Tihosi Ta Ku Sungula 2:1-46
2 A nkama Davhida a a li kusuhi ni ku fa, a byele n’wana wa yena Solomoni a ku:
2 “Ni kusuhi ni ku fa. Se swi lava u tiya+ u kombisa swaku u wanuna.+
3 U fanele u yingisa Yehovha Xikwembu xa wena hi ku famba ka tindlela ta yena, u yingisa minawu ya yena, swiboho swa yena swa ku yavanyisa ni leswi a ku byelaka swona,* hi ku ya hi leswi nga tsaliwa ka buku la Nawu wa Moxe;+ kutani hinkwaswu swi ta ku fambela kahle ka leswi u swi yendlaka ni hinkwaku lomu u nga ta ya kona.
4 Yehovha a ta yendla hinkwaswu leswi a nga ni tshembisa swona nkama a nga te: ‘Loko vana va wena vo tshembeka ka mina hi timbilu ta vona hinkwatu ni hi wutomi la vona hinkwalu,+ ka xitshamu xa wuhosi xa Israyele+ minkama hinkwayu ku ta va ni munhu lweyi a humaka ka ndjangu wa wena.’
5 “U swi tiva kahle leswi Yowabu n’wana wa Zeruya a nga ni yendla swona, ni leswi a nga swi yendla ka varhangeli vambirhi va masonchwa ya Israyele, ku nga Abineri+ n’wana wa Neri na Amasa+ n’wana wa Yeteri. A va dlayile, a halata ngati+ hi nkama lowu a ku nga na nyimpi, a tlhela a nchimisa bandhi la yena leli a a li bohile ni masandaliya ya yena hi ngati na ku nga na nyimpi.
6 U fanele u tirhisa wutlharhi; u nga mu tshiki wanuna lwiyani wa ku guga a fa, a ya lahliwa Sirheni* hi ku rhula.+
7 “Kambe u fanele u kombisa swaku wa va rhandza vana va Barzilayi+ wa le Jiliyadi, naswona va fanele va dla ka meza wa wena, hikusa va ni pfunile+ nkama a ni baleka Absalomu makwenu wa wena.+
8 “Ku na Ximeyi n’wana wa Gera wa ka Benjamini lweyi a humaka aBayurimi naswona a tshama kola kusuhi. Hi yena a nga ni rhuketela+ hintamu nkama a ni ya Mahanayimi;+ a nkama a nga ta a ta tlhangana na mina aYordani, ni fungile hi vito la Yehovha, ni ku: ‘A ni nga ta ku dlaya hi xipada.’+
9 U nga mu tshiki, mu khatisi,+ hikusa wena u wanuna wa ku tlhariha naswona wa swi tiva leswi u faneleke u mu yendla swona; u fanele u mu yisa Sirheni* hi ku halata ngati ya yena.”+
10 Davhida a gama a fa a lahliwa lani vavhovho va yena va nga lahliwa kona, ka doropa la Davhida.+
11 Davhida a fume 40 wa malembe aIsrayele. A fume 7 wa malembe aHebroni,+ kasi aYerusalema a fume 33 wa malembe.+
12 Solomoni a tshama ka xitshamu xa wuhosi xa Davhida papayi wa yena, se mfumu wa yena wu ya wu tiya+ hi kutsongokutsongo.
13 Siku lin’wani Adoniya n’wana wa Agiti a ya ka Batixeba, mamani wa Solomoni. Kutani Batixeba a mu vutisa a ku: “U te hi swaswinene ke?” Yena a ku: “Ina, ni te hi swaswinene.”
14 Se a ku: “Ku ni mhaka ni lavaka ku ku byela yona.” Batixeba a ku: “Vulavula.”
15 Adoniya a ku: “U swi tiva kahle swaku hi mina a ni fanele ni va hosi ni leswaku tiko hinkwalu la Israyele a li nyimele swaku mina ni va hosi;+ kambe mfumu wu ni hundzile wu ya ka makwerhu, hikusa i Yehovha lweyi a a swi lava swaku yena a va hosi.+
16 Kambe ni lava ku ku kombela nchumu xin’we. Ni kombela u nga yali.” Batixeba a ku: “Vulavula.”
17 A gama a ku: “Ni kombela u byela hosi Solomoni swaku a ni nyika Abixagi+ wa le Xunemi swaku a va nsati wa mina, hikusa na swi tiva swaku wena a ta ku yingisa.”
