayele hinkwavu lava a va ya Xilo.
15 Loko lweyi a yendlaka magandzelo a nga se hisa mafurha,+ mupfunisi wa muprista a a ta a fika a ku: “Mu nyiki nyama muprista swaku a yi woxa. A nge pfumeli ku teka nyama ya ku swekiwa, a lava ya yimbisi.”
16 Kutani loko lweyi a tisaka gandzelo a ku: “A va rhangi hi ku hisa mafurha+ u ta gama u titekela nyama leyi u yi lavaka,” mupfunisi wa muprista a a ku: “Ihim, ni nyiki swoswi, loko u nga ni nyiki ni ta yi teka hi nkanu!”
17 Se xidjoho xa vapfunisi va vaprista lava, a xi li xikulu hintamu ka Yehovha+ hikusa a va nga ma hloniphi magandzelo ya Yehovha.
18 Samuwele a a tirhela Yehovha+ na a yambale efodi*+ leli a li yendliwe hi panu hambileswi a a li xidjahana.
19 Lembe ni lembe mamani wa yena a a mu rhungela mpahla,* a gama a ya mu nyika nkama yena ni nuna wa yena a va ya Xilo va ya nyikela gandzelo la lembe ni lembe.+
20 Kutani Eli a katekisa Elkana ni nsati wa yena a ku: “Yehovha a a ku nyiki n’wana hi nsati lweyi, a pfaleta lweyi u nga mu lomba Yehovha.”+ Va gama va muka.
21 Se Yehovha a mu twela wusiwana Ana, a tlhela a psala* vana van’wani.+ A psale vana vanharhu va xinuna ni vambirhi va xisati. Kambe Samuwele lweyi a a li mufana a a tama a kula phambheni ka Yehovha.+
22 Eli a a gugile hintamu naswona a a swi twile hinkwaswu leswi vana va yena a va tshamela ku swi yendla+ ka Vayisrayele hinkwavu, ni swaku a va famba masangu ni vavasati lava a va tirha ka nyanghwa wa tende la ntlhanganu.+
23 A a tshamela ku va vutisa a ku: “Hi mhaka muni mi tshamela ku yendla minchumu ya ku fana ni leyi? Minchumu leyi ni yi twaka hi n’wina ka vanhu hinkwavu a yi tsakisi.
24 Mi nga yendleni leswo vana va mina. Phela leswi ni swi twaka ka vanhu va Yehovha hi n’wina, a hi swinene.
25 Loko munhu o djohela munhu mun’wani, a nga ha kombeleliwa rivalelo* ka Yehovha; kambe loko munhu o djohela Yehovha,+ a ta khongeleliwa hi mani?” Kambe a va mu yingisanga papayi wa vona, hikusa Yehovha se a a bohile ku va dlaya.+
26 Hi nkama wolowo, Samuwele lweyi a a li xidjahana a a tama a kula na a rhandziwa hi Yehovha ni hi vanhu.+
27 Se munhu lweyi a a rhumiwe hi Xikwembu a ya ka Eli a fika a ku: “Yehovha a li: ‘A ni titivisanga ka vhovho wa wena nkama yena ni ndjangu wa yena a va li Gibita, na va li swikarawa swa Faru?*+
28 Naswona ni mu langile ka tinxaka hinkwatu ta Israyele+ swaku a va muprista wa mina ni swaku a yendla magandzelo ka altari ya mina,+ a hisa swinun’hwelisu* a tlhela a yambala efodi* phambheni ka mina; ni game ni nyika vhovho wa wena ni lixaka la yena magandzelo hinkwawu ya Vayisrayele lawa ma hisiwaka hi ndzilu.+
29 Hi mhaka muni mi nga ma hloniphi* magandzelo lawa ni nga mi byela swaku ma yendliwa ka ndhawu leyi ni tshamaka ka yona?+ Hi mhaka muni u tshamela ku hlonipha vana va wena ku tlula mina, mi tlhela mi kuluka hi ku dla swaswinene swa kona ka magandzelo lawa vanhu va mina ku nga Vayisrayele va ni tiselaka wona?+
30 “‘Hi leswi swi yendlaka Yehovha Xikwembu xa Israyele a ku: “Vhela hi mina ni nga vula swaku ndjangu wa wena ni ndjangu wa vhovho wa wena yi ta tirha phambheni ka mina minkama hinkwayu.”+ Kambe swoswi Yehovha a li: “A swi nga ta yendlisa leswo hikusa lava va ni hloniphaka ni ta va hlonipha+ kambe lava kalaka va nga ni hloniphi va ta danisiwa.”
31 Masiku ma ta, lawa ni nga ta yendla swaku u hela ntamu, wena ni ndjangu wa papayi wa wena. Naswona a ku nga ha ta va ni munhu lweyi a nga ta kula a za a guga ka ndjangu wa wena.+
32 Nkama ni nga ta yendlela Vayisrayele swilo hinkwaswu swaswinene, u ta vona nala na a li ka ndhawu leyi ni tshamaka ka yona,+ naswona a ku nga ta va ni munhu lweyi a nga ta kula a za a guga ka ndjangu wa wena.
33 Se a munhu wa lixaka la wena lweyi ni nga ta mu tshika a tirha ka altari la mina, a ta yendla swaku u fa matihlo a tlhela a ku twisa ku vava. Kambe vanhu va vanyingi ka ndjangu wa wena va ta dlayiwa hi xipada.+
34 Naswona leswi nga ta yendleka ka vana va wena vambirhi, Hofini na Feniyasi, swi ta va xikombiso ka wena: Hi vambirhi va ta fa hi siku lin’we.+
35 Ni ta tilangela muprista wa ku tshembeka,+ a ta yendla leswi mbilu ya mina yi swi lavaka, ni ta mu yakela yindlo ya ku tiya swinene. Naswona nkama hinkwawu a ta tirha phambheni ka hosi leyi ni nga ta yi langa.
36 Lweyi a nga ta sala ka lixaka la wena a ta ya ka muprista yelweyo a fika a mu khizamela swaku a ta hakeliwa hi male ni pawu; naswona a ta ku: “Ni kombela u ni nyika ntirho wa wuprista ni ta kota ku kuma pawu.”’”+
Tinhlamunselu ta le hansi
^ Hi Xiheberu: “Yehovha a tlakuse limhondzo la mina.” Vona Ntlhamuselo ka rito “Limhondzo.”
^ Kumbe: “Sheol”. Vona Ntlhamuselo.
^ Kumbexana: “lani ku txukumetiwaka kona nsila; taleni”.
^ Kumbexana: “lava lwaka na Yehovha va ta chava.”
^ Hi Xiheberu: “A ta tlakusa limhondzo la lweyi a nga mu langa.” Vona Ntlhamuselo ka rito “Limhondzo.”
^ Ku nga tipanela tatikulu leti a ti ni swikhomo swimbirhi kumbe xin’we.
^ Vona Ntlhamuselo.
^ Ku nga mpahla ya ku fana ni xinkhantxwana xa ku pfumala mavoko.
^ Kumbe: “veleka”.
^ Kumbexana: “Xikwembu xi ta mu yavanyisa”.
^ Hi Xiheberu: “kaya ka Faru.”
^ Vona Ntlhamuselo.
^ Kumbexana: “ku tuvikisa ximusi xa magandzelo”. Vona Ntlhamuselo.
^ Hi Xiheberu: “ku khava”.
