Samuwele Wa Ku Sungula 22:1-23
22 Se Davhida a suka kolanu+ a baleka a ya tumbela ka mhakwa* wa Adulami.+ Nkama vamakwavu va yena ni ndjangu hinkwawu wa papayi wa yena va nga swi twa, va suka va ya lomu a a li kona.
2 Hinkwavu lava a va ni swikarhatu, lava a va ni swikweneti ni lava a va karhatekile va ya ka yena se yena a va murhangeli wa vona. A ku ni kolomuyani ka 400 wa vavanuna lava a va li na yena.
3 Se Davhida a gama a suka a ya Mizpe aMowabu, a fika a byela hosi ya Mowabu a ku:+ “Ni kombela u pfumela swaku papayi na mamani va tshama na wena anze ni tiva leswi Xikwembu xi nga ta ni yendlela swona.”
4 Se a va siya ni hosi ya Mowabu, va tshame na yona nkama hinkwawu lowu Davhida a a tumbele ka tintshava.+
5 Hi ku famba ka nkama muprofeta Gadi+ a byela Davhida a ku: “U nga ha tshami ka ndhawu ya tintshava. Famba u ya tshama ka tiko la Yuda.”+ Se Davhida a suka a ya ka khwati la Ereti.
6 Sawulo a twa swaku Davhida ni vavanuna lava a va li na yena va kumiwile. Hi nkama wolowo Sawulo a a tshame hansi ka nsinya wa tamarixka* lowu nga ka ganga leli nga aJibiya;+ a a khome tlharhi naswona vatirhi va yena hinkwavu a va nyime kusuhi na yena.
7 Sawulo a byela vatirhi va yena lava a va li kusuhi na yena a ku: “Ni kombela mi ni yingisa n’wina va ka Benjamini. Indjhe n’wana wa Yese+ a ta mi nyika ndhawu ya ku rima a tlhela a mi nyika masimu ya mawuvha hinkwenu ka n’wina? Indjhe a ta mi veka mi va varhangeli va mintlawa ya 100 wa vanhu ni va mintlawa ya 1.000 wa vanhu?+
8 Hinkwenu ka n’wina mi ni djikelile! A nga kona a nga ni byela nkama n’wana wa mina a nga yendla ntwananu ni n’wana wa Yese!+ Naswona a nga kona ni mun’we ka n’wina lweyi a nga ni twela wusiwana, a ni byela swaku n’wana wa mina a xenge mutirhi wa mina swaku a ni tumbelela, ku fana ni swoswi.”
9 Se Dowegi+ wa Muedomu, lweyi a a nyime kolanu lweyi a a li murhangeli wa vatirhi va Sawulo a mu hlamula a ku:+ “Ni vone n’wana wa Yese a ta aNobi ka Ahimeleki n’wana wa Ayitubi.+
10 Ahimeleki a mu vutisele ka Yehovha swaku a a fanele a yendla yini, a tlhela a mu nyika ni swakudla. Hambi xipada xa Goliyadi lweyi wa Mufilista a mu nyikile.”+
11 Hosi yi vhela yi rhuma vanhu va ya vitana Ahimeleki n’wana wa muprista Ayitubi ni vaprista hinkwavu va ndjangu wa papayi wa yena, lava a va li aNobi. Kutani hinkwavu va famba ka hosi.
12 Sawulo a ku: “Ni kombela u ni yingisa wena n’wana wa Ayitubi,” se yena a ku: “Na ku yingisa wena hosi.”
13 Sawulo a ku: “Hi mhaka muni wena ni n’wana wa Yese mi ni djikela? U mu nyike pawu ni xipada u tlhela u mu vutisela ka Xikwembu swaku a fanele a yendla yini. Phela yena a lwa na mina naswona ni swoswi ni khulumaka na wena a ni tumbelelile.”
14 Kutani Ahimeleki a hlamula hosi a ku: “I mani ka vatirhi va wena hinkwavu lweyi a nga tshembeka ku fana na Davhida?+ Phela i mukon’wani wa wena,+ wena hosi, i murhangeli wa vagwardu va wena naswona wa hloniphiwa akaya ka wena.+
15 Phela a no sungula ku mu vutisela ka Xikwembu swaku a fanele a yendla yini.+ Mina a ni nge tshuki ni ku djikela. We hosi u nga ni nyiki nandzu mina ni ndjangu hinkwawu wa papayi, hikusa a ni nga tivi nchumu hi mhaka leyi.”+
16 Kambe hosi yi ku: “Wena Ahimeleki u ta dlayiwa,+ wena ni ndjangu hinkwawu wa papayi wa wena.”+
17 Se hosi yi gama yi byela vagwardu lava a va nyime kusuhi na yona yi ku: “Dlayani vaprista va Yehovha, hikusa va nyime na Davhida! A va swi tiva swaku a le ku balekeni kambe a va ni byelanga!” Kambe vatirhi va hosi a va nga swi lavi ku dlaya vaprista va Yehovha.
18 A hosi yi byela Dowegi yi ku:+ “Dlaya vaprista!” Dowegi wa Muedomu+ a vhela a dlaya vaprista. Hi siku lolelo a dlaye 85 wa vaprista.*+
19 A tlhele a hlasela Nobi hi xipada,+ ku nga doropa la vaprista; a dlaye vavanuna ni vavasati, vana ni swibebetani, tihomu, timbongolo ni tinyempfu a swi dlaye hi xipada.
20 Se a n’wana mun’we wa Ahimeleki n’wana wa Ayitubi, lweyi vito la yena ku nga Abiyatari+ a balekile a landza Davhida.
21 A fika a byela Davhida a ku: “Sawulo a dlaye vaprista va Yehovha.”
22 Kutani Davhida a byela Abiyatari a ku: “A ni swi tiva swaku Dowegi wa Muedomu, a a ta ya byela Sawulo leswi nga yendleka hikusa a a li kona siku leliya.+ Hi mina ni nga dlayisa hinkwavu akaya ka papayi wa wena.
23 Tshama na mina. U nga chavi, lweyi a lavaka ku dlaya wena a lava ku dlaya na mina; se mina ni ta ku vhikela.”+
Tinhlamunselu ta le hansi
^ Ku nga mbhovo lowu kumekaka ka ntshava kumbe ka ribye.
^ I nsinya wa vherdi wu nga ni matluka yamatsongo ni swiluva swa kor de roza kumbe swa ku basa.
^ Hi Xiheberu: “85 wa vavanuna lava a va yambala efodi ya panu.” Vona Ntlhamuselo.
