Samuwele Wa Ku Sungula 6:1-21
-
Vafilista va tlhelisa Areka aIsrayele (1-21)
6 Areka+ ya Yehovha yi hete 7 wa tiwheti ka tiko la Vafilista.
2 Se Vafilista va vitana vaprista ni lava va ku vhumba,+ va gama va va vutisa va ku: “Hi fanele hi yendla yini hi Areka ya Yehovha? Hi byeleni swaku hi fanele hi yendla yini swaku hi yi tlhelisa ka ndhawu ya yona.”
3 Va va hlamula va ku: “Loko mi tlhelisa areka ya ntwananu wa Yehovha Xikwembu xa Israyele, mi nga yi tlhelisi na yi nga na gandzelo. Mi fanele mi yi tlhelisa na yi ni gandzelo la nandzu.+ Se hi kona mi nga ta hanyisiwa mi tlhela mi swi tiva swaku a mi khatisa hi mhaka muni.”
4 Kutani va vutisa va ku: “I gandzelo la nandzu la ku tshamisa ku yini leli hi faneleke hi li rhumela?” Va va hlamula va ku: “Rhumelani 5 wa swifaniso swa woru swa ndhawu leyi nga pfimba ni 5 wa swifaniso swa woru swa makondlo, hi ku ya hi numeru ya 5 wa tihosi ta Vafilista,+ hikusa n’wina hinkwenu ku patsa ni tihosi ta n’wina mi vabye hi mavabyi ya ku fana.
5 Mi fanele mi yendla swifaniso swa n’wina+ swa ndhawu leyi nga pfimba ni swa makondlo lawa ma wonhetelaka tiko, naswona mi fanele mi hlonipha Xikwembu xa Israyele. Loko mi yendla leswo devhi Xikwembu xi nga tshika ku mi khatisa n’wina ni xikwembu xa n’wina ni tiko la n’wina.+
6 Hi mhaka muni mi ni nkanu ku fana na Faru ni Vagibita?+ Nkama Xikwembu xi nga va khatisa+ va ze va tshika Vayisrayele va famba.+
7 Swoswi yendlani nyolo* ya nyuwani mi gama mi teka tihomu timbirhi leti nga ni swihon’wani, ta ku a ti se tshama ti kokisiwa nchumu* mi ti boha ka nyolo yoleyo, mi gama mi tlhelisa swihon’wani swa tona kaya. Swi nga fambi na tona.
8 Tekani Areka ya Yehovha mi yi veka henhla ka nyolo, mi gama mi teka kaxa mi peta minchumu ya woru leyi mi yi rhumelaka ka yena swaku yi va gandzelo la nandzu, mi yi veka tlhelweni ka areka.+ Se mi yi tshika yi famba
9 mi gama mi txuvuka swaku yi ta ya kwini. Loko yo khupuka hi ndlela ya ku ya Beti-Xemexi+ ku nga lomu areka yi taka hi kona, swi vula swaku hi yena a nga hi ba hi khombo leli lalikulu. Kambe loko yo famba hi ndlela yin’wani, swi vula swaku a hi yena a nga hi khatisa hi khombo leli; swi yo kotlana.”
10 Vavanuna volavo va yendle swoleswo. Va teke tihomu timbirhi leti a ti ni swihon’wani va ti boha ka nyolo, swihon’wani swa kona va gama va swi pfalela kaya.
11 Kutani va veka Areka ya Yehovha henhla ka nyolo ni kaxa leli nga ni swifaniso swa woru swa makondlo ni swifaniso swa ndhawu ya vona leyi nga pfimba.
12 Tihomu ti fambe hi ndlela leyi yaka Beti-Xemexi.+ Ti fambe hi ndlela yoleyo na ti rila; a ti zanga ti djika ti ya ka tlhelo la xinene kumbe ka tlhelo la ximatsi. Hi nkama wolowo tihosi hinkwatu ta Vafilista a ti ti landza hi ndzhaku anze ti ya fika lani Beti-Xemexi a sungulelaka kona.
13 Vanhu va Beti-Xemexi a va li ku tshoveleni ka trigu ka nkova. A nkama va nga vona Areka, va tsake hintamu.
14 Se nyolo yi fika yi nyima kusuhi ni ribye lalikulu leli li nga ka masimu ya Yoxuwa wa Mubeti-Xemexi. Kutani va pandzela nyolo va yi tshivela va gama va teka tihomu ta kona+ va yendlela Yehovha gandzelo la ku hisiwa.
15 Kutani Valevhi+ va xixa Areka ya Yehovha ni kaxa leli a li li tlhelweni ka yona, leli a li ni minchumu ya woru, va swi veka henhla ka ribye lalikulu. Hi siku lolelo vavanuna va Beti-Xemexi+ va yendlele Yehovha magandzelo ya ku hisiwa.
16 A nkama 5 wa tihosi ta Vafilista ti nga vona leswo, ti tlhelele Ekroni hi siku lolelo.
17 A swifaniso swa woru swa ndhawu leyi nga pfimba leswi Vafilista va nga swi rhumela swaku swi va gandzelo la nandzu ka Yehovha hi leswi:+ Xin’we xa Axidodi,+ xin’we xa Gaza, xin’we xa Axikeloni, xin’we xa Gati+ ni xin’we xa Ekroni.+
18 A numeru ya swifaniso swa makondlo swa woru a yi ringana ni numeru ya madoropa hinkwawu ya 5 wa tihosi ta Vafilista, ku nga madoropa lawa ma nga ni mimuru ya ku tiya ni swidoropani swaku a swi nga na mimuru.
Ribye lalikulu leli a va veke Areka ya Yehovha henhla ka lona ka masimu ya Yoxuwa wa Mubeti-Xemexi la ha li mboni ku ta fika ninamuntlha.
19 Kambe Xikwembu xi helisa vanhu va Beti-Xemexi hi mhaka ya leswi va nga txuvuka Areka ya Yehovha. Xi helise 50.070* wa vanhu, se vanhu va sungula ku rila hikusa Yehovha a a dlaye vanhu va vanyingi hintamu.+
20 Vavanuna va Beti-Xemexi va vutisa va ku: “I mani lweyi a nga swi kotaka ku nyima phambheni ka Yehovha Xikwembu lexi xa ku kwetsima?+ Loko a xo hi tshika xi ya ka van’wani.”+
21 Se va rhuma vanhu va ya ka vanhu lava tshamaka Kiriyati-Yerimi,+ va fika va ku: “Vafilista va vuyise Areka ya Yehovha. Tanani mi ta yi teka.”+
Tinhlamunselu ta le hansi
^ Kumbe: “n’qolo; kalichi”.
^ Kumbe: “paniwa”.
^ Hi Xiheberu: “70 wa vavanuna, 50.000 wa vavanuna”.
