Tihosi Ta Ku Sungula 8:1-66
8 Hi nkama wolowo Solomoni a hlengeleta+ madoda, varhangeli va mindjangu ni varhangeli hinkwavu va tinxaka ta Israyele,+ va ya Yerusalema ka Hosi Solomoni va ya humesa areka ya ntwananu wa Yehovha ka Doropa la Davhida,+ ku nga Siyoni.+
2 Vavanuna hinkwavu va Israyele va hlengeletana phambheni ka Hosi Solomoni na va li ka fexta* hi wheti ya Etanimi,* ku nga wheti ya wu 7.+
3 Madoda hinkwawu ya Israyele ma fika, se vaprista va tlakula Areka.+
4 Va tlakule Areka ya Yehovha, tende la ntlhanganu+ ni swibya hinkwaswu swa ku kwetsima leswi a swi li ka tende. Swi tlakuliwe hi vaprista ni Valevhi.
5 Hosi Solomoni ni Vayisrayele hinkwavu lava a va vitaniwile swaku va ta ka yena, a va li phambheni ka Areka. Se ku yendliwa magandzelo+ hi tinyempfu ni tihomu ta tinyingi hintamu va za va nga ha swi koti ku swi konta.
6 Vaprista va peta areka ya ntwananu wa Yehovha ka ndhawu ya yona,+ ka Ndhawu Ya Ku Kwetsima Hintamu, ahansi ka timpapa ta makerubu.+
7 Timpapa ta makerubu a ti pfulekile lani Areka a yi li kona, a ti mbhonya Areka ni swikhomo swa yona.+
8 Swikhomo+ swa yona a swi lehile, loko u li ka Ndhawu Ya Ku Kwetsima aphambheni ka Ndhawu Ya Ku Kwetsima Hintamu a swi voneka swaku a swi gama kwini, kambe loko u li handle a swi nga voneki. Swa ha li kolanu ninamuntlha.
9 Andzeni ka Areka a ko va ni maribye mambirhi+ lawa Moxe a nga ma veka+ na a li Horebi, nkama Yehovha a nga yendla ntwananu+ ni Vayisrayele nkama va nga huma aGibita.+
10 Nkama vaprista va nga huma ka ndhawu ya ku kwetsima, a rhefu+ li tate yindlo ya Yehovha.+
11 Vaprista a va nga swi koti ku tama va yendla ntirho wa vona hi mhaka ya rhefu leli, hikusa ku phatima ka Yehovha a ku tate yindlo ya yena Yehovha.+
12 Hi nkama wolowo Solomoni a ku: “Wena Yehovha u hlayile swaku u ta tshama ka ndhawu ya munyama wawukulu.+
13 Se ni ku yakele yindlo ya ku tlakuka, swaku u ta tshama ka yona hi nkama wa ku kala wu nga heli.”+
14 Kutani hosi yi ndzuluka yi sungula ku katekisa vanhu hinkwavu va Israyele, vanhu hinkwavu va Israyele a va yo nyima.+
15 Yi ku: “A ku dzunisiwe Yehovha Xikwembu xa Israyele, lweyi a nga tshembisa papayi wa mina Davhida a tlhela a yendla hinkwaswu leswi a nga swi tshembisa nkama a nga ku:
16 ‘Ku sukela siku leli ni nga humesa vanhu va mina ku nga Vayisrayele aGibita, a ni langanga doropa ka tinxaka hinkwatu ta Israyele swaku ni yakeliwa yindlo leyi a ku ta dzunisiwa vito la mina ka yona,+ kambe ni lange Davhida swaku a rhangela vanhu va mina, ku nga Vayisrayele.’
