Tihosi Ta Ku Sungula 16:1-34
16 Yehovha a yavanyisa Baxa hi ku tirhisa Yewu+ n’wana wa Hanane,+ a ku:
2 “Wena Baxa a wu nga li wa nchumu, kambe ni ku yendle munhu hi ku ku veka swaku u rhangela vanhu va mina, ku nga Vayisrayele,+ kambe u tekelele mahanyelo ya ku biha ya Yerobuwamu u tlhela u yendla swaku vanhu va mina, ku nga Vayisrayele va djoha va za va ni kwatisa.+
3 Se ni ta ku helisa wena ni ndjangu wa wena hinkwawu naswona ndjangu wa wena wu ta fana ni ndjangu wa Yerobuwamu+ n’wana wa Nebati.
4 Hinkwavu va ndjangu wa wena lava nga ta fa ka doropa, va ta dliwa hi timbyana; lava nga ta fela nhoveni, va ta dliwa hi swinyanyani.”
5 Timhaka hinkwatu ta wutomi la Baxa ni mintirho ya yena ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Israyele.
6 Baxa a gama a fa, a lahliwa lani vavhovho va yena va nga lahliwa kona aTiraza;+ se Elayi n’wana wa yena a va hosi.
7 Kutani Yehovha a rhuma muprofeta Yewu n’wana wa Hanane swaku a ya byela Baxa ni ndjangu wa yena leswi a va ta yavanyisiwa xiswona, hi mhaka ya swilo swa ku biha leswi a nga swi yendla a djohela Yehovha, a mu kwatisa hi mintirho ya yena, ku fana ni ndjangu wa Yerobuwamu ni hi mhaka ya leswi a nga dlaya Nadabi n’wana wa Yerobuwamu.+
8 Hi lembe la wu 26 la ku fuma ka Asa hosi ya Yuda, Elayi n’wana wa Baxa a ve hosi ya Israyele aTiraza, kambe a yo fuma malembe mambirhi.
9 Mutirhi wa yena Zimiri lweyi a a rhangela hafu ya masonchwa lama fambaka hi tinyolo,* a yendle planu* la ku mu dlaya aTiraza, nkama na a li ku nweni naswona na a dakwile kaya ka Arza lweyi a a vonelela ndjangu wa hosi aTiraza.
10 Kutani Zimiri a nghena a fika a mu dlaya,+ se yena a sala a va hosi, leswo swi yendleke hi lembe la wu 27 la ku fuma ka Asa hosi ya Yuda.
11 A nkama a nga va hosi, a tlhela a tshama ka xitshamu xa yena xa wuhosi, a tekele ku dlaya ndjangu hinkwawu wa Baxa. A nga siyanga wanuna ni mun’we hambi ku li maxaka kumbe vanghanu va yena.
12 Zimiri a wu helise hi ndlela yoleyo ndjangu hinkwawu wa Baxa hi ku ya hi leswi Yehovha a nga swi hlaya nkama a nga yavanyisa Baxa hi ku tirhisa muprofeta Yewu.+
13 Leswi swi yendleke hi mhaka ya swidjoho hinkwaswu leswi Baxa ni n’wana wa yena Elayi va nga swi yendla ni swidjoho leswi va nga djohisa Vayisrayele hi swona, hi ku kwatisa Yehovha Xikwembu xa Israyele hi swikwembu swa vona swa ku kala swi nga pfuni nchumu.+
14 Timhaka hinkwatu ta wutomi la Elayi ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Israyele.
15 Hi lembe la wu 27 la ku fuma ka Asa hosi ya Yuda, Zimiri a ve hosi 7 wa masiku aTiraza. Hi nkama wolowo masonchwa a ma gwimbe matende swaku ma lwa ni Jibetoni+ ku nga doropa la Vafilista.
16 Hi ku famba ka nkama masonchwa lawa a ma gwimbe matende ma twe mahungu lama nge: “Zimiri a hambe planu* naswona a dlaye hosi.” Hi siku lolelo na va ha li ka matende, tiko hinkwalu la Israyele li veke Omiri+ murhangeli wa masonchwa swaku a va hosi ya Israyele.
