Tikronika Ta Ku Sungula 13:1-14
13 Davhida a vulavula ni lava a va rhangela mintlawa ya 1.000 wa masonchwa ni lava a va rhangela mintlawa ya 100 wa masonchwa ku patsa ni varhangeli lavan’wani hinkwavu.+
2 Se Davhida a byela xitshungu hinkwaxu xa Israyele a ku: “Loko mi swi vona swi li kahle swi tlhela swi yamukeleka ka Yehovha Xikwembu xa hina, a hi rhumeni vanhu swaku va ya ka vamakwerhu lava va nga sala ka tindhawu hinkwatu ta Israyele ni ka vaprista ni Valevhi lava va nga ka madoropa ya vona+ lawa ma nga ni tindhawu ta ku lusela ka tona, va ya va byela swaku va ta tlhangana na hina.
3 A hi landzeni Areka+ ya Xikwembu xa hina.” Hikusa a va nga yi hlayisi ka nkama wa Sawulo.+
4 Vanhu hinkwavu lava a va li kona va pfumelile ku yendla leswo hikusa a va swi vona swi li kahle.
5 Se Davhida a hlengeleta Vayisrayele hinkwavu ku sukela ka nambu wa Gibita ku ya fika aLebo-Amati,*+ swaku va landza Areka ya Xikwembu xa ntiyiso aKiriyati-Yerimi.+
6 Kutani Davhida ni Vayisrayele hinkwavu va ya Bala+ aKiriyati-Yerimi, ku nga doropa la Yuda, va ya teka Areka ya Yehovha Xikwembu xa ntiyiso, lweyi a tshamaka henhla* ka makerubu,+ lani vito la yena li vitaniwaka kona.
7 Kambe va teka Areka ya Xikwembu xa ntiyiso va yi pakela ka nyolo* ya nyuwani+ swaku va yi susa ka munti wa Abinadabi. Uza na Ayo hi vona lava a va rhangela nyolo yoleyo ya nyuwani.+
8 Davhida ni Vayisrayele hinkwavu a va txina na va tsakile, va txinela Xikwembu xa ntiyiso, na va yimbelela va tlhela va chaya tiharipa, switende, swingomana,+ timhalamhala,*+ ni swa ku chaya hi swona swa nsimbi swa ku fana ni maparatu.*+
9 Nkama va nga fika Kidoni ka ndhawu leyi va phepheraka ka yona minchumu, Uza a tshandzavuta voko a khoma Areka hikusa a ku sale katsongo swaku tihomu ti yi wisa.
10 Se Yehovha a mu kwatela hintamu Uza, A gama a tekela ku mu dlaya hi mhaka ya leswi a nga khoma Areka.+ A vhele a fela kolanu phambheni ka Xikwembu.+
11 Davhida a gama a kwata hi mhaka ya leswi Yehovha a nga dlaya Uza; kutani ndhawu liyani yi chuliwa swaku i Perezi-Uza* ku ta fika ninamuntlha.
12 Hi siku lolelo Davhida a xi chava hintamu Xikwembu xa ntiyiso a gama a ku: “Ni ta yi tekisa ku yini Areka ya Xikwembu xa ntiyiso yi ta ka doropa la mina?”+
13 Davhida a nga ha yi tekanga Areka a yi yisa lani a a tshama kona ku nga Doropa la Davhida, kambe a byele vanhu swaku va yi yisa kaya ka Obede-Edomu lweyi wa Mugati.
14 Areka ya Xikwembu xa ntiyiso a yi li ka ndjangu wa Obede-Edomu, yi tshame kaya ka yena tiwheti tinharhu, se Yehovha a katekisa ndjangu wa Obede-Edomu ni hinkwaswu leswi a a li na swona.+
Tinhlamunselu ta le hansi
^ Kumbe: “ka nyanghwa wa Amati”.
^ Kumbexana: “axikarhi”.
^ Kumbe: “n’qolo; kalichi”.
^ Ku nga minchumu ya ku hambiwa hi timhondzo kumbe tinsimbi, swi chaya ku fananyana ni vhuvhuzela.
^ I minchumu yimbirhi ya ku fana ni maparatu ya ku chaya hi yona muzika, leyi nga yendliwa hi kobre, naswona a yi bananisiwa swaku yi ta chaya.
^ Leswi vulaka “Ku Kwateliwa Ka Uza”.