17 Papayi wa mina Davhida a a swi lava hintamu ku yaka yindlo leyi a ku ta dzunisiwa vito la Yehovha Xikwembu xa Israyele ka yona.+
18 Kambe Yehovha a byele papayi wa mina Davhida a ku: ‘U swi lava hintamu ku ni yakela yindlo leyi ku nga ta dzunisiwa vito la mina ka yona. Leswi u swi navelaka i swinene,
19 kambe a hi wena u nga ta ni yakela yindlo leyi. N’wana lweyi u nga ta mu psala hi yena a nga ta ni yakela yindlo leyi ku nga ta dzunisiwa vito la mina ka yona.’+
20 Yehovha a yendle leswi a nga swi tshembisa, hikusa ni pfalete papayi wa mina Davhida naswona ni tshame ka xitshamu xa wuhosi xa Israyele hi ku ya hi leswi Yehovha a nga swi hlaya. Ni tlhele ni yaka yindlo leyi ku nga ta dzunisiwa vito la Yehovha Xikwembu xa Israyele ka yona+
21 naswona ni lulamise ndhawu ka yona swaku ku vekiwa Areka leyi nga ni ntwananu+ lowu Yehovha a nga wu yendla ni vavhovho va hina nkama a nga va humesa ka tiko la Gibita.”
22 Solomoni a nyima phambheni ka altari ya Yehovha ni phambheni ka vanhu hinkwavu va Israyele, a tlakusa mavoko ya yena ma kombeta tilweni,+
23 a ku: “Wena Yehovha Xikwembu xa Israyele, a ku na Xikwembu xa ku fana na wena+ atilweni kumbe amisaveni, wa wu hlayisa ntwananu naswona wa va rhandza vanhu+ va wena lava ku tirhelaka hi timbilu hinkwatu.+
24 U yendle leswi u nga tshembisa papayi wa mina Davhida. U mu tshembisile naswona namuntlha u swi yendlile leswi u nga mu tshembisa swona.+
25 Yehovha Xikwembu xa Israyele, yendla leswi u nga swi tshembisa papayi wa mina Davhida nkama u nga ku: ‘Ka xitshamu xa wuhosi xa Israyele minkama hinkwayu ku ta va ni munhu lweyi a humaka ka ndjangu wa wena, loko ntsena vana va wena va tshembeka ka mina ku fana ni leswi wena u nga tshembeka ka mina.’+
26 Xikwembu xa Israyele, ni kombela u yendla leswi u nga tshembisa mutirheli wa wena Davhida lweyi a nga papayi wa mina.
27 “Kambe wena Xikwembu u nga tshama lani misaveni?+ Hambi matilo lawa ma nga henhla ka matilo a ma ku yeneli;+ se yindlo leyi ni nga ku yakela yona i yitsongo hintamu!+
28 Swoswi ni kombela u yingisa xikhongelo xa mina ni leswi ni swi kombelaka wena Yehovha Xikwembu xa mina. Ni kombela u yingisa xirilo xa mina ni xikhongelo lexi ni xi yendlaka namuntlha.
