Tihosi Ta Ku Sungula 12:1-33
12 Robuwamu a ye Xikemi, hikusa vanhu hinkwavu va Israyele a va ye Xikemi+ swaku va ya mu yendla hosi.+
2 Nkama Yerobuwamu n’wana wa Nebati a nga twa mhaka leyi (a a li Gibita hikusa a a balekile hi mhaka ya ku chava Hosi Solomoni naswona a a tshama Gibita),+
3 va rhume vanhu swaku va ya mu vitana. Se Yerobuwamu ni xitshungu hinkwaxu xa Israyele va ya ka Robuwamu va fika va ku:
4 “Papayi wa wena a hi tikisele wutomi.+ Kambe loko wo hi twela wusiwana u hi vevukisela ndzhwalu lowu papayi wa wena a nga hi rhwexa wona, hi ta va vatirhi va wena.”
5 A va hlamula a ku: “Fambani, mi ta tlhela mi vuya na se ku hundze masiku manharhu.” Va gama va famba.+
6 Hosi Robuwamu a gama a vutisa madoda lawa a ma tirhela papayi wa yena Solomoni nkama na a ha hanya, a ku: “Mu yi vonisa ku yini mhaka leyi? Ni nga va hlamula ni ku yini vanhu lava?”
7 Va mu hlamula va ku: “Loko namuntlha wo tirhela vanhu lava, u va yendlela leswi va swi kombelaka u tlhela u va hlamula kahle, va ta tshama va li vatirhi va wena.”
8 Kambe a tshike leswi madoda ma nga mu byela swona, a ya vutisa madjaha lawa a nga kula na wona, lawa se a ma mu tirhela.+
9 A ma vutisa a ku: “Ni nga va hlamulisa ku yini vanhu lava, lava nga ni kombela va ku: ‘Hi vevukiseli ndzhwalu lowu papayi wa wena a nga hi rhwexa wona’?”
10 Kutani madjaha lawa ma nga kula na yena ma mu hlamula ma ku: “U ta byela vanhu lava nga ku kombela va ku: ‘Papayi wa wena a a hi tikisela wutomi, hi kombela u hi vevukisela’, u ku: ‘Ni ta mi tikisela hintamu ku tlula leswi papayi wa mina a nga mi tikiselisa* swona.
11 Papayi a mi rhwexe ndzhwalu wa ku tika, kambe mina ni ta wu yengesela. Papayi a a mi ba hi tinhonga* tinene, kambe mina ni ta mi ba hi tinhonga ta mimintwa.’”
12 Yerobuwamu ni vanhu hinkwavu va tlhela va ya ka Robuwamu hi siku la wunharhu, hi ku landza leswi a nga va byela swona a ku: “Vuyani ka mina hi siku la wunharhu.”+
13 Kambe hosi a yi swi yendlanga leswi yi nga byeliwa hi madoda; a yi va hlamulanga kahle vanhu.
14 Yi yendle leswi yi nga byeliwa hi madjaha lawa yi nga kula na wona, yi ku: “Papayi a mi rhwexe ndzhwalu wa ku tika, kambe mina ni ta wu yengesela. Papayi a a mi ba hi tinhonga* tinene kambe mina ni ta mi ba hi tinhonga ta mimintwa.”
15 Hosi a yi va yingisanga vanhu; leswi swi yendleke hi mhaka ya Yehovha,+ swaku ku ta yendleka leswi yena Yehovha a nga swi byela Yerobuwamu n’wana wa Nebati hi ku tirhisa Ahiya+ wa le Xilo.
16 Loko Vayisrayele hinkwavu va vona swaku hosi a yi va yingisanga, va yi hlamula va ku: “Davhida n’wana wa Yese a hi hosi ya hina. Se n’wina Vayisrayele hinkwenu, tlhelelani ka swikwembu swa n’wina! Kutani wena Davhida, sala ni mfumu wa wena!” Vayisrayele va gama va muka.+
17 Kambe Robuwamu a tame a fuma Vayisrayele lava a va tshama ka madoropa ya Yuda.+
18 Se Hosi Robuwamu a rhuma Adorami,+ lweyi a a vonelela swikarawa, swaku a ya ka Vayisrayele kambe Vayisrayele hinkwavu va mu ba hi maribye, a za a fa. Hosi Robuwamu a vhela a famba hi nyolo* ya yena a baleka a ya Yerusalema.+
