Tikronika Ta Ku Sungula 12:1-40
-
Lava a va seketela wuhosi la Davhida (1-40)
12 Lava i vavanuna lava nga ya ka Davhida aZikilagi+ nkama lowu a a baleka Sawulo+ n’wana wa Kixi funtshi i van’wani va masonchwa ya matimba lawa a ma mu pfuna nyimpini.+
2 A va tirhisa ligubu funtshi a va kota ku tirhisa voko la xinene ni la ximatsi+ swaku va txopa maribye+ hi xibalakatsa kumbe ku txopa mimpaxwa* hi ligubu. A va li vamakwavu va Sawulo, ka lixaka la ka Benjamini.+
3 Murhangeli wa vona a ku li Ayiyezeri, ku gama ku landzela Yowaxi, havambirhi a va li vana va Xemaha wa le Jibiya.+ A ku na Yeziyele na Peleti vana va Azimavheti,+ Beraka na Yewu, wa le Anatoti,
4 Iximaya wa le Gibiyoni,+ lweyi a a li mun’we ka 30+ wa masonchwa ya matimba a tlhela a va murhangeli wa wona, ku patsa na Yeremiya, Yahaziyele, Yohanani, Yozabadi wa le Jedera,
5 Eluzayi, Yerimoti, Beyaliya, Xemariya, Xefatiya wa le Arifi,
6 Elkana, Ixaya, Azareli, Yowezeri na Yaxobeyami, va ka Kora;+
7 na Yuwela, Zebadiya vana va Yerohamu wa le Jedori.
8 Van’wani va vana va Gadi va ye lani Davhida a a tumbele kona amananga;+ a va li masonchwa ya matimba, lawa a ma djondzisiwe ku lwa nyimpi, a va khoma xivhikelo xaxikulu ni tlharhi, tinghohe ta vona a ti fana ni ta tinghonyama funtshi a va tsutsuma ku fana ni timhunti loko ti tsutsuma henhla ka tintshava.
9 Ezere a a li murhangeli wa vona, Obadiya a a li wa wumbirhi, Eliyabi a a li wa wunharhu,
10 Miximana a a li wa wu 4, Yeremiya a a li wa wu 5,
11 Atayi a a li wa wu 6, Eliyeli a a li wa wu 7,
12 Yohanani a a li wa wu 8, Elizabadi a a li wa wu 9,
13 Yeremiya a a li wa wu 10, Makibanayi a a li wa wu 11.
14 Lava a va li vana va Gadi,+ ku nga varhangeli va masonchwa. A wamutsongo ka vona a a kota ku lwa ni 100 wa masonchwa kasi a wamukulu a a kota ku lwa ni 1.000.+
15 Lava hi vona va nga tsemakanya Nambu wa Yordani hi wheti ya ku sungula hi nkama lowu nambu a wu talile funtshi va hlongole vanhu hinkwavu lava tshamaka ka tindhawu leti ti kalaka ti nga na tintshava kumbe maganga anze ka tlhelo la le wuxeni ni la wupeladlambu.
16 Vavanuna van’wani va ka Benjamini ni va ka Yuda na vona va ye lani Davhida a a tumbele kona.+
17 Kutani Davhida a va yela a fika a ku: “Loko mi te ka mina hi swaswinene leswaku mi ta ni pfuna, hi ta va vanghanu. Kambe loko mi tele ku ta ni xenga leswaku mi ni nyikela ka valala va mina hambileswi ni kalaka ni nga wonhanga nchumu, Xikwembu xa vavhovho va mina a xi swi voni xi gama xi mi yavanyisa.”+
18 Se Amasayi,+ murhangeli wa 30 wa masonchwa a tala hi moya wa ku kwetsima wa Xikwembu, a gama a ku:
“Hi vatirhi va wena, Wena Davhida n’wana wa Yese+ funtshi hi ta nyima na wena.
Vana ni ku rhula, wena ni lweyi a ku pfunaka,Hikusa Xikwembu xa wena xa ku pfuna.”+
Se Davhida a va yamukela a gama a va veka swaku va va van’wani va varhangeli va masonchwa.
