Tikronika Ta Ku Sungula 19:1-19
19 Hi ku famba ka nkama, Nahaxi hosi ya Vaamoni a fa se n’wana wa yena a sala a va hosi.+
2 Se Davhida a ku: “Ni ta va ni timpsalu*+ ka Hanuni n’wana wa Nahaxi ku fana ni leswi papayi wa yena a nga va ni timpsalu ka mina.” Davhida a gama a rhuma vatirhi va yena swaku va ya mu tiyisa hi mhaka ya leswi a nga feliwa hi papayi wa yena. Kambe nkama vatirhi va Davhida va nga fika ka tiko la Vaamoni,+ swaku va ya tiyisa Hanuni,
3 varhangeli va Vaamoni va byela Hanuni va ku: “U pimisa swaku Davhida a rhume vanhu va ta ku tiyisa hi mhaka ya leswi a hloniphaka papayi wa wena? Phela a rhume vatirhi va yena swaku va ta kambela doropa leli swaku va ta li hlula.”
4 Kutani Hanuni a teka vatirhi va Davhida a va tsemeta malepfu+ a tlhela a tsema ni mpahla ya vona hi le ka xisuti, a minenge ya vona yi sala handle, a gama a va tshika va famba.
5 Nkama Davhida a nga byeliwa leswi nga va yendlekela, a tekela ku rhuma vanhu van’wani swaku va ya va tlhangaveta, hikusa vavanuna lava a va danisiwile hintamu; se hosi yi va byela yi ku: “Tshamani aYeriko+ anze malepfu ya n’wina ma kula, hi kona mi nga ta vuya.”
6 Hi ku famba ka nkama, Vaamoni va vona swaku leswi va nga swi yendla swi va yendle va nyenyiwa hi Davhida, kutani Hanuni ni Vaamoni va rhumela 34.200 wa makilu* ya prata swaku ku ya tholiwa masonchwa lama fambaka hi makavhalu ni tinyolo* aMezopotamiya,* Aramu-Maka ni Zoba.+
7 Va gama va thola 32.000 wa tinyolo ta nyimpi ni hosi ya Maka ni vanhu va yona, va fika va gwimba matende phambheni ka Medeba.+ Vaamoni va hlengeletana ka madoropa ya vona se va ya nyimpini.
8 A nkama Davhida a nga twa leswo, a rhuma Yowabu+ ni masonchwa hinkwawu ku patsa ni masonchwa ya yena ya matimba.+
9 Se Vaamoni va huma va nyima ka xipfalu xa doropa swaku va tilulamisela ku lwa funtshi tihosi leti nga ta, a ti nyime toxe ka ndhawu ya ku pfuleka.
10 Nkama Yowabu a nga vona swaku valala va mu hlasela hi phambheni ni ndzhaku, a langa masonchwa ya matimba ya Israyele, swaku ma tilunghiselela ku lwa ni Vasiriya.+
11 Kutani masonchwa lawa ma nga sala, a ma nyike Abixayi+ makwavu wa yena swaku a ma rhangela, swaku ma ta lwa ni Vaamoni.
12 A gama a ku: “Loko Vasiriya+ va ni hlula, tani u ta ni pfuna; kambe loko Vaamoni va ku hlula ni ta ta ni ta ku pfuna.
13 A hi tiyeni hi nga chavi nchumu+ hi lwela vanhu va ka hina ni madoropa ya Xikwembu xa hina, funtshi Yehovha a ta yendla leswi a swi vonaka na swi li kahle ka yena.”
14 Se Yowabu ni masonchwa lawa a a li na wona va yela Vasiriya va ya lwa na vona, kutani Vasiriya va mu baleka.+
15 A nkama Vaamoni va nga vona swaku Vasiriya va balekile, na vona va baleka makwavu wa yena Abixayi va nghena ka doropa. Se Yowabu a tlhela a ya Yerusalema.
16 A nkama Vasiriya va nga vona swaku va hluliwile hi Vayisrayele, va rhume vanhu va ya vitana Vasiriya lava a va tshama kusuhi ni Nambu wa Ewufrata+ na va rhangeliwa hi Xofaki murhangeli wa masonchwa ya Adadezeri.+
17 Nkama Davhida a nga byeliwa leswi nga yendleka, a tekela ku hlengeleta masonchwa hinkwawu ya Israyele se va tsemakanya Nambu wa Yordani, va tilulamisela ku ya lwa na vona. Davhida a tilunghiselela swaku a ya tlhangana ni Vasiriya funtshi va lwe na yena.+
18 Kambe Vasiriya va baleka Vayisrayele funtshi Davhida a dlaye 7.000 wa masonchwa lawa a ma famba hi tinyolo ni 40.000 wa masonchwa ya Vasiriya lawa a ma famba hi minenge; a gama a dlaya Xofaki murhangeli wa masonchwa ya Vasiriya.
19 A nkama vatirhi va Adadezeri va nga vona swaku Vayisrayele va va hlulile,+ va tekela ku yendla ntwananu wa ku rhula na Davhida va sungula ku mu tirhela;+ funtshi Vasiriya a va nga ha swi lavi ku pfuna Vaamoni.
Tinhlamunselu ta le hansi
^ Hi Xiheberu: “lirhandzu lalikulu”.
^ Hi Xiheberu: “1.000 wa titalenta”. Vona Xiyengetelo B14.
^ Kumbe: “tin’qolo; makalichi”.
^ Hi Xiheberu: “Aramu-Naharayimi”.