19 Ku sukela ka nkama wolowo, Vayisrayele va terekele+ mfumu wa Davhida anze namuntlha.
20 Nkama Vayisrayele hinkwavu va nga twa swaku Yerobuwamu a vuyile, va mu vitana lani a va tlhangane kona, va fika va mu veka a va hosi ka tiko hinkwalu la Israyele.+ A nga kona a nga seketela mfumu wa Davhida, ko va lixaka la Yuda ntsena.+
21 Nkama Robuwamu a nga fika Yerusalema, a tekele ku hlengeleta 180.000 wa masonchwa ka lixaka la ka Yuda ni la ka Benjamini, lawa ma swi kotaka kahle ku lwa nyimpi, se ma tilulamisela swaku ma ya lwa ni Vayisrayele swaku a mfumu wu ta tlhelela ka Robuwamu n’wana wa Solomoni.+
22 Kutani Xikwembu xa ntiyiso xi byela mutirhi wa xona Xemaya,+ xi ku:
23 “Famba u ya byela Robuwamu n’wana wa Solomoni hosi ya Yuda ni lixaka hinkwalu la Yuda ni la ka Benjamini ni vanhu hinkwavu u ku:
24 ‘Yehovha a li: “Mi nga yi mi ya lwa ni vamakwenu va n’wina Vayisrayele. Hinkwenu mukani kaya, hikusa leswi nga yendleka i ku rhandza ka mina.”’”+ Se hinkwavu va yingisa Yehovha, va muka hi ku ya hi leswi Yehovha a nga va byela swona.
25 Kutani Yerobuwamu a yaka* doropa la Xikemi+ leli a li li ka ndhawu ya tintshava ya Efrayimi a tshama kona, a gama a suka kolanu a ya yaka* doropa la Penuwele.+
26 Yerobuwamu a sungula ku pimisa a ku: “Swoswi a mfumu wu ta tlhelela ka ndjangu wa ka Davhida.+
27 Loko vanhu lava va tshamela ku ya ka yindlo ya Yehovha aYerusalema+ swaku va ya yendla magandzelo, timbilu ta vona ti nga tshuka ti tlhelela ka hosi ya vona, ku nga Hosi Robuwamu lweyi a fumaka Yuda. Se va ta gama va ni dlaya va tlhelela ka Hosi Robuwamu wa le Yuda.”
28 Loko hosi se yi vutisise kahle mhaka leyi, yi yendle swihon’wani swimbirhi swa woru,+ yi gama yi byela vanhu yi ku: “Ni vona swaku swa mi karhatela ku ya Yerusalema. Hi lexi Xikwembu xa wena, wena Israyele, lexi xi nga ku humesa ka tiko la Gibita.”+
29 Kutani a teka xin’we a xi veka aBetele+ lexin’wani a xi veka Dani.+
30 Leswi swi yendle swaku vanhu va djoha,+ naswona vanhu a va tlhela va ya ni ka xihon’wani lexi a xi li Dani va ya xi gandzela.
31 A yake tiyindlo ka tindhawu ta ku tlakuka swaku va gandzela ka tona, a tlhela a veka vanhu lava a va nga li Valevhi swaku va va vaprista.+
32 Yerobuwamu a tlhele a hamba fexta hi siku la wu 15 ka wheti ya wu 8; fexta leli a a li hamba a li fana ni leli a li yendliwa aYuda.+ A yendle magandzelo ka altari leyi a nga yi yaka aBetele+ a yendlela swifaniso swa swihon’wani leswi a nga swi yendla, a tlhela a veka vanhu swaku va va vaprista ka tindhawu leti ta ku tlakuka leti a a ti yake aBetele.
33 Hi siku la wu 15 ka wheti ya wu 8, ku nga wheti leyi a a tilangele yona, a sungule ku yendla magandzelo ka altari leyi a nga yi yaka aBetele; a tlhele a hambela Vayisrayele fexta ni ku yendla magandzelo ka altari ni ku tuvikisa ximusi.
Tinhlamunselu ta le hansi
^ Hi Xiheberu: “xintiwhana xa mina xi ta va xikulu ku tlula masenge ya papayi”.
^ Kumbe: “timpsika; minkhavi”.
^ Kumbe: “timpsika; minkhavi”.
^ Kumbe: “n’qolo; kalichi”.
^ Kumbe: “pfuxeta”.
^ Kumbe: “pfuxeta”.
