Yohani Wa Ku Sungula 3:1-24
3 Hi nga vonani leswi Papayi a nga hi rhandzisa xiswona,+ hi za hi vitaniwa vana va Xikwembu!+ Naswona vhela, hi vana va xona. Hi yona mhaka leyi misava yi kalaka yi nga hi tivi,+ hikusa a yi mu tivi Papayi.+
2 Varhandziwa, swoswi hi vana va Xikwembu,+ kambe a hi se swi tiva leswi hi nga ta va swona.+ Ha swi tiva swaku loko a humelela hi ta fana na yena hikusa hi ta mu vonisa xileswi a nga tshamisa xiswona.
3 Naswona lweyi a mu tshembaka wa tibasisa,+ hikusa na yena a basile.
4 Lweyi a hanyaka hi xidjoho a tlula nawu hikusa xidjoho i ku tlula nawu.
5 Ma swi tiva swaku a tile a ta susa swidjoho swa hina+ naswona a nga djohanga.
6 Lweyi a fambaka na yena a nga hanyi hi xidjoho;+ lweyi a hanyaka hi xidjoho a nga mu vonanga naswona a nga mu tivi.
7 Vananga, mi nga kanganyisiwi hi munhu; lweyi a yendlaka swa ku lulama a lulamile, ku fana na Yesu a nga lulama.
8 Lweyi a hanyaka hi xidjoho a ta hi ka Davulosi, hikusa Davulosi a a djoha ku sukela ku sunguleni.+ Hi mhaka leyo, N’wana wa Xikwembu a tile swaku a ta helisa mintirho ya Davulosi.+
9 Lweyi a nga psaliwa hi Xikwembu a nga hanyi hi xidjoho,+ hikusa munhu yelweyo a tshama na a ni matimba ya Xikwembu* kutani a nge hanyi hi xidjoho, hikusa a psaliwe hi Xikwembu.+
10 Vana va Xikwembu ni vana va Davulosi va voneka hi ndlela leyi: Lweyi a hanyaka hi ku yendla swa ku biha ni lweyi a kalaka a nga rhandzi makwavu a nga ti hi ka Xikwembu.+
11 Hikusa mhaka leyi mi yi twe ku sukela ku sunguleni, ya leswaku hi fanele hi rhandzana;+
12 hi nga fani na Khayini, lweyi a nga ta hi ka Davulosi* a gama a dlaya makwavu.+ Kasi a a mu dlayela yini ke? Hileswi mintirho ya yena a yi bihile,+ kambe mintirho ya makwavu a yi lulamile.+
13 Vamakwerhu, mi nga hlamaleni hileswi misava yi mi nyenyaka.+
14 Ha swi tiva swaku khale a hi file, kambe swoswi se ha hanya+ hileswi hi rhandzaka vamakwerhu.+ Lweyi a kalaka a nga na lirhandzu swi fana ni loko a file.+
15 Lweyi a nyenyaka makwavu i mudlayi+ naswona n’wina ma swi tiva swaku a ku na mudlayi lweyi a nga ta kuma wutomi la ku kala li nga heli.+
16 Lirhandzu se ha li tiva hikusa yena a nyikele wutomi la yena hi mhaka ya hina.+ Kutani na hina se hi boheka ku fela vamakwerhu.+
17 Kambe loko ku ni lweyi a nga ni swilo swa misava* leyi kutani a vona makwavu lweyi a pfumalaka kambe a nga mu tweli wusiwana, a nga vulisa ku yini swaku wa xi rhandza Xikwembu ke?+
18 Vananga, hi nga rhandzaneni hi marito ni ku vulavula hi nomo ntsena,+ kambe hi mintirho+ ni ntiyiso.+
19 Loko hi yendla leswo, hi ta swi tiva swaku hi va ntiyiso naswona hi ta tiyiseka swaku Xikwembu xa hi rhandza
20 hambiloko timbilu ta hina ti hi sola ka swin’wani, hikusa Xikwembu i xikulu ku tlula timbilu ta hina naswona xi tiva swilo hinkwaswu.+
21 Varhandziwa, loko timbilu ta hina ti nga hi soli, hi nga vulavula ni Xikwembu na hi chunsekile;+
22 naswona xin’wani ni xin’wani lexi hi xi kombelaka xa hi nyika+ hikusa hi yingisa minawu ya xona naswona hi yendla leswi swi xi tsakisaka.
23 Vhela nawu wa xona wu vula leswi: Hi fanele hi va ni lipfumelo ka vito la N’wana wa xona Yesu Kreste+ hi tlhela hi rhandzana,+ hi ku ya hi leswi xi nga hi byela swona.
24 Naswona lweyi a yingisaka minawu ya xona a tama a famba na xona, na xona xi tama xi famba na yena.+ Ha swi tiva swaku xi tama xi famba na hina hi mhaka ya moya wa ku kwetsima lowu xi nga hi nyika wona.+
Tinhlamunselu ta le hansi
^ Hi Xigriki: “a ni mbewu ya xona”.
^ Hi Xigriki: “Lweyi wa ku biha”.
^ Swa ku fana ni male, swakudla, mpahla kumbe munti.