18 Batixeba a ku: “Hi swona! Ni ta ya vulavula ni hosi.”
19 Se Batixeba a ya ka Hosi Solomoni a ya mu byela leswi Adoniya a nga mu kombela swona. Nkama hosi yi nga vona Batixeba, yi sekeleka yi mu tlhangaveta yi fika yi khizama phambheni ka yena. Yi gama yi tshama ka xitshamu xa yona xa wuhosi yi tlhela yi rhuma vanhu swaku va tisa xitshamu xin’wani va xi veka ka tlhelo la yona la xinene swaku mamani wa yona a ta tshama ka xona.
20 Batixeba a ku: “Ni ni xikombelonyana xaxitsongo, ni kombela u nga yali.” Kutani hosi yi ku: “Kombela mamani hikusa a ni nge ku yaleli.”
21 Batixeba a ku: “Teka Abixagi wa le Xunemi u nyika Adoniya makwenu wa wena swaku a va nsati wa yena.”
22 Solomoni a hlamula mamani wa yena a ku: “Hi mhaka muni u lava swaku Abixagi wa le Xunemi a va nsati wa Adoniya? Wo vhela u mu kombelela ni wuhosi+ hikusa hi yena wamukulu+ naswona a seketeliwa hi muprista Abiyatari na Yowabu+ n’wana wa Zeruya.”+
23 Hosi Solomoni a funga hi vito la Yehovha, a ku: “Xikwembu a xi ni khatisi hintamu, loko Adoniya o kala a nga dlayiwi hi mhaka ya leswi a nga swi kombela.
24 Na funga hi vito la Yehovha Xikwembu lexi hanyaka, lweyi a nga ni tiyisa,+ a ni veka ka xitshamu xa wuhosi xa papayi wa mina Davhida a tlhela a ni nyika mfumu, mina ni vana va mina,+ hi ku ya hileswi a nga swi tshembisa, swaku Adoniya a ta fa+ namuntlha.”
25 Solomoni a vhela a rhuma Benaya+ n’wana wa Yoyada, se Benaya a famba a ya dlaya Adoniya.
26 Hosi yi byela muprista Abiyatari+ yi ku: “Famba ka masimu ya wena aAnatoti!+ U faneliwa hi ku fa, kambe a ni nga ta ku dlaya namuntlha hi mhaka ya leswi a wu tlakula Areka ya Yehovha Hosi Ya Ku Tlakuka, nkama a wa ha li na Davhida papayi wa mina+ ni hi mhaka ya leswi u nga hlupheka hintamu na yena.”+
27 Kutani Solomoni a tshikisa Abiyatari ku va muprista wa Yehovha swaku ku yendleka leswi Yehovha a nga swi hlaya hi ndjangu wa Eli+ aXilo.+
28 A nkama Yowabu a nga twa leswo, a tekele ku baleka a ya ka tende la Yehovha+ a fika a khoma timhondzo ta altari a nga ti tshiki hikusa a a nyima na Adoniya+ kambe a nga nyimanga na Absalomu.+
29 Hosi Solomoni a byeliwa leswi: “Yowabu a balekile a ya ka tende la Yehovha, a le tlhelweni ka altari.” Se Solomoni a rhuma Benaya n’wana wa Yoyada, a ku: “Famba u ya mu dlaya!”
30 Benaya a famba a ya ka tende la Yehovha a fika a byela Yowabu a ku: “Hosi yi te: ‘Huma handle!’” Kambe yena a ku: “A ni yi ndhawu, ni ta fela kola.” Benaya a tlhela ka hosi a fika a yi byela a ku: “Yowabu a hlaye leswi, naswona a ni hlamule marito lawa.”
