Tihosi Ta Ku Sungula 14:1-31
14 Hi nkama wolowo Abiya n’wana wa Yerobuwamu a sungula ku vabya.
2 Se Yerobuwamu a byela nsati wa yena a ku: “Ni kombela u yendla swaku va nga swi tivi swaku u nsati wa mina, u famba u ya Xilo. Muprofeta Ahiya a tshama koseniyani. Hi yena a nga hlaya swaku ni ta va hosi ya vanhu lava.+
3 Famba ni 10 wa mapawu, mabolu ni ximbitana xa wulombe. Se yena a ta ku byela leswi nga ta yendleka hi mufana lweyi.”
4 Nsati wa Yerobuwamu a yendla leswi a nga byeliwa swona. Se a ya Xilo+ akaya ka Ahiya. Ahiya a a nga ha voni hikusa se a a gugile.
5 Kambe Yehovha a byela Ahiya a ku: “Nsati wa Yerobuwamu a le ku teni a ta ku vutisa swaku ku ta yendleka yini hi n’wana wa yena lweyi a vabyaka. Se ni ta ku byela leswi u faneleke u mu hlamula swona. Kambe loko a fika a ta yendla swaku u nga mu tsumbuli swaku hi yena.”
6 A nkama Ahiya a nga twa swaku ku ni munhu a taka, a te: “Nghena nsati wa Yerobuwamu. Hi mhaka muni u yendla swaku vanhu va nga ku tivi? Ni rhumiwile swaku ni ta ku byela mahungu ya ku vava hintamu.
7 Famba u ya byela Yerobuwamu u ku: ‘Yehovha Xikwembu xa Israyele a te: “Ni ku langile axikarhi ka vanhu swaku u va murhangeli wa vanhu va mina, ku nga Vayisrayele.+
8 Ni handzule mfumu ni wu susa ka ndjangu wa Davhida ni ku nyika wona.+ Kambe wena a wu fananga ni mutirheli wa mina Davhida, lweyi a nga yingisa minawu ya mina, a ni landzela hi mbilu ya yena hinkwayu a tlhela a ni yendlela swaswinene ntsena.+
9 Kambe wena u yendle swa ku biha ku tlula tihosi hinkwatu leti nga tshama ti va kona na wena u nga se va hosi. U tiyendlele xikwembu xin’wani ni swifaniso swa ku yendliwa hi nsimbi swaku u ni kwatisa+ naswona u ni tshikile.+
10 Hi mhaka leyo ni ta tisa khombo ka vatukulu va wena, ni ta helisa vavanuna hinkwavu, ku patsa ni lweyi a kalaka a nga na wa ku mu pfuna ni lweyi a kalaka a nga pfuni nchumu aIsrayele; ni ta kukula yindlo ya wena yi basa,+ ku fana ni munhu lweyi a kukulaka chaka* ku sala ku nga ha na nchumu!
11 Mun’wani ni mun’wani wa ndjangu wa wena Yerobuwamu lweyi a nga ta fa ka doropa a ta dliwa hi timbyana; lweyi a nga ta fela anhoveni a ta dliwa hi swinyanyani, hikusa Yehovha a swi hlayile.”’
12 “Swoswi muka kaya. A nkama u nga ta fika ka doropa a n’wana a ta fa.
13 Tiko hinkwalu la Israyele li ta mu rila li tlhela li mu lahla hikusa hi yena ntsena ka ndjangu wa Yerobuwamu lweyi a nga ta lahliwa ka sirha, hi mhaka ya leswi ku nga yena ntsena lweyi Yehovha Xikwembu xa Israyele a nga kuma minchumu yayinene ka mbilu ya yena ka ndjangu wa Yerobuwamu.
14 Ku sukela hi siku lolelo Yehovha a ta tilangela hosi aIsrayele leyi nga ta helisa va ndjangu wa Yerobuwamu,+ phela hambi swoswi leswo se swa yendleka.
