Tihosi Ta Ku Sungula 15:1-34
15 Hi lembe la wu 18 la ku fuma ka Hosi Yerobuwamu+ n’wana wa Nebati, Abiyami a sungule ku fuma aYuda.+
2 A fume malembe manharhu aYerusalema. Vito la mamani wa yena a ku li Maka,+ ntukulu wa Absalomu.
3 Abiyami a tame a yendla swidjoho hinkwaswu leswi papayi wa yena a nga swi yendla na yena a nga se va hosi, naswona a nga tinyiketelanga ka Yehovha Xikwembu xa yena hi mbilu ya yena hinkwayu, ku fana ni leswi Davhida vhovho wa yena a nga tinyiketelisa swona.
4 Kambe hi mhaka ya Davhida,+ Yehovha Xikwembu xa yena a yendle swaku n’wana wa Abiyami a tama a fuma* aYerusalema+ hi ku mu nyika wuhosi n’wana wa yena ni ku hlayisa doropa la Yerusalema li tshama na li li kona.
5 Hikusa Davhida a yendlele Yehovha minchumu yayinene, naswona a yingise hinkwaswu leswi a nga mu byela swona ka wutomi la yena hinkwalu, a yo kala a nga yingisanga ntsena ka mhaka ya Uriya lweyi wa Muheti.+
6 Robuwamu na Yerobuwamu va tshamele ku lwa wutomi la vona hinkwalu.+
7 Timhaka hinkwatu ta wutomi la Abiyami ni hinkwaswu leswi a nga swi yendla, swi tsaliwile ka buku leyi vulavulaka hi wutomi la tihosi ta Yuda.+ Naswona ku ve ni nyimpi axikarhi ka Abiyami na Yerobuwamu.+
8 Kutani Abiyami a fa a lahliwa lani vavhovho va yena va nga lahilwa kona ka Doropa la Davhida; se Asa+ n’wana wa yena a va hosi.+
9 Hi lembe la wu 20 la ku fuma ka Hosi Yerobuwamu wa le Israyele, Asa a sungula ku fuma aYuda.
10 A fume 41 wa malembe aYerusalema. Vito la vhovho wa yena wa xisati a ku li Maka+ ntukulu wa Absalomu.
11 Asa a yendlele Yehovha+ minchumu yayinene, ku fana na Davhida vhovho wa yena.
12 A hlongole vavanuna lava a va yendla wunghwavani ka tindhawu leti a ku gandzeliwa ka tona atikweni+ a tlhela a susa swifaniso hinkwaswu swa ku nyenyentsa* leswi a swi yendliwe hi vavhovho va yena.+
13 A suse hambi vhovho wa yena Maka+ ka xitulu xa ku va mamani wa hosi, hikusa a a yendle xifaniso xa ku nyenyentsa xa mhandzi ya Axera* swaku xi gandzeliwa. Asa a tseme xifaniso xolexo xa ku nyenyentsa+ a xi hisa ka Nkova wa Kedroni.+
14 Kambe tindhawu ta ku tlakuka leti a ku gandzeliwa ka tona a ti susiwanga.+ Hambileswo, ka wutomi la yena hinkwalu Asa a tinyiketele ka Yehovha hi mbilu ya yena hinkwayu.
15 Se va teka minchumu leyi yena ni papayi wa yena va nga yi nyikela ka Xikwembu, ku nga prata, woru ni swibya swa ku hambanahambana, va yi nghenisa ka yindlo ya Yehovha.+
16 Asa na Baxa+ hosi ya Israyele a va tshamela ku lwa.
17 Kutani Baxa hosi ya Israyele a ta swaku a ta lwa na Yuda, a tlhela a sungula ku yaka* doropa la Rama+ swaku ku nga vi na munhu lweyi a humaka kumbe ku nghena ka ndhawu leyi Asa hosi ya Yuda a a fuma ka yona.+
18 Nkama Asa a nga vona leswo, a teka prata hinkwalu ni woru leli a li sale ka ndhawu ya ku hlayisa tshomba ka yindlo ya Yehovha ni ka yindlo ya wuhosi, a swi nyika vatirhi va yena. Se Hosi Asa a va rhuma ka Benadadi n’wana wa Tabrimu, n’wana wa Eziyoni, hosi ya Siriya+ lweyi a a tshama Damaxka, a ku:
19 “Mina na wena hi yendle ntwananu, papayi wa mina ni papayi wa wena va yendle ntwananu. Kutani ni ku rhumela prata ni woru swaku va ta ku nyika. Tani u ta helisa ntwananu wa wena na Baxa hosi ya Israyele, swaku a ta suka ka ndhawu ya mina.”
