Tihosi Ta Ku Sungula 17:1-24
17 Se Eliya*+ wa le Tixibi, lweyi a a tshama Jiliyadi+ a byela Akabu a ku: “Na funga hi vito la Yehovha Xikwembu xa Israyele lexi hanyaka ku nga Xikwembu lexi ni xi tirhelaka, a ku nga ta va ni mberha* hambi hi mpfula loko ni nge se hlaya nchumu!”+
2 Yehovha a byela Eliya, a ku:
3 “Suka lani u ya ka tlhelo la le wuxeni, u ya tumbela ka Nkova wa Keriti lowu nga ka tlhelo la le wuxeni la Yordani.
4 U fanele u phuza mati ka nambu wawutsongo lowu nga kolanu, ni ta byela matlhugwani* swaku ma ku tisela swakudla.”+
5 Eliya a tekele ku yendla leswi a nga byeliwa swona hi Yehovha, a famba a ya tshama ka Nkova wa Keriti lowu nga ka tlhelo la le wuxeni la Yordani.
6 Matlhugwani a ma mu tisela pawu ni nyama nimixo, ma tlhela ma mu tisela pawu ni nyama nimadlambu funtshi a a phuza mati lawa a ma li ka nambu wawutsongo.+
7 Kambe loko ku hundze masikunyana a mati lawa a ma li ka nambu wawutsongo ma psha,*+ hikusa mpfula a yi nga ni tikweni.
8 Yehovha a tlhela a byela Eliya a ku:
9 “Famba u ya Sarepta ku nga doropa la Vasidoni u ya tshama kona. Ni ta byela wansati lweyi a nga feliwa hi nuna, swaku a ku nyika swakudla.”+
10 Se a suka a ya Sarepta. Nkama a nga fika ka nyanghwa wa doropa, a kume wansati lweyi a nga feliwa hi nuna na a rholela tihunyi. A gama a mu vitana, a ku: “Ni kombela u ni khela matinyana swaku ni ta phuza.”+
11 Nkama wa ha ya ku kheni ka mati, Eliya a tlhela a ku: “Ni kombela u ni telanyana ni pawu lalitsongo.”
12 A mu hlamula a ku: “Na funga hi vito la Yehovha Xikwembu xa wena lexi hanyaka, swaku a ni na pawu, no va ni trigu la ku a li tati hambi hi xiyandla ka khuwani lalikulu ni mafurhanyana ka khuwani lalitsongo.+ Swoswi ni nga la, ni rholela swihunyani swaku ni ta yendlanyana xanchumu swaku mina ni n’wana wa mina hi ta dla. Loko se hi dlile, hi ta gama hi fa hikusa a ha ha na swin’wani swa ku sweka.”
13 Kutani Eliya a mu hlamula a ku: “U nga chavi. Famba u ya yendla leswi u nga swi hlaya. Kambe rhanga hi ku ni hambela pawu lalitsongo hi trigu leli nga sala, u ta ni nyika. Loko se u gamile u ta gama u yendla swa wena ni n’wana wa wena.
14 Hikusa Yehovha Xikwembu xa Israyele a te: ‘Trigu leli nga ka khuwani lalikulu ni mafurha lama nga ka khuwani lalitsongo a swi nga ta hela anze siku leli Yehovha a nga ta nisa mpfula amisaveni.’”+
15 Se a famba a ya yendla leswi Eliya a nga mu byela swona. Wansati lweyi wa ku feliwa hi nuna ni va ndjangu wa yena ku patsa na Eliya va ve ni swakudla masiku ya manyingi.+
16 Trigu leli a li li ka khuwani lalikulu ni mafurha lawa a ma li ka khuwani lalitsongo a swi helanga, hi ku ya hi leswi Yehovha a nga swi hlaya hi ku tirhisa Eliya.
17 Loko swilo leswi swi yendlekile, wansati lweyi wa ku feliwa hi nuna, lweyi a a li n’winyi wa munti a vabyeliwa hi n’wana, a n’wana lweyi a vabye hintamu swinene a za a fa.+
18 Se wansati lweyi a vutisa Eliya a ku: “Ni yo ku wonhela yini, wena munhu wa Xikwembu xa ntiyiso? U yo tela ku ta ni khumbukisa xidjoho xa mina u tlhela u ni dlayela n’wana wa mina?”+
19 Kambe Eliya a hlamula wansati lweyi a ku: “Tisa n’wana wa wena halenu ka mina.” A gama a teka n’wana ka mavoko ya yena, a mu tlakula a famba na yena ka kwartu la le henhla lani a a tshama kona, a fika a mu lata ka mubedu wa yena.+
20 Eliya a huwelela a khongela ka Yehovha, a ku: “Yehovha Xikwembu xa mina,+ wo tisa khombo ka wansati lweyi wa ku feliwa hi nuna lweyi ni tshamaka kaya ka yena hi ku tshika n’wana wa yena a fa?”
21 Se a b’arama kanharhu ahenhla ka n’wana lweyi, a khongela ka Yehovha a huwelela, a ku: “Yehovha Xikwembu xa mina, ni kombela u yendla swaku n’wana lweyi a tlhela a hanya.”
22 Yehovha a yingisa leswi Eliya a nga swi kombela,+ a yendla swaku n’wana a tlhela a hanya.+
23 Eliya a teka n’wana a famba na yena ka kwartu la le hansi, a fika a mu nyikela ka mamani wa yena; se Eliya a ku: “Wa mu vo, n’wana wa wena wa hanya.”+
24 Nkama wansati lweyi a nga vona leswi nga yendleka, a byela Eliya a ku: “Swoswi na swi tiva swaku hikakunene u munhu wa Xikwembu+ ni swaku leswi Yehovha a nga ku rhuma swaku u swi hlaya i ntiyiso.”
Tinhlamunselu ta le hansi
^ Leswi vulaka swaku “Xikwembu Xa Mina I Yehovha”.
^ Kumbe: “mub’etho”.
^ Kumbe: “magqugwani”. Ku nga muxaka wa xinyanyani.
^ Kumbe: “ma khwa”.