15 Yehovha a ta helisa Vayisrayele ku fana ni lihlanga leli tsekatsekaka ka mati, a ta tsuvula Israyele ka tiko leli lalinene, leli a nga li nyika vavhovho va vona,+ a ta va hangalasela ka tlhelo lelin’wani la Nambu wa Ewufrata,+ hikusa va tiyendlele timhandzi ta Axera,*+ va kwatisa Yehovha.
16 Naswona a ta tshika Vayisrayele hi mhaka ya swidjoho leswi Yerobuwamu a nga swi yendla ni leswi a nga djohisa Israyele hi swona.”+
17 Nsati wa Yerobuwamu a gama a suka a famba a tlhelela Tiraza. A nkama a nga fika ka xipfalu xa yindlo ya yena, a n’wana a fa.
18 Se va mu lahla, tiko hinkwalu la Israyele li mu rila, hi ku ya hi leswi Yehovha a nga swi hlaya hi ku tirhisa mutirheli wa yena muprofeta Ahiya.
19 Timhaka hinkwatu ta wutomi la Yerobuwamu, leswi a nga lwisa xiswona tinyimpi+ ta yena ni mafumela ya yena, swi tsaliwile ka buku leli vulavulaka hi wutomi la tihosi ta Israyele.
20 Yerobuwamu a fume 22 wa malembe, a gama a fa, a lahliwa lani ku nga lahliwa vavhovho va yena;+ se n’wana wa yena Nadabi a sungula ku fuma.+
21 Hi nkama wolowo, Robuwamu n’wana wa Solomoni a a li hosi aYuda. Robuwamu a a ni 41 wa malembe nkama a nga va hosi naswona a fume 17 wa malembe aYerusalema, doropa leli Yehovha a nga li langa+ ka tinxaka hinkwatu ta Israyele swaku a veka vito la yena kona.+ Vito la mamani wa Robuwamu a ku li Nama wa Muamoni.+
22 Vanhu lava a va tshama Yuda va yendlele Yehovha swa ku biha+ va tlhela va mu kwatisa hintamu ku tlula vavhovho va vona hi mhaka ya swidjoho leswi va nga swi yendla.+
23 Na vona va tiyakele tindhawu ta ku tlakuka, mapilari ni timhandzi ta Axera*+ ka maganga hinkwawu ya ku tlakuka+ ni hansi ka minsinya hinkwayu yayikulu.+
24 Naswona a ku ni vavanuna lava a va yendla wunghwavani ka titempele leti a va gandzela ka tona atikweni.+ Vanhu hinkwavu a va yendla minchumu hinkwayu ya ku nyenyentsa ku fana ni matiko lawa Yehovha a nga ma hlongola phambheni ka Vayisrayele.
25 Hi lembe la wu 5 la ku fuma ka Hosi Robuwamu, Xixaki+ hosi ya Gibita a hlasele doropa la Yerusalema.+
26 A teke tshomba leli a li li ka yindlo ya Yehovha ni ka yindlo ya wuhosi,+ a tlhela a teka swilo hinkwaswu ku patsa ni swivhikelo hinkwaswu swa woru leswi Solomoni a nga swi yendla.+
27 Se Hosi Robuwamu a yendla swivhikelo swa kobre swaku a pfaleta leswi nga tekiwa, a swi nyika varhangeli va vagwardu lava vonelelaka nyanghwa wa yindlo ya hosi.
28 Nkama ni nkama loko hosi yi ta ka yindlo ya Yehovha, vagwardu a va swi tlakula, loko va gama a va swi tlhelisa ka yindlo ya vona.
29 Timhaka hinkwatu ta wutomi la Robuwamu ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Yuda.+
30 Robuwamu na Yerobuwamu+ a va tshamela ku lwa.
31 Hi ku famba ka nkama Robuwamu a fa a gama a lahliwa lani ku nga lahliwa vavhovho va yena ka Doropa la Davhida.+ Vito la mamani wa yena a ku li Nama wa Muamoni.+ Se Abiyami*+ n’wana wa yena a vekiwa ku va hosi.
Tinhlamunselu ta le hansi
^ Kumbe: “chaka la swiharhi”.
^ Vona Ntlhamuselo.
^ Vona Ntlhamuselo.
^ Vito lin’wani la yena a ku li Abiya.