Tikronika Ta Ku Sungula 10:1-14
-
Sawulo ni vana va yena va fa (1-14)
10 Vafilista a va lwa ni Vayisrayele. Se masonchwa ya Israyele ma baleka Vafilista, funtshi ku dlayiwe masonchwa ya manyingi ya Vayisrayele ka Ntshava ya Jilbowa.+
2 Vafilista va hlongolisa Sawulo ni vana va yena, va gama va dlaya Yonatani, Abinadabi na Malakixuwa,+ vana va Sawulo.
3 A nyimpi yi ya yi hisa lani Sawulo a a li kona, kutani lava va ku txopa mimpaxwa* va mu vona, va mu vavisa.+
4 Sawulo a gama a byela lweyi a a mu khomela matlharhi ya yena a ku: “Teka xipada xa wena u ni dlaya, swaku vavanuna lava va kalaka va nga tirheli Xikwembu* va nga fiki va ni dlayisa ximona.”+ Kambe lweyi a a khoma matlharhi ya yena a nga pfumelanga hikusa a a chava hintamu. Se Sawulo a teka xipada a titlhava hi xona.+
5 A nkama lweyi a a khoma matlharhi ya Sawulo a nga vona swaku a file, na yena a titlhava hi xipada xa yena a fa.
6 Kutani Sawulo ni vana va yena vavanharhu ni hinkwavu vandjangu wa yena lava a va li na yena va file hi siku lolelo.+
7 A nkama Vayisrayele hinkwavu lava a va tshama ka nkova va nga vona swaku masonchwa hinkwawu ya Vayisrayele ma balekile, ni swaku Sawulo ni vana va yena va file na vona va baleka va siya madoropa ya vona; se Vafilista va fika va tshama ka wona.
8 Hi mundzuku ka kona, nkama Vafilista va nga ta va ta teka mpahla ya lava va nga dlayiwa ni minchumu ya vona, va kuma swaku Sawulo ni vana va yena va file ka Ntshava ya Jilbowa.+
9 Kutani va tsema nhloko ya Sawulo va teka mpahla ya yena ya nyimpi, va gama va rhuma vanhu va ya ka tiko hinkwalu la Vafilista ni ka swikwembu swa vona+ va ya byela vanhu hinkwavu leswi nga yendleka.
10 Se va teka mpahla ya yena ya nyimpi va ya yi veka ka tempele ya xikwembu xa vona, va gama va gongondzela nhloko ya yena ka tempele ya Dagoni.+
11 A nkama hinkwavu lava a va tshama Yabexi+ aJiliyadi va nga twa hinkwaswu leswi Vafilista va nga mu yendla swona Sawulo,+
12 masonchwa hinkwawu ya matimba ma ye ma ya teka ntsumbu wa Sawulo ni mintsumbu ya vana va yena. Ma famba na yona aYabexi, ma fika ma lahla marhambu ya vona aYabexi+ ahansi ka nsinya wawukulu ma gama ma heta 7 wa masiku na ma titsona swakudla.
13 Sawulo a file hi mhaka ya leswi a kalaka a nga tshembekanga ka Yehovha, hikusa a nga swi yingisanga leswi Yehovha+ a nga swi hlaya ni hi mhaka ya leswi a nga ya hlahluva ka nyanga+
14 a tshika ku vutisa Yehovha. Kutani A mu dlayile a teka wuhosi a li nyika Davhida n’wana wa Yese.+
