Samuwele Wa Ku Sungula 7:1-17
7 Se vavanuna va le Kiriyati-Yerimi va fika va teka Areka ya Yehovha, va yi yisa ka munti wa Abinadabi+ lowu a wu li ka ganga, va gama va langa* n’wana wa yena Eliyazari swaku a hlayisa Areka ya Yehovha.
2 Ku hundze 20 wa malembe, ku sukela siku leli Areka yi nga yisiwa Kiriyati-Yerimi, se Vayisrayele hinkwavu va sungula ku lavetela* Yehovha.+
3 Samuwele a byela Vayisrayele hinkwavu a ku: “Loko ku li swaku mi tlhelela ka Yehovha hi timbilu ta n’wina hinkwatu,+ susani swikwembu swa matiko+ ni swifaniso swa Axitoreti+ xikarhi ka n’wina, mi tshembeka ka Yehovha hi ku helela,+ mi tirhela yena ntsena se a ta mi ponisa ka voko la Vafilista.”+
4 A nkama va nga twa leswo, Vayisrayele va susa swifaniso swa Bali ni swa Axitoreti se va tirhela Yehovha ntsena.+
5 Samuwele a gama a ku: “Hlengeletani Vayisrayele hinkwavu aMizpa+ swaku ni ta mi khongelela ka Yehovha.”+
6 Kutani hi siku lolelo va hlengeletana Mizpa, va gama va kha mati va ma chululela Yehovha, va tlhela va titsona swakudla.+ Va game va ku: “Hi djohele Yehovha.”+ Se Samuwele a sungula ku va muyavanyisi+ wa Vayisrayele aMizpa.
7 Nkama Vafilista va nga twa swaku Vayisrayele va hlengeletane Mizpa, tihosi ta Vafilista+ ti famba ti ya lwa na vona. Kutani a nkama Vayisrayele va nga twa swaku Vafilista va ta, va sungula ku va chava.
8 Se Vayisrayele va byela Samuwele va ku: “Tama u hi khongelela ka Yehovha Xikwembu xa hina swaku a hi pfuna+ a tlhela a hi ponisa ka mavoko ya Vafilista.”
9 Samuwele a teka xinyempfani lexa ha yan’waka a yendlela Yehovha gandzelo la ku hisiwa,+ a gama a kombela Yehovha swaku a pfuna Vayisrayele, kutani Yehovha a mu hlamula.+
10 Nkama Samuwele na a ha yendla gandzelo la ku hisiwa, Vafilista va ta va ta lwa ni Vayisrayele. Hi nkama wolowo Yehovha a yendla swaku ku va ni ku duma kakukulu+ ka tilo ka tlhelo la Vafilista, se Vafilista va chava va nga swi tivi swaku va ta yendla yini+ va gama va hluliwa hi Vayisrayele.+
11 Se vavanuna va Israyele va huma hi ku tsutsuma va suka Mizpa, va hlongolisa Vafilista va va dlayetela ku ya fika a sul* ka Beti-Kari.
12 Kutani Samuwele a teka ribye+ a li veka xikarhi ka Mizpa na Yexana, a li chula vito la Ebenezeri,* hikusa a a ku: “Yehovha a hi pfunile ku ta fikela swoswi.”+
13 Se Vafilista va hluliwa, a va ha tlhelanga va psanya tiko la Vayisrayele;+ voko la Yehovha li tama li lwa ni Vafilista masiku hinkwawu na Samuwele a ha hanya.+
14 Vafilista va tlhelisela Vayisrayele madoropa hinkwawu lawa a va va tekele wona ku sukela aEkroni ku ya Gati, Vayisrayele va tlhela va kuma tiko la vona leli a li tekiwe hi Vafilista.
Kutani Vayisrayele va tlhela va va ni ku rhula ni Vaamori.+
15 Samuwele a tama a yavanyisa Vayisrayele wutomi la yena hinkwalu.+
16 Lembe ni lembe a a rhendzelekela a ya ka madoropa ya Betele,+ Jiligali+ ni Mizpa+ a yavanyisa Vayisrayele ka tindhawu toleto hinkwatu.
17 Kambe a a gama a muka a ya Rama+ hikusa hi lani a a tshama kona; naswona a a yavanyisa Vayisrayele na a li kolanu. A yakele Yehovha altari kolanu.+
Tinhlamunselu ta le hansi
^ Hi Xiheberu: “kwetsimisa”.
^ Kumbe: “rilela”.
^ Kumbe: “dzongeni”.
^ Leswi vulaka “Ribye La Ku Pfuna”.
