Tikronika Ta Ku Sungula 11:1-47
11 Hi ku famba ka nkama Vayisrayele hinkwavu va ya ka Davhida aHebroni,+ va fika va ku: “Wa swi tiva swaku hina hi maxaka ya wena.+
2 Nkama lowu Sawulo a a li hosi, hi wena a wu hi rhangela loko hi ya nyimpini.+ Yehovha Xikwembu xa wena a ku byele a ku: ‘U ta risa vanhu va mina ku nga Vayisrayele funtshi u ta va murhangeli wa vanhu va mina ku nga Israyele.’”+
3 Kutani madoda hinkwawu ya Israyele ma ya ka Davhida aHebroni, se yena a yendla ntwananu na wona aHebroni phambheni ka Yehovha. Ma gama ma mu chela mafurha swaku a va hosi ya Israyele,+ hi ku ya hi leswi Yehovha a nga swi hlaya hi ku tirhisa Samuwele.+
4 Hi ku famba ka nkama, Davhida ni Vayisrayele hinkwavu va ya Yerusalema ku nga Yebusi,+ lani Vayebusi+ a va tshama kona.
5 Kutani lava a va tshama aYebusi va poyila Davhida va ku: “A wu nga ta ku nghena la!”+ Kambe, Davhida a hlula a tlhela a teka doropa leli nga ni mimuru ya ku tiya la Siyoni,+ leli swoswi li nga Doropa la Davhida.+
6 Kutani Davhida a ku: “Lweyi a nga ta rhanga a dumela Vayebusi, ni ta mu veka swaku a va murhangeli wa masonchwa.” Kutani Yowabu+ n’wana wa Zeruya a va wa ku sungula, a gama a vekiwa a va murhangeli wa masonchwa.
7 Se Davhida a sungula ku tshama ka doropa leli nga ni mimuru ya ku tiya. Hi leswo swi nga yendla li chuliwa swaku i Doropa la Davhida.
8 Davhida a gama a sungula ku yaka a rhendzela hinkwaku ku sukela ka Ganga ni ka tindhawu tin’wani ta le kusuhi funtshi Yowabu a hetise ku yaka tlhelo lelin’wanyani leli a li salile ka doropa.
9 Kutani Davhida a ya a va ni ntamu swinene+ funtshi Yehovha murhangeli wa tintsumi a a li na yena.
10 Lava i varhangeli va masonchwa ya matimba ya Davhida, lava va nga mu seketela hintamu ka wuhosi la yena ni tiko hinkwalu la Israyele, ni ku mu yendla hosi hi ku ya hi leswi Yehovha a nga swi hlaya hi tiko la Israyele.+
11 Lawa i mavito ya masonchwa ya matimba ya Davhida: Yaxobeyami+ n’wana wa Takimoni, murhangeli wa masonchwa manharhu ya matimba.+ A tshame a dlaya 300 wa vavanuna hi tlharhi hi nkama wun’we.+
12 Ku landzela Eliyazari+ n’wana wa Dodo wa le Ahowi.+ Yena a a li mun’we wa masonchwa manharhu ya matimba.
13 A a na Davhida aPaxi-Damimi,+ lani Vafilista a va hlengeletanile kona swaku va ta lwa nyimpi na vona. Kolanu a ku ni masimu lawa a ma ni maxalani* ya manyingi se masonchwa ma baleka hi mhaka ya ku chava Vafilista.
14 Kambe Xamaya a nyima xikarhi ka nsimu, a yi vhikela a tlhela dlayetela Vafilista a za Yehovha a va pfuna swaku a va hlula hintamu.+
15 Ka 30 wa varhangeli ku suke vavanuna vanharhu va ya ka Davhida, ka mhakwa* lowu a wu li ka ribye la Adulami,+ hi nkama wolowo masonchwa ya Vafilista a ma gwimbe matende ka Nkova wa Refayimi.+
16 Hi nkama wolowo Davhida a a li ka ndhawu ya ku tumbela kasi Vafilista a va gwimbe matende aBetlehema.
17 Davhida a gama a ku: “Ni navela ku phuza mati ya xihlovo lexi nga kusuhi ni nyanghwa wa Betlehema!”+
18 Kutani masonchwa manharhu ma nghena hi nkanu lani Vafilista a va gwimbe kona matende, ma fika ma kha mati ka xihlovo lexi a xi li kusuhi ni nyanghwa wa Betlehema, ma gama ma nyika Davhida; kambe a yala ku phuza a gama a ma diba phambheni ka Yehovha.
19 A ku: “A ni nge swi yendli leswi hikusa a hi swinene hi ku ya hi mavonelo ya Xikwembu xa mina! Ni nga yi phuzisa ku yini ngati ya vavanuna lava, va nga veka wutomi la vona nghozini?+ A nga pfumelanga ku ma phuza.” Hikusa va veke wutomi la vona nghozini hi ku ya kha mati. Leswi hi leswi nga yendliwa hi masonchwa ya yena ya manharhu ya matimba.
