Tihosi Ta Ku Sungula 13:1-34
13 Na Yerobuwamu wa ha nyime ka altari+ swaku a yendla gandzelo, ku fika munhu lweyi a nga rhumiwa hi Xikwembu+ na a suka hi Yuda a ta Betele hi ku landza leswi a nga byeliwa hi Yehovha.
2 A fike a byela altari leswi Yehovha a nga mu rhuma swona, a huwelela a ku: “Altari, altari! Yehovha a li: ‘Ka ndjangu wa Davhida ku ta psaliwa n’wana lweyi a nga ta chuliwa vito la Yosiya!+ A ta yendla magandzelo ahenhla ka wena hi vaprista va tindhawu ta ku tlakuka, lava yendlaka magandzelo ahenhla ka wena, naswona a ta hisa marhambu ya vanhu ahenhla ka wena.’”+
3 A yendle singita hi siku lolelo, a ku: “Leli i singita leli Yehovha a nga li hlaya: Altari yi ta pandzeka hi le xikarhi ni nkuma* lowu nga henhla ka yona wu ta hangalaseliwa.”
4 Hi ku hantlisa loko hosi yi twa leswi mutirheli wa Xikwembu xa ntiyiso a nga swi byela altari leyi nga Betele, Yerobuwamu a tshandzavuta voko la yena na a li ka altari a kombeta wanuna lwiyani, a ku: “Mu khomeni!”+ Hi ku hantlisa voko leli a nga li tshandzavuta li woma, a nga ha swi koti ku li tlhelisa ndzhaku.+
5 Se altari yi pandzeka hi le xikarhi a nkuma wu halaka ka altari, hi ku landza singita leli mutirheli wa Xikwembu xa ntiyiso a nga li yendla na a yingisa leswi Yehovha a nga mu byela swona.
6 Kutani hosi yi byela mutirheli wa Xikwembu xa ntiyiso yi ku: “Ni kombela u ni kombelela ka Yehovha Xikwembu xa wena hi ku tiveka hansi swaku a ni twela wusiwana, u tlhela u ni khongelela swaku voko la mina li wololoka.”+ Mutirheli wa Xikwembu xa ntiyiso hi ku tiveka hansi, a kombela Yehovha swaku a mu twela wusiwana li gama voko la hosi li wololoka.
7 A hosi yi gama yi byela mutirheli wa Xikwembu xa ntiyiso yi ku: “A hi muke xikan’we u ya dla swakudla, ni ta gama ni ku nyika nchumu.”
8 Kambe mutirheli wa Xikwembu xa ntiyiso a hlamula hosi a ku: “Hambi a wo ni nyika hafu ya yindlo ya wena, a ni nga ta famba na wena ni ya dla pawu kumbe ni phuza mati ka ndhawu leyi.
9 Hikusa Yehovha a ni byele a ku: ‘U nga tshuki u dla pawu kumbe u phuza mati naswona u nga tshuki u muka hi ndlela leyi u nga ta hi yona.’”
10 A gama a tlhela hi ndlela yin’wani, a nga mukanga hi ndlela leyi a nga ta hi yona aBetele.
11 A ku ni muprofeta mun’wani wa ku guga lweyi a a tshama aBetele, vana va yena va fike va mu byela hinkwaswu leswi mutirheli wa Xikwembu xa ntiyiso a nga swi yendla hi siku lolelo aBetele ni leswi a nga swi byela hosi. Nkama va nga gama ku mu byela hinkwaswu papayi wa vona,
12 a gama a va vutisa, a ku: “A fambe hi kwini?” Se vana va yena va mu komba swaku mutirheli wa Xikwembu xa ntiyiso wa le Yuda a fambe hi kwini.
13 A gama a byela vana va yena a ku: “Ni lulamiseleni mbongolo.” Va gama va yi lulamisa, se a famba hi yona.
14 A landza mutirheli wa Xikwembu xa ntiyiso hi le ndzhaku, a fika a mu kuma na a tshame hansi ka nsinya wawukulu, a gama a mu vutisa a ku: “Hi wena mutirheli wa Xikwembu xa ntiyiso lweyi a taka hi Yuda?”+ Yena a mu hlamula a ku: “Hi mina.”
15 A mu byela a ku: “A hi fambi kaya ka mina u ya dla pawu.”
16 Kambe yena a ku: “A ni nge fambi na wena naswona a ni nge dli pawu kumbe ku phuza mati na wena ka ndhawu leyi.
17 Hikusa Yehovha a te: ‘U nga tshuki u dla pawu kumbe u phuza mati ka ndhawu leyi. U nga tshuki u muka hi ndlela leyi u nga ta hi yona.’”
