Tikronika Ta Ku Sungula 26:1-32
26 Mintlawa ya lava a va vonelela tinyanghwa+ a yi tshame hi ndlela leyi: Ka vana va Kora a ku na Mexelemiya+ n’wana wa Kore wa vana va Azafi.
2 Vana va Mexelemiya hi lava: Wa ku sungula a ku li Zakariya, wa wumbirhi a ku li Yediyayele, wa wunharhu a ku li Zebadiya, wa wu 4 a ku li Yatiniyeli,
3 wa wu 5 a ku li Elamu, wa wu 6 a ku li Yehohanani, wa wu 7 a ku li Eliyeho-Henayi.
4 Vana va Obede-Edomu hi lava: Wa ku sungula a ku li Xemaya, wa wumbirhi a ku li Yohozabadi, wa wunharhu a ku li Yowa, wa wu 4 a ku li Sakari, wa wu 5 a ku li Nataneli,
5 wa wu 6 a ku li Amiyeli, wa wu 7 a ku li Isakara, wa wu 8 a ku li Pewuletayi; hikusa Xikwembu a xi mu katekisile Obede-Edomu.
6 Xemaya n’wana wa Obede-Edomu a psaleliwe vana lava a va li varhangeli va mindjangu ya vona, hikusa a va ni matimba funtshi a va swi kota ku wu yendla kahle ntirho.
7 Vana va Xemaya hi lava: Otini, Refayele, Obede na Elizabadi; vamakwavu va vona ku nga Elihu na Semakiya, a va li vavanuna va matimba lava va swi kotaka ku wu yendla kahle ntirho.
8 Vavanuna lava hinkwavu a va li vana va Obede-Edomu. Vona ni vana va vona ku patsa ni vamakwavu va vona a va li vavanuna lava a va wu yendla kahle ntirho funtshi a va faneleka ku wu yendla; hinkwavu a va li 62 naswona lava a va li vana va Obede-Edomu.
9 Mexelemiya+ a a li ni vana ni vamakwavu ku nga 18 wa vavanuna lava a va swi kota ku wu yendla kahle ntirho.
10 Osa n’wana wa Merari na yena a a ni vana. Ximiri a a li murhangeli hambileswi a a nga li matevula, a a langiwe hi papayi wa yena swaku a va murhangeli,
11 wa wumbirhi a ku li Hilikiya, wa wunharhu a ku li Tebaliya, wa wu 4 a ku li Zakariya. Vana hinkwavu ni vamakwavu va Osa a va li 13.
12 Ka mintlawa leyi ya lava a va vonelela tinyanghwa, varhangeli a va yendla mintirho ya ku fana ni leyi a yi yendliwa hi vamakwavu va vona ka yindlo ya Yehovha.
13 Se vavakulu ni vavatsongo va hoxa swiribyani,*+ hi ku ya hi mindjangu ya vona, swaku va ta tiva lweyi a a ta vonelela nyanghwa wun’wani ni wun’wani.
14 Swiribyani swi kombe Xelemiya swaku a vonelela nyanghwa wa le wuxeni. Se Zakariya n’wana wa yena, mutsundzuxi wa ku tlhariha, swi mu kombe swaku a ya vonelela nyanghwa lowu a wu li ka tlhelo la norte.*
15 Obede-Edomu swi kombete yena swaku a ya vonelela nyanghwa lowu wu nga ka tlhelo la sul,* kasi vana va yena+ va nyikiwe ntirho wa ku vonelela tindhawu leti a ku hlayiseliwa ka tona swakudla.*
16 Xupimi na Osa+ va kombetiwe swaku va vonelela nyanghwa wa tlhelo la wupeladlambu akusuhi ni Nyanghwa wa Xalekete lowu wu nga ka ndlela leyi khupukaka; ntlawa wun’we wa vavoneleli a wu tirhisana ni ntlawa lowun’wani;
17 ka nyanghwa lowu a wu li ka tlhelo la le wuxeni a ku li ni 6 wa Valevhi; ka nyanghwa lowu a wu li ka tlhelo la norte a ku tirha 4 wa vona hi siku; ka nyanghwa lowu a wu li ka tlhelo la sul a ku tirha 4 wa vona hi siku; kasi ka ndhawu leyi a ku vekiwa ka yona swakudla+ a va tirha va li vambirhimbirhi;
18 ka tlhelo la wupeladlambu la yindlo ya mapilari ka ndlela yayikulu,+ a va tirha na va li 4, kasi ka yindlo ya mapilari a va tirha na va li vambirhi.
