Tihosi Ta Ku Sungula 7:1-51
7 Solomoni a hete 13 wa malembe na a yaka yindlo ya yena.*+
2 A gama a yaka Yindlo leyi a yi vitaniwa Yindlo ya Khwati la Lebanoni;+ yindlo leyi a yi tshamise xileswi: A yi lehe kolomuyani ka 45 wa mametru,* yi yanama kolomuyani ka 22 wa mametru, yi tlhela yi tlakuka kolomuyani ka 13 wa mametru. A yi yakiwe henhla ka 4 wa mafila ya timhandzi ta minsinya ya mikedari; timhandzi leti a ti tlhatekiwe henhla ka mapulangu ya minsinya ya mikedari.+
3 A yi fuleliwe hi mapulangu ya minsinya ya mikedari, lawa a ma tlhatekiwe henhla ka timhandzi ta minsinya ya mikedari; hinkwawu a ma li 45 wa mapulangu, naswona ka fila ha lin’we a ku ni 15 wa wona.
4 Ka matlhelo mambirhi ya yindlo a ku ni 3 wa mafila ya majanela ya ku landzelelana.
5 Tinyanghwa hinkwatu a ti ni maaru lawa ma nga ni matlhelo ya ku ringana,* ni majanela ya kona lawa a ma txuvukanile na wona a ma tshame hi ndlela yoleyo.
6 A yake ni vharanda la mapilari leli a li lehe kolomuyani ka 22 wa mametru, li yanama kolomuyani ka 13 wa mametru. A ku ni vharanda lin’wani phambheni ka lona leli a li yakiwe hi mapilari li tlhela li fuleliwa.
7 A tlhele a yaka ni Sala la Xitshamu xa Wuhosi+ ku nga Sala la Ku Yavanyisa leli a a thetha ka lona timhaka;+ andzeni ka lona a ku namarhetiwe mapulangu ya minsinya ya mikedari ku sukela ahansi anze henhla.
8 Yindlo ya Solomoni leyi a a ta tshama ka yona, a yi li ka kintari wun’wani,+ akulenyana ni Sala la Ku Yavanyisa, naswona a yi yakiwe yi fana na lona. A tlhele a yaka yindlo yin’wani ya ku fana ni Sala la Ku Yavanyisa, a yakela nsati wa yena lweyi a a li n’wana wa Faru.+
9 Tiyindlo hinkwatu ku patsa ni makhumbi ya kona, ku sukela ahansi* ku ya henhla ni handle ni kintari wa kona wawukulu, hinkwaswu swi yakiwe hi maribye ya ku durha+ lawa a ma tsemiwe kahle hi masahu ma tlhela ma sasekisiwa matlhelo hinkwawu.+
10 Masungulo* ya yindlo a ma yakiwe hi maribye yamakulu swinene ya ku durha; man’wani ya wona a ma lehe 4,5 wa mametru, kasi man’wani a ma lehe 3,6 wa mametru.
11 Ahenhla ka maribye lawa a ku ni maribye man’wani ya ku durha lama nga tsemiwa kahle hi ku ya hi mpimu wa kona, ku patsa ni timhandzi ta minsinya ya mikedari.
12 A muru wa kintari wawukulu a wu yakiwe ku fana ni muru wa kintari+ lowu a wu li kusuhi ni tempele ya Yehovha ni vharanda la kona.+ A wu yendliwe hi maribye lama nga tsemiwa kahle ma va mafila manharhu* ya ku tlhatekelana, ku gama ku tlhatekiwa fila lin’we la timhandzi ta minsinya ya mikedari.
13 Hosi Solomoni a rhuma vanhu swaku va ya Tiru va ya vitana Hirami.+
14 Mamani wa yena a a feliwe hi nuna naswona a a li wa lixaka la Naftali, papayi wa yena a a li wa Tiru naswona a a tiva ku yendla minchumu hi kobre;+ Hirami a a wu tiva a tlhela a wu yendla kahle ntirho wa yena, a a ni ku twisisa+ a tlhela a kota ku yendla minchumu ya yinyingi hi ku tirhisa kobre. Se a fika ka Hosi Solomoni, a sungula ku yendla ntirho hinkwawu lowu Solomoni a nga mu nyika wona.