29 Matihlo ya wena a ma vonelele yindlo leyi wusiku ni nhlikanhi, ku nga ndhawu leyi wena u nga hlaya u ku: ‘Vito la mina li ta tshama kona,’+ swaku u yingisa xikhongelo xa mina lexi ni xi yendlaka ka ndhawu leyi.+
30 Ni kombela u yingisa loko ni ku kombela swaku u va ni timpsalu ka mina ni loko vanhu va wena ku nga Vayisrayele, va khongela na va txuvuka lani yindlo leyi yi nga kona; ni kombela u yingisa na u li ka ndhawu leyi u tshamaka ka yona koseno matilweni;+ hi yingisi u tlhela u hi rivalela.+
31 “Loko munhu o tshuka a lumbetiwa swaku a yendlele munhu mun’wani swa ku biha a gama lweyi a mu lumbetaka a mu sindzisa swaku a funga, se a ta ka altari ya yindlo leyi hi mhaka ya leswi a nga funga,*+
32 ni kombela u mu yingisa na u li koseno matilweni, u tlhela u mu yavanyisa hi ku ya hi leswi a swi yendlaka. Lweyi a yendlaka swa ku biha mu voni nandzu u tlhela u mu khatisa, lweyi wa ku lulama swi voni swaku a nga na nandzu u tlhela u mu hakela hi mintirho ya yena yayinene.+
33 “Loko vanhu va wena, ku nga Vayisrayele va hluliwa hi valala va vona hi mhaka ya leswi va nga ku djohela hi ku phindhaphindha,+ se va tlhelela ka wena swaku va dzunisa vito la wena,+ va tlhela va khongela ni ku kombela swaku u va ni timpsalu ka vona na va li ka yindlo leyi,+
34 ni kombela u yingisa na u li koseno matilweni, u rivalela vanhu va wena, ku nga Vayisrayele xidjoho xa vona, u tlhela u va tlhelisela ka tiko leli u nga nyika vavhovho va vona.+
35 “Loko matilo ma pfaliwile naswona ku nga ni mpfula+ hi mhaka ya leswi va nga ku djohela hi ku phindhaphindha,+ se va khongela ka wena na va txuvuke lani yindlo leyi yi nga kona, va dzunisa vito la wena, va gama va tshika ku yendla swidjoho leswi a va swi yendla hi mhaka leswi u nga va khatisa,+
36 ni kombela u yingisa na u li koseno matilweni, u rivalela xidjoho xa vanhu va wena, ku nga Vayisrayele, hikusa u ta va djondzisa+ ndlela yayinene leyi va faneleke va famba ka yona; u tlhela u yendla swaku mpfula yi na ka tiko leli+ u nga va nyika lona swaku li va tshomba la vona.
37 “Loko ko tshuka ku va ni ndlala+ kumbe mavabyi, kumbe mpfula yi nga ni,* ku fa swinsinyani,+ ku va ni mintete leyi wonhetelaka, kumbe loko valala va vona va tshuka va va hlasela ka doropa lin’wani ni lin’wani la tiko la vona kumbe loko va tshuka va kumana ni ntungu wun’wani ni wun’wani kumbe mavabyi man’wani,+
38 xikhongelo xin’wani ni xin’wani, xikombelo xin’wani ni xin’wani xa ku kombela timpsalu+ lexi nga ta yendliwa hi munhu mun’wani ni mun’wani kumbe hi vanhu va wena hinkwavu, ku nga Vayisrayele, (hikusa mun’wani ni mun’wani a tiva leswi mu karhataka ka mbilu ya yena)+ loko va khongela na va txuvuke lani yindlo leyi yi nga kona,
39 ni kombela u va yingisa na u li koseno tilweni, lani u tshamaka kona+ naswona u va rivalela+ u va pfuna u tlhela u hakela mun’wani ni mun’wani hi ku ya hi leswi a swi yendlaka,+ hikusa u tiva mbilu ya yena (hi wena ntsena u ti tivaka kahle timbilu ta vanhu hinkwavu),+
40 swaku va ta ku hlonipha masiku hinkwawu lawa va nga ta hanya ka tiko leli u nga li nyika vavhovho va hina.
41 “Ni loko vanhu lava taka hi ka matiko man’wani, lava kalaka va nga li Vayisrayele, lava taka hi ka matiko ya le kule hi mhaka ya vito la wena+
42 (hikusa va ta twa hi vito la wena lalikulu,+ voko la wena la matimba ni matimba ya wena yamakulu),* va fika va khongela na va txuvuke lani yindlo leyi yi nga kona,
43 ni kombela u yingisa na u li koseno matilweni, lani u tshamaka kona,+ u tlhela u yendlela hinkwavu lava taka hi ka matiko man’wani hinkwaswu leswi va nga ta ku kombela swona; yendla leswo swaku vanhu hinkwavu amisaveni va ta tiva vito la wena va tlhela va ku hlonipha+ ku fana ni leswi vanhu va wena, ku nga Vayisrayele, va yendlisaka swona, va tlhela va tiva swaku vito la wena la dzunisiwa ka yindlo leyi ni nga ku yakela yona.
