Tihosi Ta Ku Sungula 4:1-34
4 Hosi Solomoni a a fuma tiko hinkwalu la Israyele.+
2 Vanhu lava a a va vekile swaku va va varhangeli hi lava: Azariya n’wana wa Zadoki+ a a li muprista;
3 Elihorefi na Ahiya vana va Xixa a va li vasekretariyu;*+ Yehoxafati+ n’wana wa Ayiludi hi yena a a tsala leswi a swi yendleka;
4 Benaya+ n’wana wa Yoyada a a li murhangeli wa masonchwa; Zadoki na Abiyatari+ a va li vaprista;
5 Azariya n’wana wa Natani+ a a li murhangeli wa vaadiminixtradori; Zabudu n’wana wa Natani a a li muprista naswona a a li munghanu wa hosi;+
6 Ayixa a a vonelela yindlo ya hosi; Adonirami+ n’wana wa Abida a a vonelela vatirhi va hosi.+
7 Solomoni a a ni 12 wa vaadiminixtradori ka tiko hinkwalu la Israyele, lava a va mu tisela swakudla yena ni ndjangu wa yena. Adiminixtradori mun’wani ni mun’wani a a mu tisela swakudla wheti yin’we hi lembe.+
8 Mavito ya vona hi lawa: N’wana wa Huri lweyi a a vonelela ka ndhawu ya tintshava ya Efrayimi;
9 n’wana wa Dekeri lweyi a a vonelela Makazi, Xalibimi,+ Beti-Xemexi ni Eloni-Beti-Anani;
10 n’wana wa Ezedi lweyi a a tshama Aruboti (a a vonelela Soko ni tiko hinkwalu la Eferi);
11 n’wana wa Abinadabi a a vonelela tindhawu hinkwatu ta maganga aDori (Tafati n’wana wa Solomoni a ve nsati wa yena);
12 Bana n’wana wa Ayiludi a a vonelela Tanaki, Mejido+ ni tiko hinkwalu la Beti-Xoni,+ ku sukela aBeti-Xoni ku ya aAbel-Mehola anze ka ndhawu ya Yokimemi.+ Tiko la Beti-Xoni a li li kusuhi ni Zaretani ahansi ka Yezreyeli;
13 n’wana wa Geberi lweyi a a tshama aRamoti-Jiliyadi+ (a a vonelela swidoropani leswi nga ni matende swa Yayiri+ n’wana wa Manasi, leswi nga Jiliyadi;+ a a tlhela a vonelela ndhawu hinkwayu ya Argobi,+ leyi nga Baxani,+ ku nga 60 wa madoropa yamakulu lama nga ni mimuru ni swa ku khiya hi swona swa ku yendliwa hi kobre);
14 Ahinadabi n’wana wa Ido lweyi a a vonelela Mahanayimi;+
15 Ayimazi lweyi a a vonelela ndhawu ya lixaka la Naftali (a teke Basemati n’wana wa Solomoni swaku a va nsati wa yena);
16 Bana n’wana wa Huxayi lweyi a a vonelela ndhawu ya lixaka la Aseri ni le Beloti;
17 Yehoxafati n’wana wa Paruwa lweyi a a vonelela ndhawu ya lixaka la Isakara;
18 Ximeyi+ n’wana wa Ela lweyi a a vonelela ndhawu ya lixaka la Benjamini;+
19 Geberi n’wana wa Uri lweyi a a vonelela tiko la Jiliyadi,+ leli a ku li tiko la Sihoni+ hosi ya Vaamori na Ogi+ hosi ya Baxani. A ku ni adiminixtradori mun’we lweyi a a vonelela vaadiminixtradori hinkwavu va le tikweni.
20 Vanhu va Yuda ni va Israyele a va li vanyingi ku fana ni misava ya lwandle;+ a va dla, a va phuza va tlhela va tsaka.+
21 Solomoni a a fuma matiko hinkwawu ku sukela ka Nambu wa Ewufrata+ ku ya fika ka tiko la Vafilista anze lani tiko la Gibita a li sungulela kona. Vanhu va matiko wolawo a va hakela rhesa* va tlhela va tirhela Solomoni masiku hinkwawu ya wutomi la yena.+
22 Swakudla leswi a va tisela Solomoni hi siku a ku li 3.300 wa makilu* ya mpupu lowu nga siliwa kahle ni 6.600 wa makilu* ya mpupu,
23 10 wa tihomu ta ku nona, 20 wa tihomu leti nga tekiwa ku lusiweni ni 100 wa tinyempfu, na ku nga kontiwi timbavala,* timhunti,* tinhlangu* ni swinyanyani swa ku nona.