15 A yendle mapilari mambirhi ya redondu hi kobre;+ a pilari ni pilari a li lehe 8 wa mametru, li tlhela li va ni 5 wa mametru amatlhelweni.+
16 Ahenhla ka mapilari lawa ya mambirhi a ku ni minchumu yimbirhi ya ku sasekisa hi yona leyi a nga yi yendla hi kobre. Ha yimbirhi a yi ringana, a yi tlakuke 2,2 wa mametru.
17 A minchumu leyi a yi li henhla ka mapilari a yi sasekisiwe hi maredi lawa ma nga ni machini yamatsongo lawa ma nga boheleliwa ku fana ni tingoti;+ hinkwayu a yi ni maredi ya ku ringana ku nga 7 wa maredi.
18 A tlhele a yendla mafila mambirhi ya swifaniso swa ma romã amatlhelweni ka maredi swaku a sasekisa minchumu leyi a yi li henhla ka mapilari hi mambirhi.
19 Minchumu ya ku sasekisa leyi a yi li henhla ka mapilari ya vharanda a yi fana ni swiluva swa makhon’wa naswona a yi lehe 1,8 metru.
20 Minchumu leyi ya ku sasekisa hi yona a yi li henhla ka mapilari mambirhi ka ndhawu ya redondu leyi nga khomana ni maredi; naswona a yi sasekisiwe hi 200 wa swifaniso swa ma romã ya ku landzelelana.+
21 A yake mapilari ya vharanda la tempele.*+ A sungule hi ku yaka pilari la tlhelo la xinene,* a li chula vito la Yakini,* a gama a yaka pilari ka tlhelo la ximatsi,* a li chula vito la Bowazi.*+
22 Minchumu ya ku sasekisa hi yona leyi a yi li henhla ka mapilari a yi fana ni swiluva swa makhon’wa. Se ntirho hinkwawu wa ku yaka mapilari wu hela.
23 Se a yendla tanki lalikulu la mati hi kobre.+ A li yendle li va la redondu, nomo wa lona a wu pfuleke kolomuyani ka 5 wa mametru, li gama li leha kolomuyani ka 2 wa mametru, se tanki hinkwalu a li pfuleke kolomuyani ka 13 wa mametru.+
24 Ka matlhelo hinkwawu a li sasekisiwe hi swifaniso swa marhanga*+ leswi a swi li hansinyana ka nomo wa lona; a ku yendliwe 10 wa swifaniso swa marhanga ka ndhawu leyi ringanaka 44,5 wa masentimetru ka matlhelo hinkwawu ya tanki, a ku ni mafila mambirhi ya swifaniso swa marhanga lawa ma nga yendliwa ka tanki.
25 A tanki a li tlhatekiwe henhla ka 12 wa swifaniso swa tihomu+ leswi a swi yendliwe hi kobre; swifaniso swinharhu a swi txuvuke ka tlhelo la norte,* swinharhu a swi txuvuke ka tlhelo la wupeladlambu, swinharhu a swi txuvuke ka tlhelo la sul,* swinharhu a swi txuvuke ka tlhelo la le wuxeni; a tanki a li li henhla ka swona naswona mintxila ya swona a yi txuvukanile hansi ka lona.
26 Hi ku kula* ka lona a li ni kolomuyani ka 7 wa masentimetru;* nomo wa lona a wu fana ni nomo wa kopo, a wu tshame ku fana ni xiluva lexi vitaniwaka khon’wa. A li chela mati ya ku ringana 44.000 wa malitru.*
27 A yendle 10 wa swikarinyani+ hi kobre. Swikarinyani* leswi a swi ni 1,8 metru ka matlhelo hinkwawu, swi tlhela swi tlakuka 1,3 metru.
28 A swikarinyani leswi a swi yendliwe hi ndlela leyi: Matlhelo hinkwawu a ku ni minchumu ya kobre leyi a yi vhikela xikarinyani leyi a yi vekiwe ndzeni ka maaru lawa ma nga yendliwa hi kobre.