20 Abixayi+ makwavu wa Yowabu,+ a a lumba ntlawa wun’wani wa masonchwa manharhu. Se yena a a li murhangeli wa wona; a tshame a dlaya 300 wa vavanuna hi tlharhi, funtshi a a tiviwa hintamu ku fana ni leswi masonchwa manharhu ya Davhida a ma tivisiwa xiswona.+
21 Hambileswi a a hloniphiwa hintamu ku tlula masonchwa lawayani ya mambirhi lawa a a li murhangeli wa wona; a a nga fiki ka masonchwa manharhu ya Davhida.
22 Benaya+ n’wana wa Yoyada a a nga chavi nchumu funtshi a yendle swilo swa swinyingi aKabizeli.+ A dlaye vana vambirhi va Ariyeli wa le Mowabu funtshi a tshama a nghena ka xihlovo a dlaya nghonyama hi siku leli a ku ni gamboko* yayikulu.+
23 A tlhele a dlaya wanuna wa Mugibita lweyi a a lehe hintamu, a a lehe kolomuyani ka mametru manharhu.*+ Hambileswi Mugibita lweyi a a khome tlharhi leli nhonga ya lona a yi li yikulu ku fana ni mhandzi leyi va lukelaka ka yona tinguvu,+ Benaya a mu yelile na a khome nhonga, a fika a mu tekela tlharhi la yena a mu dlaya hi lona.+
24 Leswo, hi leswi swi nga yendliwa hi Benaya n’wana wa Yoyada funtshi a a tiviwa hintamu ku fana ni masonchwa manharhu ya Davhida.
25 Hambileswi a a hloniphiwa hintamu ku tlula masonchwa laman’wani ka lawa ya 30, a a nga fani ni masonchwa manharhu ya Davhida.+ Kambe Davhida a mu yendle swaku a va murhangeli wa vagwardu va yena.
26 Masonchwa ya matimba a ku li Azayeli+ makwavu wa Yowabu, Eliyanani n’wana wa Dodo wa le Betlehema,+
27 Xamoti wa le Arori, Elezi wa le Peloni,
28 Ira+ n’wana wa Ikexi wa le Tekowa, Abiyezeri+ wa le Anatoti,
29 Sibekayi+ wa le Huxa, Ilayi wa le Ahowi,
30 Maharayi+ wa le Netofa, Elede+ n’wana wa Bahana wa le Netofa,
31 Itayi n’wana wa Ribayi wa le Jibiya, ndhawu leyi lumbaka va lixaka la ka Benjamini,+ Benaya wa le Piratoni,
32 Urayi lweyi a taka hi ka nkova wa Gaxi,+ Abiyeli wa le Araba,
33 Azimavheti wa le Bayurimi, Eliyahaba wa le Xalibimi,
34 vana va Axemi wa le Jizoni, Yonatani n’wana wa Xagi wa le Arari,
35 Ahiyamu n’wana wa Sakari wa le Arari, Elifali n’wana wa Uri,
36 Eferi wa le Mexera, Ahiya wa le Peloni,
37 Ezro wa le Karmeli, Narayi n’wana wa Ezibayi,
38 Yuwele makwavu wa Natani, Mibari n’wana wa Agiri,
39 Zeleki wa Muamoni, Naharayi wa le Beroti, lweyi a a khoma matlharhi ya Yowabu n’wana wa Zeruya;
40 Ira wa le Itira, Garebi wa le Itira,
41 Uriya+ wa Muheti, Zabadi n’wana wa Ahalayi,
42 Adina n’wana wa Xiza wa va ka Rubeni, lweyi a a li murhangeli wa lixaka la ka Rubeni, ni 30 wa vanhu lava a a li na vona;
43 Hanani n’wana wa Maka, Yoxafati wa le Mitina,
44 Uziya wa le Axiteroti, Xama na Yeyiyele, n’wana wa Otami wa le Arowa;
45 Yediyayele n’wana wa Ximiri na Yoha makwavu wa yena wa le Tizi;
46 Eliyeli wa le Mahavhi, Yeribayi na Yoxavhiya vana va Elinami na Itima wa Mumowabu;
47 Eliyeli, Obede na Yaziyele wa le Mezoba.
Tinhlamunselu ta le hansi
^ Kumbe: “sevhada”.
^ Ku nga mbhovo lowu kumekaka ka ntshava kumbe ka ribye.
^ Kumbe: “neve.” I minchumu ya ku basa yi ku baa ku fana ni jelu.
^ Hi Xiheberu: “5 wa swisungunu.” Vona Xiyengetelo B14.