24 Hikusa a a fuma minchumu hinkwayu leyi nga ka tlhelo lin’we* la Nambu wa Ewufrata,+ ku sukela aTifisa anze Gaza,+ ku patsa ni tihosi hinkwatu leti a ti li ka tlhelo lolelo la Nambu; tiko hinkwalu ni matiko hinkwawu lawa a ma li kusuhi a ma ni ku rhula.+
25 Ka malembe hinkwawu lawa ku nga fuma Solomoni, vanhu va Yuda ni va Israyele a va hanya hi ku rhula na va hlayisekile, a va tshama hansi ka minsinya ya vona ya mawuvha ni hansi ka minsinya ya vona ya makuwa, ku sukela aDani anze Berxeba.
26 Solomoni a a ni 4.000* wa swib’ala swa makavhalu lawa a ma koka tinyolo* ta yena naswona a a ni 12.000 wa makavhalu.*+
27 Vaadiminixtradori lava, a va nyika hosi Solomoni swakudla ku patsa ni hinkwavu lava a va dla ka meza wa yena. Adiminixtradori mun’wani ni mun’wani a a tirha wheti yin’we hi lembe naswona a a fanele a tiyiseka swaku a ku pfumaleki nchumu.+
28 A va tlhela va tisa maxalani* ni byanyi hinkwaku lomu a swi laveka kona, a va tisela makavhalu ni makavhalu lawa ma kokaka tinyolo. Adiminixtradori mun’wani ni mun’wani a a fanele a swi tisa hi nkama lowu a nga vekeliwa wona.
29 Xikwembu xi nyika Solomoni wutlharhi ni ku twisisa kakukulu xi tlhela xi tata mbilu ya yena hi ku twisisa, ku fana ni misava leyi nga lwandle.+
30 Solomoni a a tlharihe hintamu ku tlula vanhu hinkwavu lava a va tshama ka tlhelo la le Wuxeni ni hinkwavu lava a va tshama Gibita.+
31 A a tlharihe ku tlula vanhu hinkwavu, a a tlharihe ku tlula Ethani+ wa ka Zera na Hemani,+ Kalikoli+ na Darda ku nga vana va Maholi; a a tiviwa ka matiko hinkwawu lawa a a li kusuhi na wona.+
32 A tsale 3.000 wa swivuriso+ naswona a a ni 1.005 wa tinsimu.+
33 A a kota ku tlhamusela minsinya, ku sukela ka nsinya wa mukedari+ lowu nga Lebanoni ku ya ka nsinya wa hisopa* lowu milaka ka makhumbi; a a kota ku tlhamusela swiharhi,+ swinyanyani,+ swiharhi leswi fambaka hi khwirhi*+ ni tihlampfi.
34 Vanhu va matiko hinkwawu a va ta va ta twa wutlharhi la Solomoni, ku patsa ni tihosi ta misava hinkwayu, leti ti nga twa hi wutlharhi leli Solomoni a a li na lona.+
Tinhlamunselu ta le hansi
^ Kumbe: “vamatsalana; vamabalani.”
^ Kumbe: “impoxtu; tinemba”.
^ Hi Xiheberu: “30 wa mimpimu ya tikoro”. Vona Xiyengetelo B14.
^ Hi Xiheberu: “60 wa mimpimu ya tikoro”. Vona Xiyengetelo B14.
^ Kumbe: “veados”.
^ Kumbe: “magazela”.
^ Kumbe: “ma corço”. Ku nga xiharhi xa ku fana ni mbavala.
^ Ku nga tlhelo la Oeste.
^ Numeru leyi ya kumeka ka matsalwa man’wani ya khale lawa ma vulavulaka hi mhaka leyi; matsalwa man’wani ma li a ku li 40.000.
^ Kumbe: “tin’qolo; makalichi”.
^ Kumbe: “vanhu lava a va fambisa makavhalu.”
^ Kumbe: “sevhada”.
^ Vona Ntlhamuselo.
^ Swi nga yendleka ku patsiwa ni swiharhi swin’wani swaswitsongo.