20 Benadadi a yingisa Hosi Asa, a rhuma varhangeli va masonchwa ya yena swaku va ya hlasela madoropa ya Israyele, se vona va famba va ya hlasela doropa la Ijoni,+ Dani,+ Abel-Beti-Maka, doropa hinkwalu la Kinereti ku patsa ni tiko hinkwalu la Naftali.
21 A nkama Baxa a nga twa leswo, a vhela a tshika ku yaka doropa la Rama se a tama a tshama aTiraza.+
22 Hosi Asa a gama a vitana tiko hinkwalu la Yuda, va ya rhwala maribye ni timhandzi aRama leswi Baxa a a yaka hi swona. Hosi Asa a tirhise swona swaku a yaka doropa la Jeba+ wa le Benjamini ni Mizpa.+
23 Loko ku li timhaka hinkwatu ta wutomi la Asa ni mintirho ya yena ni hinkwaswu leswi a nga swi yendla ku patsa ni madoropa lawa a nga ma yaka, swi tsaliwile ka buku leli vulavulaka hi wutomi la tihosi ta Yuda. Kambe nkama Asa a nga guga a ve ni mavabyi ya minenge.+
24 Asa a gama a fa, a lahliwa lani vavhovho va yena va nga lahliwa kona ka Doropa la Davhida vhovho wa yena; se Yehoxafati+ n’wana wa yena a va hosi.
25 Nadabi+ n’wana wa Yerobuwamu a ve hosi ya Israyele hi lembe la wumbirhi la ku fuma ka Asa hosi ya Yuda; a fume aIsrayele malembe mambirhi.
26 A a tshamela ku yendlela Yehovha swa ku biha naswona a a landzela xikombiso xa ku biha xa papayi wa yena a tlhela a yendla swidjoho swoleswi swa swin’we leswi papayi wa yena+ a nga djohisa Israyele hi swona.+
27 Baxa n’wana wa Ahiya wa lixaka la Isakara a mu yendlela planu,* a gama a mu dlaya aJibetoni ku nga doropa leli a li lumba Vafilista. Leswi swi yendleke hi nkama lowu Nadabi ni tiko hinkwalu la Israyele a va nyime ka matlhelo hinkwawu ya doropa la Jibetoni+ swaku va li hlasela.
28 Baxa a mu dlaye hi lembe la wunharhu la ku fuma ka Asa hosi ya Yuda, kutani a sungula ku fuma.
29 A nkama a nga sungula ku fuma, a tekele ku dlaya ndjangu hinkwawu wa Yerobuwamu. A nga siyanga munhu wa ndjangu wa Yerobuwamu; a va dlaye hinkwavu hi ku ya hi leswi Yehovha a nga swi hlaya hi ku tirhisa mutirheli wa yena Ahiya wa le Xilo.+
30 Leswi swi yendleke hi mhaka ya swidjoho leswi Yerobuwamu a nga swi yendla ni hi mhaka ya leswi a nga va djohisisa swona Vayisrayele, ni hi leswi a nga mu kwatisa hintamu Yehovha Xikwembu xa Israyele.
31 Timhaka hinkwatu ta wutomi la Nadabi ni hinkwaswu leswi a nga swi yendla, swi tsaliwile ka buku leyi vulavulaka hi wutomi la tihosi ta Israyele.
32 Asa na Baxa hosi ya Israyele a va tshamela ku lwa.+
33 Hi lembe la wunharhu la ku fuma ka Asa hosi ya Yuda, Baxa n’wana wa Ahiya a ve hosi ya tiko hinkwalu la Israyele na a tshama Tiraza; a fume 24 wa malembe.+
34 Kambe a a tshamela ku yendlela Yehovha+ swa ku biha naswona a tekelele xikombiso xa Yerobuwamu ni swidjoho swa yena leswi a nga djohisa Vayisrayele hi swona.+
Tinhlamunselu ta le hansi
^ Hi Xiheberu: “a mu nyike livoni”.
^ Rito la Xiheberu li nga tirhisiwa lani, li nga ha fambisana ni rito leli vulaka “chaka la munhu kumbe la xiharhi,” funtshi li tirhiseliwa ku kombetela ka xiyeyiso.
^ Vona Ntlhamuselo.
^ Kumbe: “pfuxeta”.
^ Kumbe: “kungu”.
