Tihosi Ta Ku Sungula 18:1-46
18 Loko se ku hundze nkama, hi lembe la wunharhu,+ Yehovha a byela Eliya a ku: “Famba ka Akabu hikusa ni ta nisa mpfula.”+
2 Se Eliya a famba a ya ka Akabu. Hi nkama wolowo a ndlala a yi li yikulu+ aSamariya.
3 Hi nkama wolowo, Akabu a vitana Obadiya lweyi a a li muvoneleli wa ndjangu wa Akabu. (Obadiya a a mu hlonipha hintamu Yehovha.
4 Se hi nkama lowu Jezabele+ a a dlayetela vaprofeta va Yehovha, Obadiya a teke 100 wa vaprofeta a ya va fihla ka mimhakwa* hi mintlawa yimbirhi, a gama a va nyika pawu ni mati; ntlawa wun’wani ni wun’wani a wu ni 50 wa vaprofeta.)
5 Akabu a byela Obadiya a ku: “Famba ka swihlovo ni ka minkova hinkwayu leyi nga kona tikweni. Kumbexana hi nga kuma byanyi leswaku hi ta nyika makavhalu ni timbongolo* swaku ti dla swaku swiharhi swa hina swi nga hi feli hinkwaswu.”
6 Se va yavelana tindhawu leti a va ta hundza hi ka tona. Akabu a famba na a li yexe hi ndlela yin’wani, na yena Obadiya a famba na a li yexe hi ndlela yin’wani.
7 Na Obadiya wa ha li ndleleni, Eliya a ta a ta tlhangana na yena. Obadiya a tekela ku swi vona swaku a ku li Eliya, a gama a khizama a txuvuka hansi, a mu vutisa a ku: “Hi wena Eliya hosi ya mina?”+
8 A mu hlamula a ku: “Hi mina. Famba u ya byela hosi ya wena u ku: ‘Eliya a fikile.’”
9 Kambe yena a mu hlamula a ku: “Ni yo wonha yini leswi u lavaka swaku ni dlayiwa hi Akabu?
10 Na funga hi vito la Yehovha Xikwembu xa wena lexi hanyaka, swaku a ku na tiko ni lin’we kumbe mfumu lani hosi ya mina yi kalaka yi nga rhumanga vanhu swaku va ya ku lavetela. Loko va ku: ‘A nga kona lani,’ hosi a yi yendla swaku vanhu va mimfumu ni va matiko wolawo va funga swaku impela a va ku kumi.+
11 Se swoswi u li: ‘Famba u ya byela hosi ya wena u ku: “Eliya a fikile.”’
12 Nkama ni nga ta hambana na wena, matimba ya Yehovha ma ta ku yisa+ ka ndhawu ya ku kala ni nga yi tivi, se loko ni byela Akabu swaku u fikile kambe a nga ku kumi a ta ni dlaya. Phela mina ni hlonipha Yehovha ku sukela loko na ha li djaha.
13 A va ku byelanga wena hosi ya mina leswi ni nga swi yendla nkama Jezabele a a dlayetela vaprofeta va Yehovha? A va ku byelanga swaku ni tumbete 100 wa vaprofeta va Yehovha ka mimhakwa hi mintlawa yimbirhi, ntlawa wun’we wu ni 50 ni lowun’wani wu ni 50 wa vaprofeta, ni tlhela ni hamba ni va nyika pawu ni mati?+
14 Kambe swoswi wena u li: ‘Famba u ya byela hosi ya wena u ku: “Eliya a fikile.”’ Phela a ta ni dlaya.”
15 Kambe, Eliya a ku: “Na funga hi vito la Yehovha Xikwembu lexi hanyaka lexi nga murhangeli wa tintsumi ni lexi ni xi gandzelaka* swaku ni ta ya ni ya humelela ka yena namuntlha.”
16 Kutani Obadiya a ya ka Akabu a fika a mu byela swaku Eliya a fikile, a gama Akabu a suka a ya tlhangana na Eliya.
17 Nkama Akabu a nga vona Eliya a tekela ku mu vutisa a ku: “Hi wena lweyi, lweyi a hi tiselaka khombo lalikulu aIsrayele?”