18 Kambe yena a ku: “Na mina ni muprofeta ku fana na wena, naswona ntsumi leyi nga rhumiwa hi Yehovha yi ni byele yi ku: ‘Vuya na yena kaya ka wena swaku a ta dla pawu ni ku phuza mati.’” (Kambe a wo mu kanganyisa.)
19 Se a tlhela na yena swaku a ya dla pawu ni ku phuza mati akaya ka yena.
20 Na va ha tshame mezeni, rito la Yehovha li fika ka muprofeta lweyi a nga mu tlhelisa,
21 a gama a vulavulela henhla a byela mutirheli wa Xikwembu xa ntiyiso lweyi a taka hi Yuda, a ku, “Yehovha a li: ‘Leswi u kalaka u nga wu yingisanga nawu wa mina Yehovha, naswona u kalaka u nga swi yingisanga leswi mina Yehovha Xikwembu xa wena ni nga ku byela swona,
22 kambe u nga tlhela u ya dla pawu ni ku phuza mati ka ndhawu leyi u nga byeliwa swaku: “U nga tshuki u dla pawu kumbe u phuza mati ka yona,” ntsumbu wa wena a wu nga ta lahliwa lani vavhovho va wena va nga lahliwa kona.’”+
23 A nkama mutirheli wa Xikwembu xa ntiyiso a nga gama ku dla pawu ni ku phuza mati, muprofeta lweyi wa ku guga a mu lulamisela mbongolo.
24 A gama mutirheli wa Xikwembu a tifambela, kambe ku ta nghonyama nkama na a li ndleleni yi fika yi mu dlaya.+ Ntsumbu wa yena wu wela ndleleni, mbongolo ni nghonyama, a swi nyime tlhelweni ka ntsumbu wa yena.
25 A ku li ni vavanuna lava a va hundza, lava nga vona ntsumbu lowu nga wa ka ndlela ni nghonyama na yi nyime tlhelweni ka wona. Va fike va vulavula hi leswi va nga swi vona ka doropa leli muprofeta lweyi wa ku guga a a tshama ka lona.
26 Nkama muprofeta lweyi a nga mu tlhelisa ndleleni a nga swi twa, a vhela a ku: “Lweyo i mutirheli wa Xikwembu xa ntiyiso lweyi a kalaka a nga wu yingisanga nawu wa Yehovha;+ hi mhaka leyo Yehovha a mu nyikele ka nghonyama swaku yi mu phatlulela yi tlhela yi mu dlaya, swaku ku yendleka leswi Yehovha a nga mu byela swona.”+
27 Se a byela vana va yena, a ku: “Ni lulamiseleni mbongolo.” Va gama va mu lulamisela yona.
28 Se a famba a fika a kuma ntsumbu na wu wile ka ndlela, mbongolo ni nghonyama na swi nyime tlhelweni ka wona. Nghonyama a yi zanga yi wu dla ntsumbu lowuyani kumbe ku phatlulela mbongolo.
29 Kutani muprofeta a tlakula ntsumbu wa mutirheli wa Xikwembu xa ntiyiso a wu tlhateka henhla ka mbongolo, a tlhela na wona ka doropa swaku a ta mu rila a tlhela a mu lahla.
30 A gama a ya wu lahla ka sirha la yena, a tama a mu rila, na a ku: “Yoo makwerhu!”
31 Nkama a nga gama ku mu lahla, a byela vana va yena, a ku: “Loko ni fa ni lahleni lani mutirheli wa Xikwembu xa ntiyiso a nga lahliwa kona. Mi veka marhambu ya mina atlhelweni ka marhambu ya yena.+
32 Leswi Yehovha a nga rhuma wanuna lwiyani swaku a ya swi byela altari leyi nga Betele ni tiyindlo hinkwatu leti ku gandzeliwaka ka tona ka tindhawu ta ku tlakuka+ leti nga ka madoropa ya Samariya swi ta yendleka.”+
33 Hambiloko swilo leswi hinkwaswu swi yendlekile, Yerobuwamu a nga tshikanga ku yendla swa ku biha. A tame a veka vanhu lava a swi nga va faneli swaku va va vaprista ka tindhawu ta ku tlakuka leti a ku gandzeliwa ka tona.+ Mun’wani ni mun’wani lweyi a a navela ku va muprista, a a mu veka swaku a va muprista, a ku: “A a ve mun’we wa vaprista ka tindhawu ta ku tlakuka.”+
34 Xidjoho lexi xa ndjangu wa Yerobuwamu+ xi yendle leswaku ndjangu wa yena wu helisiwa.+
Tinhlamunselu ta le hansi
^ Kumbe: “nkuma wa mafurha”. Ku nga nkuma lowu wu nga ni mafurha ya magandzelo.