19 Leyi a ku li mintlawa ya vavoneleli va tinyanghwa ya vana va Kora ni vana va Merari.
20 Ka Valevhi, Ahiya hi yena a a vonelela minchumu ya lisima leyi a yi li ka yindlo ya Xikwembu xa ntiyiso ni hinkwaswu leswi a swi nyikeliwe ka Xikwembu.+
21 Ka vana va Ladani, ku nga vana va Vajersoni lava nga va Ladani, lava a va li varhangeli va mindjangu ya Ladani wa Mujersoni, a ku li na Yeyiyeli+
22 ni vana va yena, ku nga Zetami na Yuwele. A va vonelela minchumu ya lisima ka yindlo ya Yehovha.+
23 Ka va ka Amirami, Vaizari, Vahebroni ni Vauziyeli,+
24 Xebuwele n’wana wa Jerixomu n’wana wa Moxe a a li muvoneleli wa ndhawu leyi a ku hlayiseliwa ka yona swakudla.
25 Kasi vamakwavu va yena, ku nga vana va Eliyezere+ a ku na Rehabiya,+ Yexaya, Yorami, Zikiri na Xelomoti.
26 Xelomoti ni vamakwavu va yena a va vonelela minchumu hinkwayu ya lisima leyi a yi nyikeliwe ka Xikwembu,+ leyi a yi nyikeliwe hi Hosi Davhida,+ varhangeli va mindjangu,+ varhangeli va mintlawa ya 1.000 wa vanhu ni varhangeli va mintlawa ya 100 wa vanhu ku patsa ni varhangeli va masonchwa.
27 Leswi va nga nyikela hi swona ka Xikwembu a va swi kuma ka minchumu leyi va nga yi tekela+ valala va vona anyimpini,+ se va swi nyikelile swaku ku hlayisiwa yindlo ya Yehovha,
28 ni minchumu hinkwayu leyi Samuwele lweyi a a vona minchumu ya ku hlamalisa hi ndlela ya singita*+ na Sawulo n’wana wa Kixi, Abineri+ n’wana wa Neri na Yowabu+ n’wana wa Zeruya+ va nga swi nyikela ka Xikwembu. Hinkwaswu leswi a swi nyikeliwa a swi hlayisiwa hi Xelomiti ni vamakwavu va yena.
29 Ka Vaizari,+ Kenaniya ni vana va yena a va nyikiwe ntirho ahandle ka yindlo ya Xikwembu, a va li varhangeli ni vayavanyisi+ aIsrayele.
30 Ka Vahebroni,+ Axabiya ni vamakwavu va yena ku nga 1.700 wa vavanuna lava a va swi kota kahle ku yendla mintirho, a va li varhangeli aIsrayele ka ndhawu leyi yi nga ka tlhelo la wupeladlambu ka Yordani, a va yendla ntirho hinkwawu wa Yehovha ni wa hosi.
31 Ka Vahebroni, Yeriya+ a a li murhangeli wa vona hi ku ya hi mindjangu ya vapapayi va vona. Hi lembe la wu 40 la ku fuma ka Davhida+ ku laviwe vavanuna lava va nga ni matimba, lava va kotaka ku wu yendla kahle ntirho kutani va va kume aYazeri+ aJiliyadi.
32 Vamakwavu va vona ku nga vavanuna lava va swi kotaka ku wu yendla kahle ntirho, lava a va rhangela mindjangu a va li 2.700. Se Hosi Davhida a va veka swaku va va varhangeli va ka Rubeni, va ka Gadi ni hafu ya lixaka la va ka Manasi swaku va yendla mintirho ya Xikwembu xa ntiyiso ni ya hosi.
Tinhlamunselu ta le hansi
^ Vona Ntlhamuselo.
^ Kumbe: “n’walungu.”
^ Kumbe: “dzongeni”.
^ Kumbe: “matshala.”
^ Hi Xiheberu: “muvoni wa swivono”.
