Tikronika Ta Ku Sungula 16:1-43
16 Se va teka Areka ya Xikwembu xa ntiyiso va ya yi veka ka tende leli Davhida a a li yendlele yona;+ kutani va yendlela Xikwembu xa ntiyiso magandzelo ya ku hisiwa ni magandzelo ya ku kombela ku rhula.+
2 Nkama Davhida a nga gama ku yendla magandzelo ya ku hisiwa+ ni magandzelo ya ku kombela ku rhula,+ a katekisa vanhu hi vito la Yehovha,
3 a tlhela a nyika Vayisrayele hinkwavu, vavanuna hinkwavu ni vavasati hinkwavu pawu la redondu, bolu la ku hambiwa hi mihandzu ya minsinya ya mintxindzu* ni bolu la ku hambiwa hi mawuvha ya ku woma.
4 Kutani a langa Valevhi van’wani swaku va tirha lani Areka ya Yehovha a yi li kona,+ va hlonipha,* va khensa ni ku dzunisa Yehovha Xikwembu xa Israyele.
5 Azafi+ a a li murhangeli wa vona, wa wumbirhi a ku li Zakariya; se Yeyiyele, Xemiramoti, Yehiyele, Matitiya, Eliyabi, Benaya, Obede-Edomu na Yeyiyele+ a va chaya switende ni tiharipa;+ kasi Azafi a a chaya minchumu ya nsimbi ya ku fana ni maparatu.*+
6 Benaya na Yahaziyele lava a va li vaprista, a va chaya timhalamhala* nkama ni nkama lani areka ya ntwananu wa Xikwembu xa ntiyiso a yi li kona.
7 Ku ve hi siku lolelo Davhida a nga sungula ku yendla lisimu la ku khensa Yehovha hi ku tirhisa Azafi+ ni vamakwavu, leli a li ku:
8 “Khensani Yehovha+ mi dzunisa vito la yena,Byelani vanhu mintirho ya yena!+
9 Mu yimbeleleleni, mi mu dzunisa hi tinsimu,+Pimisani* hi mintirho ya yena hinkwayu ya ku hlamalisa.+
10 Tikhuzeni hi vito la yena la ku kwetsima,+
Timbilu ta lava va lavaka Yehovha a ti tsake.+
11 Lavetelani Yehovha+ ni matimba ya yena.
Mu laveteleni nkama hinkwawu.+
12 Khumbukani mintirho ya yena ya ku hlamalisa leyi a nga yi yendla,+Masingita ya yena ni leswi a nga yavanyisisa xiswona,
13 N’wina vana* va Israyele mutirheli wa yena,+N’wina vana va Yakobe, vanhu lava a nga va langa.+
14 I Yehovha Xikwembu xa hina.+
A yavanyisa misava hinkwayu.+
15 Khumbukani ntwananu wa yena nkama hinkwawu,Xitshembiso lexi a nga xi yendla ka vanhu va yena,+
16 Ntwananu lowu a nga wu yendla na Abrahamu,+Ni xitshembiso lexi a nga xi yendla ka Izaki,+
17 Lexi a nga xi yendla xi va nawu ka Yakobe,+Xi va ntwananu wa ku kala wu nga heli ka Israyele,
18 A ku: ‘Ni ta ku nyika tiko la Kanana,+Li va tshomba la wena.’+
19 Va kume xitshembiso lexi nkama a va nge se tala,Ina, a va nge se va vanyingi funtshi a va li vanhu va ku ta hi ka tiko lin’wani.+
20 A va rhendzelekela ni matiko,Va suka ka mfumu wun’wani va ya ka vanhu van’wani.+
21 A nga tshikanga munhu a va hlupha,+Kambe a laye tihosi hi mhaka ya vona,+
22 A ku: ‘Mi nga tshuki mi khumba vanhu lava ni nga va langa,Funtshi mi nga va yendli nchumu xa ku biha vaprofeta va mina.’+
