Vatesalonika Va Ku Sungula 3:1-13
3 Kutani nkama hi nga vona swaku a hi nga ha gwenti ku tshama na hi nga twi mahungu ya n’wina, hi vone swi yampsa ku sala hoxe Atena,+
2 kambe hi rhuma makwerhu Timotiya+ lweyi a nga mutirheli wa Xikwembu, lweyi a chumayelaka mahungu ya ku tsakisa hi Kreste, leswaku a ta mi tiyisa hi mhaka ya lipfumelo la n’wina,
3 leswaku ku nga vi na munhu lweyi a chavisiwaka* hi mahlomulu lawa. Hikusa ma swi tiva swaku a hi nge swi koti ku baleka ku xanisiwa loku.*+
4 Hikusa nkama lowu a hi li na n’wina, a hi mi byela swaku hi ta xanisiwa naswona leswo swi yendlekile hilani mi swi tivaka hi kona.+
5 Leswi a ni nga ha gwenti ku tshama na ni nga twi mahungu ya n’wina, ni rhume Timotiya ka n’wina swaku ni ta tiva hi ta ku tshembeka ka n’wina,+ hikusa a ni chava swaku devhi Davulosi*+ a nga va a mi ringile naswona ku tikarhata ka hina ku ve nyuku wa mbyana.
6 Kambe Timotiya wa ha ku fika halenu na a ta hi seno ka n’wina+ naswona a hi byele mahungu ya ku tsakisa hi ku tshembeka ni lirhandzu la n’wina, ni leswaku ma tsaka loko mi hi khumbuka, naswona ma hi xuva ku fana na hina.
7 Vamakwerhu, hi tiyisiwile ka ku karhateka ni ka mahlomulu ya hina loko hi twe hi ta n’wina ni ta ku tshembeka ka n’wina.+
8 Hikusa hi tlhela hi kuma matimba loko mi nyima mi tiyile aHosini.
9 Phela ha xi khensa swinene Xikwembu hi mhaka ya n’wina hikusa mi hi yendla hi tsaka ngopfu.
10 Ha khongela hi mbilu hinkwayu wusiku ni nhlikanhi swaku hi ta mi vona ni leswaku hi ta mi pfuna hi leswi mi swi pfumalaka leswaku mi tiyisa lipfumelo la n’wina.+
11 Hi khongela swaku Xikwembu Papayi wa hina ni Hosi ya hina Yesu va nga hi pfulela ndlela leswaku hi ta ka n’wina.
12 Naswona hi navela swaku Hosi yi nga kulisa ndlela leyi mi rhandzanaka hi yona+ ni ku rhandza vanhu hinkwavu, ina, yi nga tata timbilu ta n’wina hi lirhandzu ku fana ni leswi hi mi rhandzisaka xiswona,
13 leswaku yi ta tiyisa timbilu ta n’wina, yi yendla swaku mi nga vi na nandzu naswona mi kwetsima phambheni ka Xikwembu+ Papayi wa hina hi nkama wa ku vuya ka Hosi ya hina Yesu+ ni vakwetsimi va yena hinkwavu.
Tinhlamunselu ta le hansi
^ Hi Xigriki: “tsekatsekisiwaka”.
^ Kumbe: “hi vekeliwe swilo leswi.”
^ Hi Xigriki: “Muringi”.
