Tihosi Ta Ku Sungula 21:1-29
21 Loko leswo se swi yendlekile, ku ni mhaka yi nga humelela hi nsimu ya mawuvha ya Naboti wa le Yezreyeli. Nsimu leyi a yi li Yezreyeli+ atlhelweni ka yindlo ya wuhosi ya Akabu hosi ya Samariya.
2 Akabu a byele Naboti a ku: “Ni nyike nsimu ya wena ya mawuvha swaku ni ta byala matsavu, hikusa yi le kusuhi ni yindlo ya mina. Mina ni ta ku nyika nsimu yin’wani ya mawuvha ya ku yampsa swaku yi pfaleta leyi. Kambe loko u swi lava, ni xaviseli.”
3 Kambe Naboti a byela Akabu a ku: “A ni nge ku nyiki tshomba la vavhovho va mina+ hikusa Yehovha a nga swi pfumeleli leswo.”
4 Akabu a gama a muka kaya ka yena na a kwatile naswona na a godolile hi mhaka ya leswi Naboti wa le Yezreyeli a nga mu hlamula swona nkama a nge te: “A ni nge ku nyiki tshomba la vavhovho va mina.” Se a yetlela ka mubedu na a txuvuke ka khumbi, a yala ni ku dla.
5 Nsati wa yena Jezabele+ a ya ka yena a fika a mu vutisa a ku: “Hi mhaka muni u kwatile naswona u nga lavi ku dla?”
6 Yena a ku: “Ni byele Naboti wa le Yezreyeli ni ku: ‘Ni xavisele nsimu ya wena ya mawuvha. Loko u nga lavi leswo, a hi txintxisani ni ku nyika nsimu yin’wani ya mawuvha.’ Kambe yena a te: ‘A ni nge ku nyiki nsimu ya mina.’”
7 Nsati wa yena Jezabele a ku: “Kasi a hi wena hosi ya Israyele? Pfuka u dla, u tlhela u tsaka. Ni ta ku nyika nsimu ya mawuvha ya Naboti wa le Yezreyeli.”+
8 Kutani a tsala makarta* hi vito la Akabu a ma veka karimbu la hosi,+ a gama a ma rhumela ka madoda+ ni varhangeli va doropa leli Naboti a a tshama ka lona.
9 Ka makarta lawa a a tsale leswi: “Byelani vanhu swaku va fanele va titsona swakudla, mi gama mi tshamisa Naboti ka ndhawu ya lisima phambheni ka vanhu.
10 Mi gama mi teka vavanuna vambirhi va ku kala va nga pfuni nchumu mi va tshamisa phambheni ka yena,+ swaku va mu lumbeta va ku: ‘U rhuke Xikwembu ni hosi!’+ Se mi mu humesa handle ka doropa mi ya mu ba hi maribye a za a fa.”+
11 Kutani vavanuna va doropa leli Naboti a a tshama ka lona, madoda ni varhangeli va doropa, va yendla leswi Jezabele a nga va tsalela swona ka makarta lawa a nga va rhumelela wona.
12 Va byele vanhu swaku va titsona swakudla va gama va teka Naboti va mu veka phambheni ka vanhu.
13 Se vavanuna vambirhi va ku kala va nga pfuni nchumu va fika va tshama phambheni ka Naboti va sungula ku mu lumbeta aphambheni ka vanhu, va ku: “Naboti a rhuke Xikwembu ni hosi!”+ Va gama va mu humesa handle ka doropa, va mu ba hi maribye a za a fa.+
14 Kutani va rhuma vanhu va ya ka Jezabele va fika va ku: “Naboti a biwe hi maribye a za a fa.”+
15 Hi ku hantlisa nkama Jezabele a nga twa swaku Naboti a biwe hi maribye a za a fa, a byela Akabu a ku: “Pfuka u ya teka nsimu ya mawuvha ya Naboti wa le Yezreyeli,+ leyi a nga yala ku ku xavisela, hikusa Naboti a nga ha li kona, a file.”
16 Nkama Akabu a nga twa swaku Naboti a file, a vhela a suka a ya ka nsimu ya mawuvha ya Naboti wa le Yezreyeli swaku a ya yi teka.
17 Kambe Yehovha a byela Eliya+ wa le Tixibi a ku:
18 “Sekeleka u famba, u ya kumana na Akabu hosi ya Israyele, lweyi a nga Samariya.+ Swoswi a le ka nsimu ya Naboti, a lava ku yi teka.
19 Mu byeli swaku ‘Yehovha a li: “U dlaye munhu+ u tlhela u teka nsimu ya yena?”’+ U tlhela u ku: ‘Yehovha a li: “Lani timbyana ti nga nampsela ngati ya Naboti kona, ti ta nampsela ni ngati ya wena.”’”+
20 Akabu a byela Eliya a ku: “U ze u ni kuma wena nala wa mina!”+ Yena a ku: “Vhela ni ku kumile. Xikwembu xi li: ‘Leswi u lavaka ku tama u ni yendlela swa ku biha mina Yehovha,+
21 ni ta ku tisela khombo, naswona ni ta ku helisa, ni dlaya vavanuna hinkwavu va ndjangu wa wena,+ ku patsa ni munhu lweyi a kalaka a nga na wa ku mu pfuna ni lweyi a kalaka a nga pfuni nchumu aIsrayele.+
22 Ni ta yendla swaku ndjangu wa wena wu fana ni wa Yerobuwamu+ n’wana wa Nebati, ni ndjangu wa Baxa+ n’wana wa Ahiya, hikusa u ni kwatisile naswona u djohise Vayisrayele.’
23 Naswona Yehovha a hlaye swaku ku ta yendleka leswi hi Jezabele: ‘Jezabele a ta dliwa hi timbyana ka nsimu leyi nga Yezreyeli.+
24 Hinkwavu va ndjangu wa wena lava nga ta fela ka doropa va ta dliwa hi timbyana, lava nga ta fela nhoveni va ta dliwa hi swinyanyani.+
25 A ku se tshama ku va ni hosi ya ku fana na wena Akabu,+ hikusa u tame u ni yendlela swa ku biha mina Yehovha, hi ku xengeteliwa hi nsati wa wena Jezabele.+
26 U yendle swa ku nyenyentsa hintamu hi ku gandzela swifaniso swa ku nyenyentsa,* ku fana ni leswi a swi yendliwa hi Vaamori hinkwavu, lava Yehovha a nga va hlongola ka tiko leli a nga nyika Vayisrayele.’”+
27 Hi ku hantlisa nkama Akabu a nga twa marito lawa, a handzula mpahla ya yena, a yambala mpahla ya masaka; a gama a titsona swakudla a yetlela ka masaka naswona a famba na a godolile.
28 Se Yehovha a byela Eliya wa le Tixibi, a ku:
29 “U swi vonile leswi Akabu a nga swi yendla swaku a kombisa swaku wa tiveka hansi ka mina?+ A ni nge li tisi khombo leli na wa ha hanya hi mhaka ya leswi a nga tiveka hansi ka mina. Ni ta li tisa ka ndjangu wa yena ka nkama lowu ku nga ta fuma n’wana wa yena.”+
Tinhlamunselu ta le hansi
^ Kumbe: “mapapila”.
^ Rito la Xiheberu li nga tirhisiwa lani, li nga ha fambisana ni rito leli vulaka “chaka la munhu kumbe la xiharhi,” funtshi li tirhiseliwa ku kombetela ka xiyeyiso.
