Yohani Wa Ku Sungula 4:1-21
4 Varhandziwa, mi nga kholweni marito hinkwawu lawa ku vuliwaka swaku ma ta hi ka Xikwembu,+ kambe rhangani hi ku ma kambela kuva mi tiyiseka swaku ma ta hi ka Xikwembu hikakunene,+ hikusa ku ni vaprofeta va vanyingi va mavunhwa amisaveni.+
2 Marito lama taka hi ka Xikwembu mi ta ma tivisa xileswi: Marito lama pfumelaka swaku Yesu Kreste a tile misaveni na a li munhu, i marito lama taka hi ka Xikwembu.+
3 Kambe marito lama kalaka ma nga pfumeli swaku Yesu a tile misaveni, a ma ti hi ka Xikwembu.+ Marito wolawo ma ta hi ka lweyi a lwaka na Kreste;* mi swi twile swaku ma ta va kona+ naswona se ma kona misaveni.+
4 Vananga, n’wina mi huma ka Xikwembu naswona mi va hlulile vaprofeta va mavunhwa,+ hikusa lweyi a nyimaka na n’wina+ i mukulu ku tlula lweyi a nyimaka ni misava.+
5 Va ta hi ka misava;+ hi yona mhaka leyi va vulavulaka leswi taka hi misaveni naswona misava ya va yingisa.+
6 Hina hi huma ka Xikwembu. Lweyi a tivaka Xikwembu wa hi yingisa;+ kambe lweyi a kalaka a nga humi ka Xikwembu a nga hi yingisi.+ Hi leswo swi hi yendlaka hi kota ku hambanisa marito ya ntiyiso lama taka hi ka Xikwembu ka marito ya mavunhwa.+
7 Varhandziwa, a hi tameni hi rhandzana,+ hikusa lirhandzu li ta hi ka Xikwembu naswona lweyi a nga ni lirhandzu a psaliwe hi Xikwembu naswona wa xi tiva Xikwembu.+
8 Lweyi a kalaka a nga na lirhandzu a nga xi tivi Xikwembu, hikusa Xikwembu i lirhandzu.+
9 Xikwembu xi swi kombisile swaku xa hi rhandza hi ku rhumela N’wana wa xona misaveni, lweyi a nga psaliwa a li yexe+ leswaku hi ta kuma wutomi hi mhaka ya yena.+
10 Lirhandzu li tise xileswi: A hi swaku hi hina hi nga rhandza Xikwembu, kambe hi xona xi nga hi rhandza xi tlhela xi rhumela N’wana wa xona swaku a ta va gandzelo+ la ku rivalela swidjoho swa hina.+
11 Varhandziwa, leswi Xikwembu xi nga hi rhandzisa xileswi, na hina hi boheka ku rhandzana.+
12 A nga kona lweyi a nga tshama a vona Xikwembu.+ Loko hi tama hi rhandzana, Xikwembu xi ta va na hina naswona lirhandzu la xona li ta hetiseka ka hina.+
13 Ha swi tiva swaku hi famba ni Xikwembu ni leswaku xona xi famba na hina, hikusa xi hi nyike moya wa xona wa ku kwetsima.
14 Naswona hi swi vonile hi tlhela hi byela vanhu swaku Papayi a rhume N’wana wa yena swaku a va muponisi wa misava.+
15 Lweyi a pfumelaka swaku Yesu Kreste i N’wana wa Xikwembu,+ Xikwembu xi ta famba na yena, na yena a ta famba ni Xikwembu.+
16 Se ha swi tiva naswona ha kholwa swaku Xikwembu xa hi rhandza.+
Xikwembu i lirhandzu,+ naswona lweyi a tshamaka na a ni lirhandzu, a tshama na a famba ni Xikwembu naswona Xikwembu xi famba na yena.+
17 Kutani lirhandzu li yendliwa li hetiseka* ka hina swaku hi ta vulavula na hi chunsekile+ hi siku la ku yavanyisa, hikusa leswi yena a nga tshamisa xiswona, na hina hi tshamise swoleswo ka misava leyi.
18 Lirhandzu a li chavi nchumu;+ lirhandzu leli nga hetiseka li hlongola ku chava, hikusa ku chava ku hi sivela ku yendla swilo swa swinyingi. Lweyi a chavaka a nga na lirhandzu la ku hetiseka.*+
19 Hi ni lirhandzu hikusa hi xona xi nga sungula xi hi rhandza.+
20 Lweyi a nge: “Mina na xi rhandza Xikwembu,” kambe a nyenya makwavu, i muhembi.+ Hikusa lweyi a kalaka a nga mu rhandzi makwavu+ lweyi a mu vonaka, a nge swi koti ku rhandza Xikwembu lexi a kalaka a nga se tshama a xi vona.+
21 Naswona hi ni nawu lowu wa leswaku lweyi a rhandzaka Xikwembu, a fanele a rhandza ni makwavu.+