29 Amatlhelweni ka minchumu leyi ya ku yendliwa hi kobre leyi a yi vhikela xikarinyani ni ka maaru, a ku ni swifaniso swa tinghonyama,+ tihomu ni makerubu.+ Ahenhla ni hansi ka swifaniso swa tinghonyama ni swa tihomu a ku ni minchumu ya redondu ya ku sasekisa hi yona.
30 Xikarinyani ni xikarinyani a xi ni 4 wa maroda ya kobre ni tinsimbi ta ku tlhoma maroda leti a ti yendliwe hi kobre, naswona a xi tiyisiwa hi tinsimbi leti a ti li matlhelweni. A ku ni minchumu ya ku tlhateka baziya leyi a yi sasekisiwe hi minchumu ya redondu.
31 A xikarinyani a xi pfulekile hi henhla, a xi tlakuke kolomuyani ka 45 wa masentimetru; naswona nomo wa xona a wu li wa redondu, kasi lexi a xi tiye hi xona a xi ni kolomuyani ka 67 wa masentimetru; ka nomo wa xona a ku ni swifaniso naswona matlhelo hinkwawu ya xona a ma ringana.* A ma nga li ya redondu.
32 Hansi ka xona a ku ni 4 wa maroda naswona leswi a ma fasiwe ka swona a swi khomane ni xikarinyani; maroda hinkwawu a ma tlakuke kolomuyani ka 67 wa masentimetru.
33 Maroda ya xona a ma fana ni maroda ya nyolo.* Leswi a ma tiye hi swona, swingerengere* swa maroda, tinsimbi ta maroda* ni swin’wani leswi nga xikarhi ka maroda, hinkwaswu a swi yendliwe hi kobre.
34 Ka 4 wa tiponta ta swikarinyani a ku ni 4 wa minchumu leyi a yi swi tiyisa; minchumu ya kona a yi patsanile ni xikarinyani.
35 Ahenhla ka xikarinyani a ku ni bandhi leli a li lehe kolomuyani ka 22 wa masentimetru, kasi hinkwaswu leswi a li yendliwe hi swona a swi patsane ni xikarinyani.
36 A yendle swifaniso swa makerubu, tinghonyama ni minsinya ya mintxindzu hi ku ya hi ndhawu leyi a yi li kona ka mabandhi, a tlhela a yendla minchumu ya redondu ya ku sasekisa hi yona ka matlhelo hinkwawu.+
37 Hi leswi a swi yendlisiwe swona a swikarinyani hinkwaswu swa 10;+ hinkwaswu a swi fana+ naswona a swi ringana.
38 A yendle 10 wa mabaziya hi kobre;+ baziya lin’we a li kota ku chela 880 wa malitru* ya mati. Naswona a li pfuleke kolomuyani ka 1,8 metru. Xikarinyani ni xikarinyani a xi ni baziya lin’we.
39 Se a veka 5 wa swikarinyani ka tlhelo la xinene la tempele a tlhela a veka 5 wa swikarinyani ka tlhelo la ximatsi la tempele, a gama a veka tanki ka tlhelo la xinene la tempele, hi ka tlhelo la le wuxeni.+
40 Hirami+ a tlhele a yendla ni mabaziya man’wani, mafoxolo+ ni matijela.+
A gama a heta ntirho hinkwawu lowu a nga wu yendlela Hosi Solomoni ka yindlo ya Yehovha ku nga:+
41 Mapilari mambirhi+ ni minchumu ya ku sasekisa hi yona ya ku fana ni matijela, leyi a yi li henhla ka mapilari lawa mambirhi; maredi mambirhi+ lawa a ma funengete minchumu yimbirhi ya ku sasekisa hi yona ya ku fana ni matijela leyi a yi li henhla ka mapilari;
42 400 wa swifaniso swa ma romã+ leswi a swi yendleliwe ku sasekisa maredi mambirhi (a redi ni redi a li ni mafila mambirhi ya swifaniso swa ma romã swa ku funengeta minchumu yimbirhi ya ku sasekisa hi yona ya ku fana ni matijela, leyi a yi li henhla ka mapilari mambirhi);
43 10 wa swikarinyani+ ni 10 wa mabaziya+ lawa a ma li henhla ka swona;
44 tanki+ la kobre ni 12 wa tihomu leti a ti li hansi ka lona;
45 swa ku wolela hi swona nkuma, mafoxolo, matijela ni swibya hinkwaswu swa ku yendliwa hi kobre la ku phatima leswi Hirami a nga swi yendlela Hosi Solomoni, swaku swi ta tirhisiwa ka yindlo ya Yehovha.
