Tihosi Ta Ku Sungula 10:1-29
10 Hosi ya xisati ya le Xeba yi twa ndhuma ya Solomoni ni leswaku ndhuma ya yena a yi yendla swaku vito la Yehovha li dzunisiwa,+ se yi ta swaku yi ta mu vutisa swivutiso swa ku karhata hintamu.+
2 Se yi fika Yerusalema ni vatirhi va yona ni varhangeli lava yi nga va veka+ ni makamela lawa a ma rhwale mafurha ya balsamu+ ni woru la linyingi hintamu ku patsa ni maribye ya lisima. Yi fika yi vutisa Solomoni hinkwaswu leswi a yi lava ku swi tiva.
3 Solomoni a yi hlamula swivutiso swa yona hinkwaswu. A xi kona xivutiso ni xa xin’we lexi hosi yi kalaka yi nga swi kotanga ku xi hlamula.
4 A nkama hosi ya xisati ya le Xeba yi nga vona swaku Solomoni+ a tlharihe hintamu yi tlhela yi vona ni yindlo leyi a nga yi yaka,+
5 yi vona ni swakudla leswi a swi vekiwa ka meza wa yena,+ leswi vatirhi va yena a va tshamisa xiswona ka meza, leswi lava a va phamela a va yambalisa xiswona va tlhela va tirhisa xiswona, lava a va mu chelela leswi a a swi nwa ni magandzelo ya ku hisiwa lawa a a ma yendla nkama ni nkama ka yindlo ya Yehovha, yi hlamale hintamu swinene.
6 Hosi ya xisati yi byela Solomoni yi ku: “Leswi ni nga swi twa ka tiko la mina hi mintirho ya wena ni leswi u nga tlharihisa xiswona i ntiyiso.
7 A ni swi kholwanga nkama va nga ni byela, kambe se na kholwa leswi ni nga tivonela hi noxe. Naswona leswi va nga ni byela i switsongo hintamu ka leswi ni nga swi vona. Wena u tlharihile u tlhela u ganya hintamu ku tlula leswi ni nga byeliwa swona.
8 Va katekile vanhu va wena, va katekile ni vatirhi va wena lava nyimaka phambheni ka wena nkama ni nkama va yingisela wutlharhi la wena!+
9 A ku dzunisiwe Yehovha Xikwembu xa wena,+ lweyi a nga ku rhandza a gama a ku veka ka xitshamu xa wuhosi xa Israyele. Hi mhaka ya lirhandzu la Yehovha la ku kala li nga heli, leli a nga na lona hi Vayisrayele, a ku vekile swaku u va hosi leswaku u va yavanyisa ni ku va fuma hi ndlela yayinene.”
10 Se hosi leyi ya xisati yi nyika Solomoni 4.104 wa makilu* ya woru ni mafurha ya balsamu ya manyingi hintamu swinene+ ni maribye ya lisima.+ A ka ha tlhelanga ku tisiwa mafurha ya manyingi ku fana ni lawa hosi ya xisati ya le Xeba yi nga ma nyika Hosi Solomoni.
11 Maboti ya Hirami lawa a ma rhwala woru la le Ofiri+ ma tlhele ma ta ni timhandzi ta tinyingi ta minsinya ya algama+ ni maribye ya lisima+ ya le Ofiri.
12 Hosi yi tirhise timhandzi ta nsinya wa algama swaku yi yendla swa ku tiyisa yindlo ya Yehovha ni yindlo ya wuhosi, ni swaku yi yendla tiharipa ni switende swa lava yimbelelaka.+ Timhandzi ta minsinya ya algama ta ku tshamisa leswi a ta ha tlhelanga ti tisiwa kumbe ku voniwa anze namuntlha.
13 Hosi Solomoni a nyike hosi ya xisati ya le Xeba hinkwaswu leswi yi nga swi navela ni leswi yi nga swi kombela, ku patsa ni leswi yi kalaka yi nga swi kombelanga hi mhaka ya leswi a a nga tsonani. Hosi leyi ya xisati yi game yi tlhela ni vatirhi va yona yi ya ka tiko la yona.+
14 Lembe ni lembe, Solomoni a va mu tisela woru la ku peza kolomuyani ka 23.000 wa makilu,*+
15 na ku nga kontiwi ni woru leli a li tisiwa hi vanhu lava a va fambafamba hi matiko va xavisa, ni rhesa* leli a li humesiwa hi vaxavisi ni tihosi hinkwatu ta Arabiya ni vagovhernadori va tiko.
