Samuwele Wa Ku Sungula 4:1-22
4 Se rito la Samuwele li fika ka Vayisrayele hinkwavu.
Vayisrayele va gama va famba va ya lwa ni Vafilista; va fika va gwimba matende akusuhi ni Ebenezeri, kasi Vafilista va gwimbe matende aAfeki.
2 Vafilista va tilulamisela ku ya lwa nyimpi ni Vayisrayele, kambe nyimpi a yi va fambelanga kahle Vayisrayele. Vafilista va hlule Vayisrayele va tlhela va dlaya kolomuyani ka 4.000 wa masonchwa ya vona lani a va lwela kona.
3 A nkama vanhu va nga tlhelela ka matende ya vona, madoda ya Israyele ma ku: “Hi mhaka muni Yehovha a hi tshike hi hluliwa* hi Vafilista namuntlha?+ A hi landzeni areka ya ntwananu wa Yehovha aXilo,+ swaku yi ta va na hina; yi ta hi ponisa ka voko la valala va hina.”
4 Se va rhuma vanhu va ya Xilo, va ya teka areka ya ntwananu wa Yehovha murhangeli wa tintsumi lweyi a nga tshama ka xitshamu xa yena xa wuhosi ahenhla* ka makerubu va vuya na yona.+ Se Hofini na Feniyasi+ ku nga vana vambirhi va Eli a va li kolanu ni areka ya ntwananu ya Xikwembu xa ntiyiso.
5 A nkama areka ya ntwananu wa Yehovha yi nga fika lani a va gwimbe kona matende, Vayisrayele hinkwavu va sungula ku vanga guwa lalikulu, misava yi za yi tsekatseka.
6 A nkama Vafilista va nga twa guwa lolelo, va te: “Hi mhaka muni ku ni guwa lalikulu hintamu ka matende ya Vaheberu?” Hi wugamu va twa swaku a Areka ya Yehovha a yi yisiwile lani Vayisrayele a va gwimbe kona matende.
7 Vafilista va sungula ku chava, va gama va ku: “Xikwembu xa vona xi fikile ka matende ya vona!”+ Se va ku: “Hi file hinoo! Phela minchumu ya ku fana ni leyi a yi se tshama yi yendleka!
8 Hi file hinoo! I mani a nga ta hi ponisa ka voko la Xikwembu lexi lexikulu? Phela lexi i Xikwembu lexi nga ba Vagibita hi makhombo ya manyingi amananga.+
9 Kambe mi nga chaveni n’wina Vafilista, va kombeni swaku n’wina mi vavanuna swaku mi nga va tirheli Vaheberu ku fana ni leswi va nga mi tirhelisa xiswona.+ Tshikani ku chava, fambani mi ya lwa!”
10 Kutani Vafilista va famba va ya lwa ni Vayisrayele va va hlula,+ se Vayisrayele va baleka mun’wani ni mun’wani a ya ka tende la yena. Vanhu lava nga dlayiwa a va li vanyingi hintamu. Phela ku dlayiwe 30.000 wa masonchwa ya Vayisrayele lawa a ma famba hi minenge.
11 Kutani Areka ya Xikwembu yi tekiwa naswona Hofini na Feniyasi ku nga vana vambirhi va Eli na vona va dlayiwile.+
12 Wanuna mun’wani wa lixaka la Benjamini a suka lani a ku lwiwa kona a tsutsuma a za a ya fika Xilo hi siku lolelo, mpahla ya yena a yi davukelile naswona a a ni wuthulu ka nhloko.+
13 A nkama a nga fika, Eli a a tshame ka xitulu atlhelweni ka ndlela na a nyimela ku twa nchumu, hikusa mbilu ya yena a yi ba hi mhaka ya Areka ya Xikwembu xa ntiyiso.+ Se wanuna lwiyani a ku swee ka doropa a va byela leswi nga yendleka, se vanhu hinkwavu lava a va li ka doropa va karhateka, va sungula ku ba tinyandha.
14 A nkama Eli a nga twa vanhu na va ba tinyandha, a vutisa a ku: “I guwa la yini leli ni li twaka?” Kutani wanuna lwiyani a tsutsuma a ya ka Eli a fika a mu byela leswi nga yendleka.
15 (Hi nkama wolowo Eli a a ni 98 wa malembe, matihlo ya yena a ma nga ha voni naswona a ma nga ha tsopeti.)+
16 Se wanuna lweyi a byela Eli a ku: “Phela mina u ni vonaka ni ta hi seni nyimpi yi pfurhaka kona! Ni yo baleka namuntlha nyimpini.” Kutani Eli a mu vutisa a ku: “Hi nga ni byela ka, ku yendleke yini n’wananga?”
17 Se lweyi a a tisa mahungu a ku: “Vayisrayele va va balekile Vafilista, hikusa va hluliwe hintamu;+ hambi hi vana va wena vavambirhi, Hofini na Feniyasi va file+ naswona Areka ya Xikwembu xa ntiyiso yi tekiwile hi Vafilista.”+
18 A nkama Eli a nga twa swaku Areka ya Xikwembu xa ntiyiso yi tekiwile, a yo vhela a wa hi xikosi ka xitulu lexi a a tshame ka xona atlhelweni ka nyanghwa wa doropa, a tshoveka nhamu a gama a fa, hikusa a a gugile a tlhela a kuluka. A yavanyise Vayisrayele 40 wa malembe.
19 Se a mamanyani* wa Eli, nsati wa Feniyasi, a a ni nyimba naswona a a li kusuhi ni ku psala.* Kutani a nkama a nga twa swaku Areka ya Xikwembu xa ntiyiso yi tekiwile ni leswaku papayi wa nuna wa yena ni nuna wa yena va file, a sungula ku twa ku vava hintamu* a gama a psala kola na kola.
20 A nkama a a li kusuhi ni ku fa, vavasati lava a va nyime kusuhi na yena, va te: “U nga chavi, hikusa u psale n’wana wa djaha.” Kambe yena a nga va hlamulanga naswona a nga swi vekanga ka mbilu ya yena leswi va nga swi hlaya.
21 Kambe a chule n’wana lweyi a ku i Ikabodi,*+ a gama a ku: “Ku phatima ku sukile aIsrayele ku ya awukaraweni.”+ Kambe a a vulavula hi ku tekiwa ka Areka ya Xikwembu xa ntiyiso ni leswi nga yendleka ka papayi wa nuna wa yena ni ka nuna wa yena.+
22 A te: “Xikwembu a xi nga ha ta va pfuna Vayisrayele, hikusa Areka ya Xikwembu xa ntiyiso yi tekiwile.”+
Tinhlamunselu ta le hansi
^ Hi Xiheberu: “Hi mhaka muni Yehovha a hi hlulile?”
^ Kumbexana: “axikarhi”.
^ Kumbe: “mawokazani”.
^ Kumbe: “veleka.”
^ Kumbe: “ku lun’wa”. Ku nga ku vava loku wansati a ku twaka loko a lava ku psala.
^ Leswi vulaka “Ku Kwini Ku Dzuneka”?