46 A hosi yi rhumise swaku swi yendliwa ka ndhawu ya Yordani axikarhi ka Sukoti na Zaretani; swi yendliwe hi forma la vumba.
47 Solomoni a nga pezanga swibya leswi hinkwaswu hikusa a swi li swinyingi hintamu. Swaku a kobre a li peza makilu mangaki a swi nga tiviwi.+
48 Solomoni a yendle swibya hinkwaswu swa tempele ya Yehovha ku nga: Altari+ la woru; meza wa woru+ wa ku veka pawu la ku kwetsima;
49 swa ku tlhoma swa ku voninga hi swona+ swa ku yendliwa hi woru la ku tenga, 5 wa swona ka tlhelo la xinene ni 5 wa swona ka tlhelo la ximatsi aphambheni ka Ndhawu Ya Ku Kwetsima Hintamu; swiluva,+ swa ku voninga hi swona ni swa ku khoma tingoti ta xa ku voninga hi xona hinkwaswu a swi yendliwe hi woru;+
50 mabaziya, swa ku tima ndzilu,+ matijela, tikopo+ ni swa ku chela ka swona ndzilu,+ swa ku yendliwa hi woru la ku tenga; swa ku khiya hi swona swipfalu+ swa Ndhawu Ya Ku Kwetsima Hintamu ni swipfalu swa tempele,*+ hinkwaswu a swi yendliwe hi woru.
51 Hosi Solomoni a heta ntirho hinkwawu lowu a a fanele a wu yendla ka yindlo ya Yehovha. A gama a teka minchumu hinkwayu leyi nga nyikeliwa hi papayi wa yena Davhida a yi peta ndzeni ka tempele.+ A teke prata, ni woru ni swibya swin’wani a swi veka lani a ku vekiwa kona swilo swa lisima ka yindlo ya Yehovha.+
Tinhlamunselu ta le hansi
^ Kumbe: “yindlo ya wuhosi.”
^ Hi Xiheberu: “100 wa swisungunu”. Vona Xiyengetelo B14.
^ Kumbe: “ya kwadradu”.
^ Kumbe: “fundação”.
^ Kumbe: “Fundação”.
^ Kumbe: “mafiyada manharhu”.
^ Kumbexana swi vula swaku “Hi Matimba.”
^ Kumbe: “tlhelo la norte”.
^ Leswi vulaka swaku “(Yehovha) A A Yi Tiyisi”.
^ Kumbe: “tlhelo la sul”.
^ Lani ku vulavuliwa hi Ndhawu Ya Ku Kwetsima.
^ I nchumu xa ku fana ni kwembe kumbe abóbora, kambe na xi li xitsongo.
^ Kumbe: “n’walungu”.
^ Kumbe: “dzongeni”.
^ Hi Xiheberu: “2.000 wa tibati.” Vona Xiyengetelo B14.
^ Hi Xiheberu: “ku yanama ka 4 wa tintiho.” Vona Xiyengetelo B14.
^ Kumbe: “espessura; ku tsindzihela; ku bubula”.
^ Kumbe: “Swikarinyani swa mati”.
^ Kumbe: “a ma li kwadradu.”
^ Kumbe: “n’qolo; kalichi.”
^ Kumbe: “majanta”.
^ Kumbe: “marayu”.
^ Kumbe: “40 wa tibati”. Vona Xiyengetelo B14.
^ Lani swi tikomba ku vulavuliwa hi Ndhawu Ya Ku Kwetsima.
