Tikronika Ta Ku Sungula 17:1-27
17 Nkama Davhida se a a tshamisekile ka yindlo ya yena ya wuhosi, a byele muprofeta Natani+ a ku: “Mina ni tshama ka yindlo leyi nga yakiwa hi mapulangu ya minsinya ya mikedari,+ kambe areka ya ntwananu wa Yehovha yi tshama ka tende leli nga yendliwa hi tipanu.”+
2 Natani a hlamula Davhida a ku: “Yendla leswi u swi pimisaka, hikusa Xikwembu xa ntiyiso xi na wena.”
3 Hi wusiku lolelo, Xikwembu xi byela Natani xi ku:
4 “Famba u ya byela mutirheli wa mina Davhida u ku: ‘Yehovha a li: “A hi wena u nga ta ni yakela yindlo leyi ni nga ta tshama ka yona.+
5 Phela a ni se tshama ka yindlo ku sukela siko leli ni nga humesa Vayisrayele aGibita anze namuntlha, kambe a ni tshama ka matende ni tlhela ni suka ka ndhawu yin’wani ni ya ka yin’wani.+
6 Ka nkama hinkwawu lowu a ni fambafamba na vona, u tshama u twa swaku ni khalile ka vayavanyisi lava ni nga va veka swaku va risa vanhu va mina? U tshama u ni twa ni va vutisa swaku: ‘Hi mhaka muni mi nga ni yakelanga yindlo hi mapulangu ya minsinya ya mikedari?’”’
7 “Swoswi famba u ya byela Davhida mutirheli wa mina u ku: ‘Yehovha murhangeli wa tintsumi a li: “A wu lusa tinyempfu nkama ni nga ku langa swaku u rhangela vanhu va mina, ku nga Vayisrayele.+
8 Ni ta va na wena hinkwaku lomu u nga ta va kona,+ ni ta helisa valala va wena hinkwavu phambheni ka wena;+ ni ta yendla swaku vito la wena li tiviwa hintamu ku fana ni vanhu lava va tiviwaka hintamu amisaveni.+
9 Ni ta langela Vayisrayele, ku nga vanhu va mina, a ndhawu ya ku tshama ka yona, va ta tshama ka yona hi ku rhula, a va nga ha ta karhatiwa hi munhu; vanhu lava va yendlaka swilo swa ku biha a va nge he tlheli va va hlupha ku fana ni leswi a va va hluphisa xiswona+
10 ka nkama hinkwawu lowu ni nga veka vayavanyisi leswaku va rhangela vanhu va mina, ku nga Vayisrayele.+ Ni ta yendla swaku u hlula valala va wena hinkwavu.+ Na ku byela: ‘Mina Yehovha ni ta yendla swaku wuhosi li va ka ndjangu wa wena.’*
11 “‘“Nkama u nga ta fa, u ta lahliwa lani vavhovho va wena va nga lahliwa kona, kambe ni ta gama ni langa mun’we ka vana va wena+ swaku a va hosi ni tlhela ni tiyisa mfumu wa yena.+
12 Hi yena a nga ta ni yakela yindlo+ funtshi ni ta tiyisa xitshamu xa yena xa wuhosi swaku xi tshama na xi li kona minkama hinkwayu.+
13 Ni ta va papayi wa yena, yena a ta va n’wana wa mina.+ Funtshi a ni nge tshiki ku mu rhandza+ ku fana ni leswi ni nga swi yendla ka lweyi a a fuma, na wena u nge se fuma.+
14 Ni ta yendla swaku a tshama ka yindlo ya mina ni ka mfumu wa mina nkama hinkwawu+ funtshi xitshamu xa yena xa wuhosi xi ta tshama na xi li kona nkama hinkwawu.”’”+
15 Natani a byele Davhida hinkwaswu leswi Xikwembu xi nga mu komba swona.
16 Se Davhida a gama a nghena ka tende a tshama hansi a khongela ka Yehovha, a ku: “Wena Yehovha Xikwembu, no va mani mina? Funtshi ndjangu wa mina wo va yini leswi u nga ni hlayisa anze namuntlha?+
17 Wena Xikwembu xa mina, u tlhela u byela mina mutirheli wa wena leswi nga ta yendleka ka ndjangu wa mina ka nkama lowu taka;+ Yehovha Xikwembu u ni fanise ni munhu lweyi a faneliwaka hi ku tlakusiwa.
18 Se mina Davhida mutirheli wa wena a ni nge he hlayi nchumu hi wuhosi leli u nga ni nyika lona hikusa u ni tiva kahle.+
19 Wena Yehovha Xikwembu, hi mhaka ya mina mutirheli wa wena ni leswi u swi lavaka ka mbilu ya wena, u ni yendlele minchumu hinkwayu leyi ya ku hlamalisa hi ku ni komba wukulu la wena.+
20 Wena Yehovha a ku na munhu wa ku fana na wena,+ hi wena ntsena+ u nga Xikwembu; hinkwaswu leswi hi nga swi twa hi tindleve ta hina swi tiyisa mhaka leyi.
21 A ku na tiko lin’wani lani misaveni leli fanaka ni vanhu va wena, ku nga Vayisrayele.+ Wena Xikwembu xa ntiyiso u va ponisile swaku va va vanhu va wena.+ U yendle swaku vito la wena li tiviwa hintamu hi ku va yendlela minchumu ya yinyingi ya ku hlamalisa.+ U hlongole matiko hi mhaka ya vanhu va wena+ lava u nga va ponisa aGibita.
22 U yendle swaku Vayisrayele va va vanhu va wena nkama hinkwawu;+ kasi wena Yehovha u ve Xikwembu xa vona.+
23 Swoswi Yehovha Xikwembu xa mina, leswi u nga ni tshembisa mina mutirheli wa wena ni ndjangu wa mina a swi yendleke nkama hinkwawu funtshi swi yendli hi ku ya hi leswi u nga swi tshembisa.+
24 Vito la wena a li tshame li li kona li tlhela li dzunisiwa+ minkama hinkwayu, swaku vanhu va ta ku: ‘Yehovha murhangeli wa tintsumi i Xikwembu xa Israyele.’ Yendla swaku ndjangu wa mina wu tiya phambheni ka wena.+
25 Hikusa wena Xikwembu xa mina, u byele mina mutirheli wa wena swaku u ta yendla wuhosi li nga suki ka ndjangu wa mina.* Hi leswo swi ni yendlaka ni nga chavi ku khongela ka wena ni vulavula hi mhaka leyi.
26 Wena Yehovha u Xikwembu xa ntiyiso, u ni tshembise ku ni yendlela minchumu yayinene.
27 Tsaka hi ku katekisa ndjangu wa mina naswona a wu tshame phambheni ka wena minkama hinkwayu, hikusa wena Yehovha u wu katekisile, hi mhaka leyo a wu kateke minkama hinkwayu.”
Tinhlamunselu ta le hansi
^ Hi Xiheberu: “ni ta ku yakela yindlo.”
^ Hi Xiheberu: “u ta ni yakela yindlo.”