19 Van’wani ka va ka Manasi na vona va balekile va ya ka Davhida hi nkama lowu a a fambe ni Vafilista swaku a ya va pfuna ku lwa na Sawulo; kambe a nga ha va pfunanga, hikusa loko tihosi ta Vafilista+ se ti bulile, ti game ti mu tlhelisa ti ku: “A nga hi djikela a nyima ni hosi ya yena Sawulo se hi dlayiwa.”+
20 Nkama a nga fika Zikilagi,+ lava va nga baleka va ya ka yena na va ta hi ka va ka Manasi, hi lava: Adinayi, Yozabadi, Yediyayele, Mikayele, Yozabadi, Elihu na Ziletayi, mun’wani ni mun’wani wa vona a a rhangela mintlawa ya 1.000 wa masonchwa ya va ka Manasi.+
21 Va pfune Davhida ku lwa ni masonchwa lawa ma teketelaka minchumu ya vanhu, hikusa hinkwavu a va li vavanuna va matimba ni lava kalaka va nga chavi+ funtshi va ve varhangeli va masonchwa.
22 Siku ni siku vanhu a va ya ka Davhida+ swaku va ya mu pfuna, va za va tala ku fana ni ntlawa wawukulu wa masonchwa, lowu fanaka ni wa Xikwembu.+
23 Leyi i numeru ya varhangeli lava nga tilulamisela ku lwa nyimpi, va gama va ya ka Davhida aHebroni,+ swaku va ya mu pfuna ku teka wuhosi ka Sawulo, hi ku ya hi leswi Yehovha a nga swi hlaya.+
24 Vavanuna va Yuda lava a va tshama na va tilulamisele ku lwa nyimpi, lava a va khoma xivhikelo xaxikulu ni tlharhi a va li 6.800.
25 Ka va ka Simiyoni, a ku ni 7.100 wa masonchwa lawa ma kalaka ma nga chavi nchumu.
26 Ka Valevhi a ku ni 4.600.
27 Yoyada+ a a li murhangeli wa vana va Aroni+ funtshi a a ni 3.700 wa masonchwa
28 na Zadoki+ sonchwa leli nga ni matimba la ku kala li nga chavi nchumu ku patsa ni 22 wa varhangeli lava va nga psaliwa ka ndjangu wa papayi wa yena.
29 Ka va ka Benjamini, lava a va li vamakwavu va Sawulo,+ a ku ni 3.000, vanyingi va vona va tshame va vonelela yindlo ya Sawulo.
30 Ka va ka Efrayimi a ku ni 20.800 wa vavanuna va matimba va ku kala va nga chavi nchumu va tlhela va tiviwa hintamu ka mindjangu ya vapapayi va vona.
31 Ka hafu ya lixaka la Manasi, ku langiwe 18.000 wa vanhu swaku va ta veka Davhida a va hosi.
32 Ka lava taka hi ka lixaka la Isakara, lava a va kota ku twisisa minkama ni ku tiva leswi Vayisrayele a va fanele va swi yendla, a ku li 200 wa varhangeli lava a va rhangela vamakwavu va vona hinkwavu.
33 Ka va ka Zebuloni, a ku ni 50.000 wa vanhu lava a va tshame na va tilulamisele ku lwa nyimpi, hinkwavu a va ni matlharhi hinkwawu ya nyimpi funtshi a va seketela Davhida hi mbilu hinkwayu.
34 Ka va ka Naftali a ku li ni 1.000 wa varhangeli na va ni 37.000 wa masonchwa lawa a ma ni xivhikelo xaxikulu ni tlharhi.
35 Ka va ka Dani, lava a va tshame na va tilulamisele ku lwa nyimpi a va li 28.600.
36 Ka va ka Aseri, lava a va tshame na va tilulamisele ku lwa nyimpi a va li 40.000.
37 Ka tlhelo lelin’wani la Yordani,+ ka va ka Rubeni, va ka Gadi ni hafu ya lixaka la ka Manasi, a ku ni 120.000 wa masonchwa lawa a ma li ni matlharhi hinkwawu ya nyimpi.
38 Hinkwavu ka vona a va li masonchwa lawa a ma tshame na ma tilulamisele ku lwa nyimpi; va ye Hebroni na va tinyimisele ku veka Davhida swaku a va hosi ya tiko hinkwalu la Israyele. Vayisrayele lavan’wani hinkwavu na vona a va pfumelelanile ku veka Davhida swaku a va hosi.+
39 Va tshame na Davhida masiku manharhu aHebroni, na va dla ni ku nwa hikusa vamakwavu va vona a va va lunghiselelile.
40 Lava a va tshama kusuhi na vona ni lava a va li kule ku ya fika ka tiko la Isakara, Zebuloni ni la Naftali, a va tisa swakudla hi timbongolo, tihomu ni makamela. A va tisa trigu, mabolu ya ku hambiwa hi makuwa* ya ku womisiwa, mabolu ya ku hambiwa hi mawuvha ya ku womisiwa, vhinyu, mafurha, tihomu ta tinyingi ni tinyempfu ta tinyingi, hikusa a ku tsakiwile aIsrayele.