16 Hosi Solomoni a yendla 200 wa swivhikelo swaswikulu hi ku tirhisa woru leli nga patsiwa ni nsimbi,+ (xivhikelo xin’wani ni xin’wani a xi yendliwe hi woru leli pezaka 7 wa makilu)*+
17 ni 300 wa swivhikelo swaswitsongo swi nga yendliwa hi woru leli nga patsiwa ni nsimbi, (xivhikelo xin’wani ni xin’wani a xi yendliwe hi woru leli a li peza makilu mambirhi).* Se hosi yi swi teka yi ya swi veka ka Yindlo ya Khwati la Lebanoni.+
18 Hosi yi tlhele yi yendla xitshamu xaxikulu xa wuhosi hi matinyu ya tindlopfu+ yi gama yi xi namarheta woru la lisima hintamu.+
19 A ku ni 6 wa swikada leswi a swi ya ka xitshamu xa wuhosi lexi a xi tshame hi ndlela leyi: Lani a a khigetela kona ka nhlana, a henhlanyana a ku ni nchumu xa redondu kasi ka matlhelo hamambirhi a ku ni swa ku khigetela mavoko ka swona. Ka tlhelo lin’wani ni lin’wani la leswi swa ku khigetela mavoko a ku ni xifaniso xa nghonyama.+
20 A ku vekiwe 12 wa swifaniso swa tinghonyama ahenhla ka 6 wa swikada; ka xikada xin’wani ni xin’wani a ku vekiwe xifaniso xa nghonyama hala ni hala amagamu ka xona. A ku nga na mfumu wun’wani lowu a wu yendle nchumu wa ku fana ni lowo.
21 Swibya hinkwaswu leswi Hosi Solomoni a a swi tirhisa swaku a phuza hi swona a swi yendliwe hi woru, ni swibya hinkwaswu leswi a swi li ka Yindlo ya Khwati la Lebanoni+ a swi yendliwe hi woru la ku tenga. A ku nga na xibya lexi a xi yendliwe hi prata, hikusa prata a li voniwa li nga li la nchumu ka nkama wa Solomoni.+
22 A Hosi a yi ni maboti ya le Tarxixi+ lawa a ma famba ni maboti ya Hirami. A maboti lawa ya Tarxixi a ma vuya kan’we loko se ku hele malembe manharhu. A ma vuya na ma ni woru, prata, matinyu ya tindlopfu,+ tihavu ni mapikoko.*
23 Hosi Solomoni a a tlharihile+ a tlhela a ganya+ ku tlula tihosi hinkwatu ta misava.
24 Vanhu va misava hinkwayu a va ta ka Solomoni swaku va ta twa wutlharhi la yena leli a a nyikiwe hi Xikwembu.+
25 Lembe ni lembe a va ta ni minchumu va ta mu nyika; a va mu nyika minchumu ya prata, ya woru, mpahla, matlharhi, mafurha ya balsamu, makavhalu ni timbongolo.*
26 Solomoni a tama a hlengeletela tinyolo* ni makavhalu;* a a li ni 1.400 wa tinyolo ni 12.000 wa makavhalu.*+ Swilo leswi a a swi veke ka doropa leli a a veka tinyolo, leli a li li kusuhi ni lomu a a tshama kona aYerusalema.+
27 A hosi yi yendle swaku a prata li tala hintamu aYerusalema ku fana ni maribye, ni timhandzi ta minsinya ya mikedari na tona a ti li tinyingi swinene ku fana ni minsinya ya makuwa leyi nga Xefela.+
28 Solomoni a a xava makavhalu aGibita, vaxavisi lava a va mu tirhela a va xava makavhalu na ma li manyingi* hi male leyi a yi pimiwile.+
29 A Gibita, nyolo yin’we a yi xaviwa hi 600 wa swikhemu swa prata, kasi kavhalu a li xaviwa hi 150 wa swikhemu swa prata; se vona a va xavisela tihosi hinkwatu ta Vaheti+ ni tihosi ta Siriya.
Tinhlamunselu ta le hansi
^ Hi Xiheberu: “120 wa titalenta”. Vona Xiyengetelo B14.
^ Kumbe: “666 wa titalenta”. Vona Xiyengetelo B14.
^ Kumbe: “impoxtu; tinemba”.
^ Hi Xiheberu: “600 wa tixikele”. Vona Xiyengetelo B14.
^ Hi Xiheberu: “timina tinharhu.” Ka matsalwa ya Xiheberu, mina yin’we a yi peza 570 wa magrama. Vona Xiyengetelo B14.
^ Kumbe: “ma pavão.” Ku nga swiharhi swa ku saseka swa tikorikori swa ku ringana ni maperu.
^ Kumbe: “mula.” Ku nga n’wana wa mbongolo ni kavhalu.
^ Kumbe: “tin’qolo; makalichi”.
^ Kumbe: “vanhu lava a va fambisa makavhalu.”
^ Kumbe: “vanhu lava a va fambisa makavhalu.”
^ Kumbexana: “aGibita ni Kuwe”. Vaxavisi lava a va tirhela hosi a va ma xava aKuwe. Swi nga yendleka ku vulavuliwa hi Kilikiya.