31 Hosi yi gama yi byela Benaya yi ku: “Yendla leswi a nga swi hlaya. Mu dlayi u mu lahla swaku mina ni ndjangu wa papayi hi nga vi ni nandzu wa ngati leyi Yowabu a nga yi halata na swi nga fanelanga.+
32 Yehovha a ta hakelisa ka Yowabu, hikusa a dlaye vavanuna vambirhi hi xipada lava a va lulamile ku tlula yena, ku nga Abineri+ n’wana wa Neri, murhangeli wa masonchwa ya Israyele+ na Amasa+ n’wana wa Yeteri, murhangeli wa masonchwa ya Yuda.+ A va dlaye na papayi wa mina Davhida a nga swi tivi.
33 Yowabu ni vana* va yena va ta tihlamulela minkama hinkwayu hi mhaka ya ngati ya vavanuna volavo;+ kambe Davhida, vana* va yena, ndjangu wa yena ni mfumu wa yena a va ve ni ku rhula loku taka hi ka Yehovha minkama hinkwayu.”
34 Benaya n’wana wa Yoyada a famba a ya dlaya Yowabu, a gama a lahliwa ka doropa la yena amananga.
35 A hosi yi gama yi veka Benaya+ n’wana wa Yoyada swaku a va murhangeli wa masonchwa a pfaleta Yowabu, yi tlhela yi langa muprista Zadoki+ swaku a pfaleta Abiyatari.
36 A hosi yi vitana Ximeyi+ yi mu byela yi ku: “Yaka yindlo aYerusalema, u tshama ka yona; u nga tshuki u huma u ya ka ndhawu yin’wani.
37 Siku leli u nga ta huma u ya tsemakanya Nkova wa Kedroni,+ swi tivi swaku u ta fa. Naswona lifu la kona u ta va u yo tilavela hi wexe.”
38 Ximeyi a hlamula hosi a ku: “Leswi u nga swi hlaya swa twala. Ni ta yendla leswi wena hosi ya mina u nga swi hlaya.” Se Ximeyi a tshama Yerusalema masiku ya manyingi.
39 Nkama ku nga hela malembe manharhu, vatirhi vambirhi va Ximeyi va baleka va ya ka Akixi+ n’wana wa Maka hosi ya Gati. A nkama va nga byela Ximeyi va ku: “Vatirhi va wena va balekile va ya Gati,”
40 Ximeyi a tekela ku famba hi mbongolo a ya ka Akixi aGati a landza vatirhi va yena. Nkama a nga vuya hi Gati ni vatirhi va yena,
41 Solomoni a byeliwa leswi: “Ximeyi a a humile Yerusalema a ya Gati a tlhela a vuya.”
42 Kutani hosi yi vitana Ximeyi, yi mu vutisa yi ku: “A ni ku fungisanga phambheni ka Yehovha ni tlhela ni ku byela, ni ku: ‘A siku leli u nga ta huma u ya ka ndhawu yin’wani, swi tive swaku u ta fa’? Naswona wena a wu ni hlamulanga u ku: ‘Leswi wena u swi hlayaka swa twala naswona ni ta swi yendla’?+
43 Se hi mhaka muni u nga swi yendlanga leswi u nga swi funga phambheni ka Yehovha naswona u nga swi yingisanga leswi ni nga ku byela swona?”
44 Hosi yi byela Ximeyi yi ku: “U swi tiva kahle swilo hinkwaswu swa ku biha leswi u nga swi yendlela papayi wa mina Davhida,+ se Yehovha a ta ku hakelisa hi swilo swoleswo hinkwaswu.+
45 Kambe mina ni ta katekisiwa,+ naswona xitshamu xa wuhosi xa Davhida xi ta va kona phambheni ka Yehovha hi nkama wa ku kala wu nga heli.”
46 Hosi yi gama yi byela Benaya n’wana wa Yoyada swaku a ya dlaya Ximeyi, se Benaya a famba a ya mu dlaya.+
Kutani mfumu wu tiyisiwa ka mavoko ya Solomoni.+
Tinhlamunselu ta le hansi
^ Ku nga switsundzuxu swa Xikwembu.
^ Kumbe: “Sheol”. Vona Ntlhamuselo.
^ Kumbe: “Sheol”. Vona Ntlhamuselo.
^ Hi Xiheberu: “vatukulu”.
^ Hi Xiheberu: “vatukulu”.
