Samuwele Wa Ku Sungula 26:1-25
26 Hi ku famba ka nkama vavanuna va Zifi+ va ya ka Sawulo aJibiya,+ va fika va ku: “Davhida a tumbele ka ganga la Akila leli nga txuvukana ni Yeximoni.”*+
2 Se Sawulo a ya mananga ya Zifi na a ni 3.000 wa masonchwa, lama nga langiwa ka tiko hinkwalu la Israyele swaku va ya lavetela Davhida.+
3 Sawulo a fika a gwimba matende ka ganga la Akila leli nga txuvukana ni Yeximoni akusuhi ni ndlela. Davhida a a tshama mananga hi nkama wolowo, kutani a twa swaku Sawulo a tile amananga swaku a mu lavetela.
4 Se Davhida a rhuma vanhu va ya kamba swaku Sawulo a a tile kumbe a a nga tanga.
5 Kutani Davhida a ya lani Sawulo a a gwimbe kona matende, a gama a vona Sawulo na Abineri+ n’wana wa Neri, murhangeli wa masonchwa ya Sawulo, lomu a va yetlele kona; Sawulo a a yetlelile ka tende la yena, na lani matlhelweni ku ni matende ya masonchwa ya yena.
6 Davhida a vutisa Ahimeleki lweyi wa Muheti+ na Abixayi+ n’wana wa Zeruya,+ makwavu wa Yowabu a ku: “I mani a nga ta famba na mina ka tende la Sawulo?” Abixayi a ku: “Mina ni ta famba na wena.”
7 Davhida na Abixayi va ya lani a ku ni masonchwa niwusiku, va fika va kuma swaku Sawulo a yetlelile funtshi tlharhi la yena li dzimiwile kusuhi ni nhloko ya yena; Abineri ni masonchwa a va yetlele matlhelweni ka yena.
8 Abixayi a byela Davhida a ku: “Namuntlha Xikwembu xi nyikele nala wa wena ka mavoko ya wena.+ Swoswi ni kombela u ni tshika ni mu tlhava kan’we ntsena hi tlharhi ni mu patsa ni misava, a ni nga ta phindha kambirhi.”
9 Kambe Davhida a byela Abixayi a ku: “U nga mu dlayi, hikusa a nga kona lweyi a nga lwaka ni lweyi a nga langiwa hi Yehovha+ a gama a nga kumi nandzu!”+
10 Davhida a tlhela a ku: “Na funga hi vito la Yehovha Xikwembu lexi hanyaka swaku Yehovha hi yena a nga ta mu dlaya hi yexe,+ kumbe loko siku la yena la ku fa li fika+ se a fa, kumbe a ta ya nyimpini a ya fela kona.+
11 Leswi ni mu hloniphaka Yehovha a ni nge mu dlayi lweyi a nga langiwa hi yena Yehovha!+ Ni kombela u teka tlharhi leli nga kusuhi ni nhloko ya yena ni bolhela la mati hi famba.”
12 Kutani Davhida a teka tlharhi ni bolhela la mati leli a li li kusuhi ni nhloko ya Sawulo, va gama va famba. A nga kona lweyi a nga va vona+ kumbe ku pfuka, hikusa Yehovha a a yendle swaku hinkwavu ka vona va yetlela wurhongo lalikulu.
13 Davhida a tlulela a ya ka tlhelo lelin’wani, a fika a nyima henhla ka ntshava leyi a yi li kulenyana ni lani Sawulo a a yetlele kona.
14 Davhida a vitana masonchwa na Abineri+ n’wana wa Neri hi rito lalikulu, a ku: “Abineri, wa ni twa ke?” Abineri a hlamula a ku: “Hi wena mani u vitanaka hosi?”
15 Davhida a byela Abineri a ku: “Wena u sonchwa la ntamu funtshi a ku na mun’wani wa ku fana na wena aIsrayele. Se hi mhaka muni u nga swi kotanga ku vonelela hosi ya wena? Phela ku ni sonchwa li nga ta na li lava ku dlaya hosi ya wena.+
16 Leswi u nga swi yendla a swi kahle. Na funga hi vito la Yehovha Xikwembu lexi hanyaka swaku u faneliwa hi ku fa, hikusa a mi yi vonelelanga hosi ya n’wina, leyi nga langiwa hi Yehovha.+ Txuvukani matlhelweni! Li kwini tlharhi la hosi ni bolhela la mati+ leswi a swi li kusuhi ni nhloko ya yona?”
17 Kutani Sawulo a swi twa swaku i Davhida lweyi a a vulavula, a gama a ku: “Hi wena Davhida n’wananga u vulavulaka?”+ Davhida a hlamula a ku: “Ina, hi mina hosi ya mina.”
18 A tlhela a ku: “Hi mhaka muni wena hosi u ni hlongolisa?+ Ni yo wonha yini ke? Ni dlawela yini?+
19 Na ku kombela wena hosi swaku u ni yingisa: Loko ku li swaku i Yehovha a nga ku byela swaku u lwa na mina, a a yamukeli gandzelo la mina la swakudla. Kambe loko ku li vanhu va ku byeletelaka,+ Yehovha a a va khatisi hikusa namuntlha va ni hlongolile swaku ni nga tshami ni vanhu va Yehovha,+ va ku: ‘Famba u ya tirhela swikwembu swin’wani!’
20 Kambe swoswi u nga ni tshiki ni fa kule na Yehovha, hikusa wena hosi ya Israyele u tile u ta lavetela ndhata yin’we,+ ingaku hi loko wo hlongolisa n’hwarhi* ka tintshava.”
21 Se Sawulo a ku: “Ni djohile.+ Vuya Davhida n’wananga, a ni nga ta ku yendla nchumu xa ku biha, hikusa u li nyike lisima wutomi la mina+ namuntlha. Ni tiyendle xiphunta funtshi ni phazamile hintamu.”
22 Davhida a hlamula a ku: “Hi leli tlharhi la wena, wena hosi. Rhuma sonchwa la wena li ta li teka.
23 Yehovha hi yena lweyi a nga ta hakela mun’wani ni mun’wani hi mhaka ya ku lulama ka yena+ ni ku tshembeka ka yena, hikusa Yehovha a a ku nyikele ka mavoko ya mina namuntlha, kambe a ni swi lavanga ku lwa na wena hikusa u langiwe hi Yehovha.+
24 Leswi namuntlha ni nga li nyika lisima wutomi la wena, na yena Yehovha a a li nyiki lisima la ka mina, a a ni ponisi ka swikarhatu swa mina.”+
25 Kutani Sawulo a byela Davhida a ku: “Xikwembu a xi ku katekise n’wananga. Na tshemba swaku u ta yendla minchumu ya ku hlamalisa funtshi u ta hlula.”+ Se Davhida a famba, na yena Sawulo a gama a muka kaya ka yena.+