23 Misava hinkwayu a yi yimbelelele Yehovha!
Huwelelani ku ponisa ka yena siku ni siku!+
24 Twalisani wukulu la yena xikarhi ka matiko,Mintirho ya yena ya ku hlamalisa ka vanhu hinkwavu.
25 Hikusa Yehovha i mukulu funtshi a faneliwa hi ku dzunisiwa.
A ku na xikwembu xa ku hlamalisa ku fana na yena.+
26 Swikwembu leswin’wani hinkwaswu swa matiko a hi swa nchumu,+Kambe Yehovha hi yena a nga yendla matilo.+
27 Wa phatima, wa hlonipheka;+Lani a tshamaka kona ku ni matimba ni ku tsaka.+
28 Hloniphani Yehovha n’wina mindjangu ya vanhu,Hloniphani Yehovha hi mhaka ya ku phatima ni matimba ya yena.+
29 Dzunisani Yehovha hi mhaka ya vito la yena la ku phatima;+Tanani ni swa ku mu nyika.+
Khizamelani* Yehovha na mi yambale mpahla ya n’wina ya ku kwetsima.+
30 Misava hinkwayu a yi rhurhumele phambheni ka yena!
Misava yi tiyisiwile; a yi nge tsekatsekisiwi.+
31 Matilo a ma tsake, ni misava a yi tsake;+Byelani matiko mi ku: ‘Yehovha i Hosi!’+
32 Lwandle ni hinkwaswu leswi nga ka lona a swi dume;Nhova ni hinkwaswu leswi nga ka yona a swi tsake.
33 Hi nkama wolowo wa wun’we minsinya hinkwayu leyi nga khwatini a yi huwelele hi ku tsaka phambheni ka Yehovha,Hikusa a tela* ku ta yavanyisa misava.
34 Khensani Yehovha hikusa i munene;+Lirhandzu la yena lalikulu a li heli.+
35 Hlayani mi ku: ‘Hi ponisi, wena Xikwembu xa ku ponisiwa ka hina,+Hi hlengeleti u hi ponisa ka vamatiko,Leswaku hi ta khensa vito la wena la ku kwetsima,+Hi ku dzunisa hi ku tsaka.+
36 A ku dzunisiwe Yehovha Xikwembu xa IsrayeleMasiku hinkwawu.’”
Se vanhu hinkwavu va ku: “Amen,”* va dzunisa Yehovha.
37 Davhida a gama a siya Azafi+ ni vamakwavu lani areka ya ntwananu wa Yehovha a yi li kona, swaku va ta tirha phambheni ka Areka+ va yendla mintirho leyi faneleke yi yendliwa siku ni siku.+
38 Obede-Edomu ni 68 wa vamakwavu va yena na Obede-Edomu n’wana wa Yedutani na Osa a va li vavoneleli va tinyanghwa;
39 kasi muprista Zadoki+ ni vaprista lavan’wani a va li phambheni ka tabernakela ya Yehovha ka ndhawu ya ku tlakuka aGibiyoni+
40 swaku va nyikela magandzelo ya ku hisiwa ka Yehovha nkama ni nkama ka altari ya gandzelo la ku hisiwa nimixo ni madlambu ni ku yendla hinkwaswu leswi nga tsaliwa ka Nawu wa Yehovha lowu a nga wu byela Vayisrayele.+
41 A va li na Hemani na Yedutani+ ni van’wani lava va nga langiwa ku tlhela ku hlayiwa mavito ya vona swaku va khensa Yehovha,+ hikusa “lirhandzu la yena lalikulu a li heli”;+
42 kasi ka vona a ku na Hemani+ na Yedutani, swaku va chaya timhalamhala, ni swa ku chaya hi swona swa nsimbi swa ku fana ni maparatu leswi a swi tirhisiwa swaku ku dzunisiwa Xikwembu xa ntiyiso; vana va Yedutani+ a va nyime nyanghweni.
43 Vanhu hinkwavu va gama va muka, Davhida na yena a muka a ya katekisa va le kaya ka yena.
Tinhlamunselu ta le hansi
^ Kumbe: “mapalmera”. A muxaka lowu wa ntxindzu wu tolovela ku kumeka aPalestina.
^ Hi Xiheberu: “khumbuka”.
^ I minchumu yimbirhi ya ku fana ni maparatu ya ku chaya hi yona muzika, leyi nga yendliwa hi kobre, naswona a yi bananisiwa swaku yi ta chaya.
^ Ku nga minchumu ya ku hambiwa hi timhondzo kumbe tinsimbi, swi chaya ku fananyana ni vhuvhuzela.
^ Kumbexana: “Vulavulani”.
^ Hi Xiheberu: “mbewu”.
^ Kumbe: “Gandzelani”.
^ Kumbe: “a tele”.
^ Kumbe: “A ku yendleke swoleswo”.