18 Se a mu hlamula a ku: “A hi mina ni tiselaka Israyele khombo leli, kambe li za li va kona hi mhaka ya wena ni ndjangu wa papayi wa wena, hikusa mi tshike minawu ya Yehovha mi tlhela mi tirhela Vabali.+
19 Swoswi vitana tiko hinkwalu la Israyele swaku li tlhangana ka Ntshava ya Karmeli,+ ni 450 wa vaprofeta va Bali ni 400 wa vaprofeta lava gandzelaka mhandzi ya Axera,*+ lava dlaka ka meza wa Jezabele.”
20 Kutani Akabu a rhuma vanhu va ya vitana Vayisrayele hinkwavu, a tlhela a hlengeleta ni vaprofeta ka Ntshava ya Karmeli.
21 Eliya a tshinela ka vanhu hinkwavu, a gama a ku: “Kasi mi ta kanakana* ku yendla xiboho anze siku muni?+ Loko Yehovha a li Xikwembu xa ntiyiso, tirhelani yena;+ kambe loko ku li Bali, mu tirheleni.” Kambe hinkwavu va ku zwee, a ku hlamulanga munhu.
22 Eliya a gama a byela vanhu a ku: “Ku yo sala mina ntsena ka vaprofeta va Yehovha,+ kasi vaprofeta va Bali i 450 wa vavanuna.
23 A va hi nyike swihon’wani swimbirhi, se vona a va teki xin’we xa kona va xi tsemelela va xi tlhateka henhla ka tihunyi kambe va nga tshiveli ndzilu. Na mina ni ta yendla swa ku fana ni swoleswo hi xihon’wani lexin’wani, ni ta xi tlhateka henhla ka tihunyi kambe a ni nga ta tshivela ndzilu.
24 Kutani n’wina mi fanele mi vitana vito la xikwembu xa n’wina,+ na mina ni ta vitana vito la Yehovha. Xikwembu lexi nga ta hlamula hi ku rhumela ndzilu, hi xona Xikwembu xa ntiyiso.”+ Vanhu hinkwavu va hlamula va ku: “Leswi u swi hlayaka swa twala.”
25 Eliya a byela vaprofeta va Bali a ku: “Tilangeleni xihon’wani, leswi mi nga vanyingi rhangani mi xi lulamisela, mi gama mi vitana vito la xikwembu xa n’wina kambe mi nga tshiveli ndzilu.”
26 Se va teka xihon’wani lexi va nga nyikiwa xona, va xi lulamisela, va tlhela va vitana vito la Bali ku sukela nimixo anze ninhlikanhi va ku: “Bali hi hlamuli!” Kambe a ku nga twakali rito naswona a ku nga na lweyi a a va hlamula.+ Va tame va txina va tlulatlula na va djikadjika matlhelweni ka altari leyi va nga yi yaka.
27 Kutani ninhlikanhi Eliya a sungula ku va poyila a ku: “Huwelelani mi vulavulela henhla! Kasi yena a hi xikwembu ke!+ Swi nga yendleka a li ku pimiseni kumbe a ye xikoti a ya tirhuma.* Kumbe a yo yetlela swi lava a pfuxiwa!”
28 A va huwelela na va vulavulela henhla, va titsemelela* hi swikhwa ni hi matlharhi hi ku ya hi leswi a va tolovela ku swi yendla, va za va xiririka ni ngati.
29 Loko se ku hundze nhlikanhi va tama va yendla minchumu ya ku kala yi nga tolovelekanga* ku za ku fika nkama lowu a va nyikela hi wona magandzelo ya swakudla nimadlambu kambe a ku nga twakali rito, a ku nga na lweyi a a va hlamula; naswona a ku nga na lweyi a a va yingisa.+
30 Loko ku hundze nkamanyana Eliya a byela vanhu hinkwavu, a ku: “Tshinelani halenu.” Se vanhu hinkwavu va tshinela. A gama a pfuxa altari ya Yehovha leyi a yi diliziwile.+
31 Eliya a teka 12 wa maribye hi ku landza numeru ya tinxaka ta vana va Yakobe, lweyi Yehovha a nga mu byela a ku: “Vito la wena u ta va Israyele.”+
32 Hi maribye wolawo a yake altari+ hi vito la Yehovha, a gama a txela xikhele amatlhelweni ka altari; xikhele xa kona a xi ringana ni ndhawu leyi ku nga byaliwaka kolomuyani ka 10 wa makilu* ya mbewu.
