Tikronika Ta Ku Sungula 5:1-26

  • Vatukulu va Rubeni (1-10)

  • Vatukulu va Gadi (11-17)

  • Vaagriti va hluliwa (18-22)

  • Hafu ya lixaka la Manasi (23-26)

5  Lava i vana va Rubeni+ n’wana wa ku sungula wa Israyele. A a li matevula kambe mfanelo ya yena ya ku va matevula yi nyikiwe vana va Yosefa+ n’wana wa Israyele hi mhaka ya leswi Rubeni a nga famba masangu ni nsati mun’wani wa papayi wa yena,+ se a nga tsaliwanga swaku i matevula lani ku nga tsaliwa swib’ongo swa vona.  Hambileswi Yuda+ a a hloniphiwa hintamu ku tlula vamakwavu ni leswi a ku li yena lweyi a nga psala lweyi a a ta va murhangeli,+ mfanelo ya ku va matevula yi nyikiwe Yosefa.  Vana va Rubeni matevula ya Israyele a ku li Anoki, Palu, Hezroni na Karimi.+  Vana va Yuwele a ku li Xemaya, Xemaya a ve papayi wa Goge, Goge a ve papayi wa Ximeyi,  Ximeyi a ve papayi wa Mikiya, Mikiya a ve papayi wa Reyaya, Reyaya a ve papayi wa Bali,  Bali a ve papayi wa Behera lweyi Tiglata-Pilinezere+ hosi ya Asiriya a nga mu yisa awukaraweni; yena a a li murhangeli wa va ka Rubeni.  Vamakwavu va Behera hi ku ya hi mindjangu ya vona lava va nga tsaliwa hi ku ya hi swib’ongo swa vona ni vatukulu va vona a ku li Yeyiyele, Zakariya  na Bela n’wana wa Azazi n’wana wa Xema, n’wana wa Yuwele lweyi a a tshama aArowa+ anze Nebo ni Bali-Meyoni.+  Kasi ka tlhelo la le wuxeni, ndhawu leyi a a tshama ka yona a yi famba anze lani ku sungulelaka kona mananga ka Nambu wa Ewufrata,+ hikusa swifuyu swa vona a swi li swinyingi ka tiko la Jiliyadi.+ 10  Ka nkama wa Sawulo va lwe ni Vaagriti va va hlula, va gama va tshama ka matende ya vona ka tiko hinkwalu leli nga ka tlhelo la le wuxeni la Jiliyadi. 11  Vatukulu va Gadi a va tshama kusuhi na vona ka tiko la Baxani anze Saleka.+ 12  Yuwele a a li murhangeli aBaxani ku gama ku landzela Xafami, Yanayi na Xafati. 13  Vamakwavu va vona lava a va rhangela mindjangu a ku li Mikayele, Mexulami, Xeba, Yorayi, Yakani, Ziya na Ebere, hinkwavu a va li 7. 14  Lava a ku li vana va Abiyayile n’wana wa Uri, n’wana wa Yarowa, n’wana wa Jiliyadi, n’wana wa Mikayele, n’wana wa Yexixayi, n’wana wa Yado, n’wana wa Buza. 15  Ahi n’wana wa Abidiyele n’wana wa Guni a a li murhangeli wa mindjangu ya vona. 16  A va tshama Jiliyadi,+ Baxani+ ni ka swidoropani leswi nga kusuhi ni tindhawu hinkwatu leti a va lusela ka tona swifuyu swa vona aSaroni ku ya fika lomu ti gamelaka kona. 17  Hi nkama wa ku fuma ka Yothamu+ hosi ya Yuda na Yerobuwamu+ hosi ya Israyele, hinkwavu ka vona a va tsaliwile hi ku ya hi swib’ongo swa vona. 18  Va ka Rubeni, va ka Gadi ni hafu ya lixaka la Manasi a va li ni 44.760 wa masonchwa ya matimba lawa a ma rhwala swa ku tivhikela hi swona ni swipada. A ma tlhela ma kota ku txopa mimpaxwa,* funtshi a ma djondzisiwe ku lwa nyimpi. 19  Va lwe ni Vaagriti,+ Vayeturi, Vanafixi+ ni Vanodabi. 20  Va pfuniwile nkama a va lwa na vona, va za Vaagriti ni hinkwavu lava a va li na vona va hluliwa, hikusa va kombele Xikwembu swaku xi va pfuna loko va li nyimpini naswona xi va pfunile hi mhaka ya leswi a va xi tshemba.+ 21  Va teke swifuyu swa vona, ku nga 50.000 wa makamela, 250.000 wa tinyempfu, 2.000 wa timbongolo ku patsa ni 100.000 wa vanhu. 22  Ku fe vanhu va vanyingi hikusa nyimpi leyi a yi lwiwa hi Xikwembu xa ntiyiso.+ Va tshame ka ndhawu ya vona anze nkama lowu va nga yisiwa awukaraweni.+ 23  Hafu ya vatukulu va lixaka la Manasi,+ va tshame ka ndhawu yoleyo ku sukela aBaxani anze Bali-Hermoni ni le Seniri ni ka Ntshava ya Hermoni.+ A va li vanyingi. 24  Lava a ku li varhangeli va mindjangu ya vona: Eferi, Ixi, Eliyeli, Aziriyeli, Yeremiya, Odavhiyawi na Yahadiyele; a va li masonchwa ya matimba, vavanuna lava a va tiviwa hintamu, va tlhela va rhangela mindjangu ya vona. 25  Kambe a va tshembekanga ka Xikwembu xa vavhovho va vona, va sungule ku yendla wunghwavani* ni swikwembu swa matiko+ lawa Xikwembu xi nga ma helisa phambheni ka vona. 26  Se Xikwembu xa Israyele xi yendla swaku Puli hosi ya Asiriya+ (ku nga Tiglata-Pilinezere+ hosi ya Asiriya) a teka va ka Rubeni, va ka Gadi ni hafu ya lixaka la ka Manasi a va yisa awukaraweni. A va yise aAla, Abori, Hara ni ka nambu wa Gozani+ lani va ha tshamaka kona ninamuntlha.

Tinhlamunselu ta le hansi

Kumbe: “maflexa”.
Kumbe: “ku gandzela”.