44 “Loko vanhu va wena va ya nyimpini va ya lwa ni nala wa vona ku nga na mhaka swaku va kwini,+ se va khongela+ ka wena Yehovha na va txuvuke doropa leli u nga li langa+ ni lani yindlo leyi ni nga yi yaka swaku ku dzunisiwa vito la wena yi nga kona,+
45 ni kombela u yingisa xikhongelo xa vona na u li koseno matilweni, u swi twa loko va ku kombela swaku u va ni timpsalu ka vona, u tlhela u va pfuna.
46 “Loko va tshuka va ku djohela (hikusa a ku na munhu lweyi a kalaka a nga djohi),+ se u va kwatela, u tlhela u va nyikela ka valala va vona, va gama va va khoma va ya va yendla swikarawa ka tiko la vona, ka kule kumbe kusuhi,+
47 kutani va tisola na va li ka tiko leli va nga tekiwa va ya yendliwa swikarawa ka lona,+ va gama va tlhelela ka wena+ va tlhela va kombela swaku u va rivalela na va li ka tiko leli va nga yendliwa swikarawa ka lona,+ va ku: ‘Hi djohile hi ku yendla swa ku biha, naswona hi ni nandzu,’+
48 se va tlhelela ka wena hi timbilu ta vona hinkwatu+ ni hi wutomi* la vona hinkwalu na va li ka tiko la valala va vona lava nga va yendla swikarawa, va khongela ka wena na va txuvuke tiko leli u nga li nyika vavhovho va vona ni doropa leli u nga li langa ni yindlo leyi ni nga ku yakela swaku ku dzunisiwa vito la wena ka yona,+
49 ni kombela u yingisa xikhongelo xa vona na u li koseno matilweni,+ u swi twa loko va ku kombela swaku u va ni timpsalu ka vona, u tlhela u va pfuna,
50 u rivalela vanhu va wena lava nga ku djohela, u va rivalela swidjoho swa vona hinkwaswu. U ta yendla swaku lava va nga va yendla swikarawa va va twela wusiwana, se va ta gama va va twela wusiwana,+
51 (hikusa i vanhu va wena ni tshomba la wena+ naswona u swi vonile swaku aGibita+ a va hlupheka hintamu, ku fana ni nsimbi leyi pshaka hi ndzilu u gama u va humesa).+
52 Matihlo ya wena a ma ni txuvuke loko ni kombela swaku u va ni timpsalu ka mina,+ u tlhela u twa vanhu va wena, ku nga Vayisrayele, minkama hinkwayu loko va khongela va ku kombela swaku u va ni timpsalu ka vona.+
53 Hikusa wena Yehovha Hosi Leyikulu, u va langile ka vanhu hinkwavu va misava swaku va va tshomba la wena,+ hi ku ya hi leswi u nga swi hlaya hi ku tirhisa Moxe mutirheli wa wena nkama u nga humesa vavhovho va hina aGibita.”
54 Hi ku hantlisa nkama Solomoni a nga gama ku yendla xikhongelo hinkwaxu lexi ka Yehovha ni ku kombela swaku a va ni timpsalu ka yena, a sekeleka a nyima phambheni ka altari ya Yehovha, lani a a khizame kona, na a tlakuse mavoko a kombeta tilweni.+
55 A sekelekile a nyima a gama a vulavula hi rito lalikulu a katekisa Vayisrayele hinkwavu lava a va tlhanganile, a ku:
56 “A ku dzunisiwe Yehovha lweyi a nga nyika vanhu va yena, ku nga Vayisrayele, ndhawu ya ku humula ka yona hi ku ya hi leswi a nga tshembisa swona.+ Minchumu hinkwayu yayinene leyi a nga yi tshembisa hi ku tirhisa mutirheli wa yena Moxe yi yendlekile.+
57 Yehovha Xikwembu xa hina a a ve na hina ku fana ni leswi a nga va ni vavhovho va hina.+ A nga hi tshiki kumbe a hi khohlwa.+
58 Xikwembu a xi hi yendli hi navela+ ku famba ka tindlela ta xona hinkwatu, ni ku yingisa minawu ya xona, ni swiboho swa xona swa ku yavanyisa leswi xi nga byela vavhovho va hina swaku va swi yingisa.