33 A gama a teka tihunyi a ti veketela kahle, a tsemelela xihon’wani a xi tlhateka henhla ka tona.+ A gama a ku: “Tatani 4 wa makhuwani yamakulu hi mati, mi ma chela henhla ka gandzelo la ku hisiwa ni henhla ka tihunyi.”
34 A ku: “Tlhelani mi chela.” Va tlhela va chela. A phindha a ku: “Chelani ka wunharhu.” Se va chela ka wunharhu.
35 Mati ma ngirimela amatlhelweni ka altari, ni xikhele xa kona xi tala hi mati.
36 Kutani hi nkama wa ku nyikeliwa ka magandzelo ya swakudla nimadlambu,+ muprofeta Eliya a tshinela a ku: “Yehovha, Xikwembu xa Abrahamu,+ Izaki+ na Israyele, a swi tiviwi namuntlha swaku u Xikwembu aIsrayele ni leswaku ni mutirheli wa wena naswona ni yendle swilo leswi hinkwaswu hi ku yingisa leswi u nga ni byela swona.+
37 Ni hlamuli Yehovha! Ni hlamuli swaku vanhu lava va ta swi tiva swaku wena Yehovha, u Xikwembu xa ntiyiso ni leswaku u lava swaku vanhu lava va tlhelela ka wena.”+
38 Kutani Yehovha a humesa ndzilu hi tilweni, wu fika wu hisa magandzelo ya ku hisiwa,+ tihunyi, maribye ni wuthulu, ku tlhela ku psha ni mati lawa a ma li ka xikhele.+
39 Nkama vanhu va nga vona leswo, va tekela ku khizama va txuvuka hansi, va ku: “Yehovha i Xikwembu xa ntiyiso! Yehovha i Xikwembu xa ntiyiso!”
40 Eliya a gama a byela vanhu a ku: “Khomani vaprofeta va Bali! Mi nga tshikeni ni mun’we wa vona a baleka!” Se va va khoma, Eliya a va yisa ka nkova wa Kixoni,+ a fika a va dlayetela kona.+
41 Eliya a gama a byela Akabu a ku: “Famba u ya dla u tlhela u nwa, hikusa ni twa guwa la mpfula yayikulu.”+
42 Akabu a famba a ya dla a tlhela a nwa, Eliya a khwela henhla ka ntshava ya Karmeli a fika a khizama, a korhamisa nhloko ya yena xikarhi ka matsolo.+
43 Eliya a byela mupfunisi wa yena a ku: “Ni kombela u khupuka, u txuvuka hala tlhelo ka lwandle.” A khupuka a ya txuvuka, a gama a ku: “A ku voneki nchumu.” Eliya a mu byela ka 7 a ku: “Tlhela u ya txuvuka.”
44 Se ka wu 7 mupfunisi wa yena a ku: “Hi nga txuvuka! Ku ni rhefu lalitsongo li fanaka ni voko la munhu leli humaka hi lwandle.” Eliya a mu byela a ku: “Famba u ya byela Akabu, u ku: ‘Lulamisa nyolo* ya wena! U ngirimela na mpfula yi nge se ku pfalela!’”
45 Hi nkama wolowo ku va ni marhefu ya ntima ku tlhela ku ba moya. Ku sungula ku na mpfula yayikulu hintamu swinene.+ Kutani Akabu a famba a ya fika aYezreyeli.+
46 Kambe voko la Yehovha li mu nyika matimba Eliya, se a teka nguvu ya yena a yi boha ka masenge* a tsutsuma a hundza Akabu a rhanga a fika Yezreyeli.
Tinhlamunselu ta le hansi
^ Ku nga mbhovo lowu kumekaka ka ntshava kumbe ka ribye.
^ Kumbe: “ma mula”. Ku nga vana va timbongolo ni makavhalu.
^ Hi Xiheberu: “lexi ni nyimaka phambheni ka xona”.
^ Vona Ntlhamuselo.
^ Hi Xiheberu: “ku khwita hi minenge yimbirhi”.
^ Kumbexana: “a yendzile.”
^ Kumbe: “tihaletela”.
^ Kumbe: “a va yendla minchumu ingaku i vaprofeta”.
^ Hi Xiheberu: “tiseya timbirhi”. Vona Xiyengetelo B14.
^ Kumbe: “n’qolo; kalichi”.
^ Kumbe: “xisuti”.