17 Omiri ni tiko hinkwalu la Israyele va suka aJibetoni va ya rhendzela doropa la Tiraza.
18 Nkama Zimiri a nga vona swaku doropa li tekiwile, a baleka a ya tumbela ka yindlo ya wuhosi, ka ndhawu leyi a yi tiyile ku fana ni mimuru ya ku tiya a gama a yi hisa, a fela kolanu.+
19 Leswi swi yendleke hi mhaka ya swidjoho swa yena, hi ku yendlela Yehovha swa ku biha ni hi ku tekelela swidjoho leswi Yerobuwamu a nga djohisa Vayisrayele hi swona.+
20 Timhaka hinkwatu ta wutomi la Zimiri ni planu* leli a nga li yendla, swi tsaliwile ka buku leli vulavulaka hi wutomi la tihosi ta Israyele.
21 Ku ve hi nkama wolowo Vayisrayele va nga yavana va va mintlawa yimbirhi. Ntlawa wun’we a wu nyima na Tibini n’wana wa Ginati naswona a wu lava ku mu yendla hosi, kasi ntlawa lowun’wani a wu nyima na Omiri.
22 Kambe lava a va nyima na Omiri va hlule lava a va nyima na Tibini n’wana wa Ginati. Se Tibini a fa, Omiri a va hosi.
23 Hi lembe la wu 31 la ku fuma ka Asa hosi ya Yuda, Omiri a ve hosi aIsrayele naswona a fume 12 wa malembe. A Tiraza a fume 6 wa wona.
24 A xave ntshava ya Samariya ka Xemeri hi 68,4 wa makilu* ya prata, a gama a yaka doropa henhla ka ntshava yoleyo. A chule doropa lolelo vito la Samariya*+ hi ku ya hi vito la Xemeri n’winyi wa ntshava.
25 Omiri a tame a yendlela Yehovha swa ku biha naswona a yendle swa ku biha ngopfu ku tlula tihosi hinkwatu leti nga tshama ti fuma na yena a nga se fuma.+
26 A tekelele xikombiso xa ku biha xa Yerobuwamu n’wana wa Nebati a tlhela a yendla swidjoho swa ku fana ni leswi Yerobuwamu a nga djohisa vanhu va Israyele hi swona, hi ku kwatisa Yehovha Xikwembu xa Israyele hi swifaniso swa vona swa ku kala swi nga pfuni nchumu.+
27 Timhaka hinkwatu ta wutomi la Omiri, mintirho ya yena ni tinyimpi leti a nga ti hlula, swi tsaliwile ka buku leli vulavulaka hi wutomi la tihosi ta Israyele.
28 Omiri a gama a fa a lahliwa Samariya; se Akabu+ n’wana wa yena a va hosi.
29 Akabu n’wana wa Omiri, a ve hosi aIsrayele hi lembe la wu 38 la ku fuma ka Asa hosi ya Yuda naswona a fume aIsrayele 22 wa malembe na a tshama aSamariya.+
30 A yendlele Yehovha swa ku biha ngopfu ku tlula tihosi hinkwatu leti nga fuma na yena a nga se fuma.+
31 A a swi vona swi nga li swa nchumu ku yendla swidjoho swa ku fana ni leswi Yerobuwamu+ n’wana wa Nebati a nga swi yendla, se a tlhele a teka Jezabele+ n’wana wa Etibahali hosi ya Vasidoni+ swaku a va nsati wa yena, a sungula ku tirhela Bali+ ni ku mu khizamela.
32 A tlhela a yakela Bali altari ka tempele ya Bali+ leyi a nga yi yaka aSamariya.
33 A tlhele a yendla mhandzi ya Axera.*+ Phela Akabu a yendle minchumu ya yinyingi swaku a kwatisa Yehovha Xikwembu xa Israyele ku tlula tihosi hinkwatu ta Israyele leti nga fuma na yena a nge se fuma.
34 A nkama a ku fuma Hosi Akabu, Iyeli wa le Betele a yake* doropa la Yeriko. A feliwe hi Abirami n’wana wa yena wa matevula nkama a nga sungula ku li yaka a tlhela a feliwa hi Segubi n’wana wa yena wa xigumandzeni nkama a nga veka swipfalu swa lona. Leswi swi yendleke hi ku ya hi leswi Yehovha a nga swi hlaya hi ku tirhisa Yoxuwa n’wana wa Nuni.+
Tinhlamunselu ta le hansi
^ Kumbe: “tin’qolo; makalichi”.
^ Kumbe: “kungu”.
^ Kumbe: “kungu”.
^ Kumbe: “kungu”.
^ Hi Xiheberu: “titalenta timbirhi”. Vona Xiyengetelo B14.
^ Leswi vulaka “I La Lixaka La Xemeri”.
^ Vona Ntlhamuselo.
^ Kumbe: “pfuxete”.
