Samuwele Wa Ku Sungula 30:1-31
30 A nkama Davhida ni vanhu va yena va nga fika aZikilagi+ hi siku la wunharhu, va kume swaku Vaamaleki+ a va dumele Negebi* ku patsa ni Zikilagi, va tlhela va hisa doropa la Zikilagi hi ndzilu.
2 Va teke vavasati ni vanhu hinkwavu+ lava va nga va kuma kolanu, vavatsongo ni vavakulu. A va dlayanga munhu, kambe va yo va teka va famba na vona.
3 A nkama Davhida ni vanhu va yena va nga fika, va kume swaku doropa hinkwalu a li hisiwile, naswona vasati va vona ni vana va vona va madjaha ni va tintombhi a va tekiwile.
4 Se Davhida ni vanhu va yena va sungula ku rila swi twakala va za va hela ntamu.
5 Vasati vambirhi va Davhida ku nga Ahinowami wa le Yezreyeli na Abigayili wa Karmeli lweyi a a li nsati wa Nabali lweyi a nga fa, na vona a va tekiwile.+
6 Davhida a a karhateke hintamu, hikusa vanhu va yena a va vulavula hi ku mu ba hi maribye hi mhaka ya leswi a va twa ku vava hileswi va nga luzekeliwa hi vana va vona va madjaha ni va tintombhi. Davhida a kombele Yehovha Xikwembu xa yena+ swaku a mu nyika ntamu, se yena a mu nyika ntamu.
7 Davhida a byela muprista Abiyatari+ n’wana wa Ahimeleki, a ku: “Ni kombela u tisa efodi* halenu.”+ Kutani Abiyatari a tisa efodi ka Davhida.
8 Davhida a vutisa Yehovha, a ku:+ “Ni va hlongolisa vanhu lava va nga hlasela doropa va tlhela va teketela minchumu? Indjhe ni ta va kuma?” Se a mu hlamula a ku: “Va hlongolisi, hikusa u ta va kuma hikakunene u tlhela u kuma ni hinkwaswu leswi va nga swi teka.”+
9 Kutani Davhida ni 600 wa vavanuna+ lava a a li na vona va kahlula va va hlongolisa, va famba va ya fika ka Nkova wa Bezori, lani vavanuna van’wani va nga fika va sala kona.
10 Davhida ni 400 wa vavanuna va tama va va hlongolisa, kambe 200 wa vavanuna lava a va karhalile hintamu va sala ka Nkova wa Bezori.+
11 Se va kuma wanuna wa Mugibita anhoveni va gama va mu yisa ka Davhida. Va mu nyika swakudla leswaku a dla ni mati ya ku phuza,
12 va tlhela va mu nyika xikhemu xa bolu la ku hambiwa hi makuwa ya ku woma ni mabolu mambirhi ya ku hambiwa hi mawuvha ya ku woma. Nkama a nga gama ku dla a sungula ku kuma ntamu, hikusa a a hete masiku manharhu ni wusiku la kona na a nga dlanga nchumu kumbe ku phuza mati.
13 Davhida a mu vutisa a ku: “U mutirhi wa mani naswona u wa kwini?” A mu hlamula a ku: “Ni Mugibita, ni tirhela wanuna wa Muamaleki, kambe yena a ni siyile hikusa ni sungule ku vabya ka masiku manharhu lawa ma nga hundza.
14 Hi hina hi nga hlasela sul* ka tiko la Vakereti+ ni tiko la Yuda ni sul ka tiko la Kalebe,+ naswona a doropa la Zikilagi hi li hise hi ndzilu.”
15 Kutani Davhida a mu vutisa a ku: “U nga ni komba lani vanhu lava va nga hlasela doropa va tlhela va teketela minchumu va nga kona?” A hlamula a ku: “Loko wo funga hi vito la Xikwembu swaku a wu nga ta ni dlaya ni swaku a wu nga ta ni nyikela ka patrao wa mina, ni ta ya ku komba lani va nga kona.”
16 Se a va teka a famba na vona a ya va komba lomu a va hangalakele kona ka matlhelo hinkwawu ya tiko. Va va kume na va dla, va nwa va tlhela va hamba fexta hi mhaka ya minchumu hinkwayu leyi va nga yi teka ka tiko la Vafilista ni tiko la Yuda.
17 Kutani Davhida a va dlaya ku sukela nimpundzu hintamu anze nimadlambu, a dlaye hinkwavu ku pona+ ntsena 400 wa vavanuna lava nga baleka hi makamela.
18 Davhida a tlhela a kuma minchumu hinkwayu leyi Vaamaleki a va yi tekile,+ a tlhela a ponisa ni vasati va yena vavambirhi.
19 Va teke minchumu ya vona hinkwayu, ku sukela ka yayitsongo ku ya ka yayikulu. Va teke vana va vona va madjaha ni va tintombhi ni hinkwaswu leswi a swi tekiwile;+ Davhida a teke minchumu hinkwayu leyi a va yi tekile.
20 Davhida a va tekele tinyempfu ni tihomu ta vona hinkwatu a swi patsa ni swifuyu leswi a va va tekele swona. Se lava a a li na vona va swi teka va famba na swona na va ku: “Leyi i minchumu leyi Davhida a nga tekela valala va yena.”
21 Kutani Davhida a fika ka 200 wa vavanuna lava a va sale ka nkova wa Bezori+ hileswi a va karhale hintamu naswona va nga ha gwenti ku famba na yena; se va huma va ya tlhangaveta Davhida ni vanhu lava a a li na vona. Nkama Davhida a nga fika lani a va li kona, a va vutise swaku swo yini.
22 Kutani vavanuna hinkwavu va swiphunta ni va mona ka lava a va fambe na Davhida anyimpini va ku: “Leswi va kalaka va nga fambanga na hina, a hi nga ta va nyika nchumu ka leswi hi nga vuya na swona. A va teki vasati va vona ni vana va vona va famba.”
23 Kambe Davhida a ku: “Vamakwerhu, mi nga yendleni leswo hi minchumu leyi hi nga nyikiwa hi Yehovha. Phela hi yena a nga hi vhikela a tlhela a hi pfuna ku hlula vanhu lava nga hi hlasela va tlhela va teka minchumu ya hina.+
24 A nga kona lweyi a nga ta nyima ni leswi n’wina mi swi hlayaka. Leswi nga ta kumiwa hi lava nga ya nyimpini swi ta fana ni leswi nga ta kumiwa hi lava va nga sala ni swidjumba.+ Hinkwavu va ta kuma xanchumu.”+
25 Ku sukela hi siku lolelo, a swi veke swi va nawu aIsrayele ku ta fika ni namuntlha.
26 Nkama Davhida a nga fika aZikilagi, a teke swin’wani ka leswi a nga vuya na swona a gama a swi rhumela ka madoda ya Yuda lawa a ma li vanghanu va yena, a gama a ku: “Hi mi nyika leswi, ka leswi hi nga tekela valala va Yehovha.”
27 A swi rhumele ka lava a va li Betele,+ ni lava a va li Ramoti doropa la Negebi, ni lava a va li Yatiri,+
28 ni lava a va li Arowa, ni lava a va li Sifimoti, ni lava a va li Exitemoya,+
29 ni lava a va li Rakali, ni lava a va li ka madoropa ya Jeramiyele,+ ni lava a va li ka madoropa ya Vakena,+
30 ni lava a va li Orma,+ ni lava a va li Boraxani, ni lava a va li Ataki,
31 ni lava a va li Hebroni+ ni lava a va tshama ka tindhawu hinkwatu leti Davhida ni vanhu va yena va nga tshama va ya ka tona.