59 Leswi ni nga swi hlaya, na ni kombela Yehovha hi ku tiveka hansi swaku a va ni timpsalu ka mina, Yehovha Xikwembu xa hina a a swi khumbuki wusiku ni nhlikanhi, swaku mina ni vanhu va yena, ku nga Vayisrayele, hi ta yavanyisiwa hi ndlela yayinene, hi ku ya hi leswi nga ta laveka siku ni siku,
60 swaku vanhu hinkwavu amisaveni va ta swi tiva swaku Yehovha i Xikwembu xa ntiyiso,+ a ku na xin’wani!+
61 Se tirhelani Yehovha Xikwembu xa hina hi timbilu ta n’wina hinkwatu+ hi ku yingisa minawu ya yena ni leswi a hi byelaka swona ku fana ni leswi mi swi yendlaka namuntlha.”
62 Kutani hosi ni Vayisrayele hinkwavu va yendlela Yehovha magandzelo ya manyingi.+
63 Solomoni a yendlela Yehovha magandzelo ya ku kombela ku rhula.+ A dlaye 22.000 wa tihomu ni 120.000 wa tinyempfu. Se hosi Solomoni ni Vayisrayele hinkwavu va khangula* yindlo ya Yehovha.+
64 Hi siku lolelo hosi a yi fanele yi yendla swaku ndhawu leyi nga xikarhi ka kintari leyi nga phambheni ka yindlo ya Yehovha yi va ya ku kwetsima, hikusa a yi fanele yi yendlela kona magandzelo ya ku hisiwa, magandzelo ya swakudla ni mafurha* ya magandzelo ya ku kombela ku rhula; a yi fanele yi yendla leswo hikusa altari ya kobre+ leyi nga phambheni ka tempele ya Yehovha a yi li yitsongo swaku ku yendliwa magandzelo ya ku hisiwa, magandzelo ya swakudla ni mafurha+ ya magandzelo ya ku kombela ku rhula ka yona.
65 Hi nkama wolowo Solomoni ni Vayisrayele hinkwavu va hamba fexta,+ a ku ni xitshungu xaxikulu lexi a xi ta hi Lebo-Amati ku ya fika ni ka Nkova wa Gibita.+ A fexta leli li yendliwe phambheni ka Yehovha Xikwembu xa hina, naswona li hete 7 wa masiku ni 7 wa masiku man’wani, hinkwawu ka wona a ma li 14.
66 Hi mundzuku* ka kona, hosi Solomoni a tshika vanhu va famba, se vanhu va katekisa hosi Solomoni va gama va famba na timbilu ta vona ti tsakile hi mhaka minchumu hinkwayu yayinene+ leyi Yehovha a nga yi yendlela Davhida mutirheli wa yena ni vanhu va yena, ku nga Vayisrayele.
Tinhlamunselu ta le hansi
^ Ku nga Fexta la Minchacha.
^ Vona Xiyengetelo B15.
^ Rito la Xiheberu li nga tirhisiwa lani, li kombisa swaku loko ko tsumbuliwa swaku leswi munhu a nga swi funga a hi ntiyiso a a ta khatisiwa.
^ Kumbe: “ku va ni djandza”.
^ Hi Xiheberu: “voko la yena leli nga tshandzavutiwa”.
^ Hi Xiheberu: “néfesh”. Vona Ntlhamuselo.
^ Kumbe: “inagorara”.
^ Kumbe: “gordura”.
^ Hi Xiheberu: “hi siku la wu 8”. Ku nga siku leli landzelaka ka siku la wu 7 ka vhiki la wumbirhi na va hamba fexta.
