Pedru Wa Wumbirhi 2:1-22
2 Kambe ku fana ni leswi a ku ni vaprofeta va mavunhwa xikarhi ka vanhu va Xikwembu, ku ta va ni vadjondzisi va mavunhwa xikarhi ka n’wina.+ Va ta ngungumela va nghenisa mintlawa leyi nga ni khombo,* va ta yala hambi hi n’winyi wa vona lweyi a nga va xava,+ va tivangela ku hantla va helisiwa.
2 Naswona va vanyingi va ta landzela mahanyelo ya vona ya tingana;*+ hi mhaka ya leswo, vanhu va vanyingi va ta vulavula swa ku biha hi ndlela ya Xikwembu.*+
3 Va ta mi xolola hi marito ya mavunhwa hi mhaka ya leswi va nga ni makwanga.* Kambe ku yavanyisiwa ka vona loku nga humesiwa khale+ ku ta ta hi ku hantlisa naswona ku helisiwa ka vona ku ta fika hikakunene.+
4 Xikwembu a xi tshikanga ku khatisa tintsumi leti nga djoha;+ xi ti txukumetele aTartaru,*+ xi ti pfalela ka munyama wawukulu anze ku fika nkama wa ku yavanyisiwa.+
5 Naswona a xi tshikanga ku khatisa misava ya khale,+ kambe xi hlayisa Nowa, muchumayeli wa swa ku lulama+ ni 7 wa vanhu van’wani+ nkama xi nga tisa ndhambi ka misava leyi a yi ni vanhu va ku kala va nga xi hloniphi Xikwembu.+
6 Xi khatise madoropa ya Sodoma na Gomora xi ma hisa ku sala nkuma ntsena;+ leswo swi ve xikombiso xa leswi nga ta yendleka ka vanhu va ku kala va nga xi hloniphi Xikwembu.+
7 Kambe xi ponise Lota+ munhu wa ku lulama, lweyi a a karhateka hintamu hi mhaka ya mahanyelo ya tingana* ya vanhu lava delelaka nawu;
8 hikusa siku ni siku wanuna lwiyani wa ku lulama a a xaniseka loko a vona ni ku twa swilo swa ku biha leswi a va swi yendla na wa ha tshama na vona.
9 Leswo swi komba swaku Yehovha* wa swi kota ku va ponisa ka ndzingo vanhu lava mu gandzelaka hi mbilu hinkwayu,+ kambe lava kalaka va nga lulamanga wa va tshika leswaku va ta helisiwa hi siku la ku yavanyisa,+
10 ngopfungopfu lava lavaka ku chakisa muzimbha wa van’wani+ va tlhela va delela lava fumaka.+
Va titshemba ngopfu naswona va titiva, a va chavi ku vulavula swa ku biha hi vakwetsimi,
11 kuve tintsumi, hambileswi ti va tlulaka hi ntamu ni matimba, a ti va lumbeti hi marito ya ku rhuketela, hikusa ta mu hlonipha Yehovha.*+
12 Kambe vanhu lava va fana ni swiharhi swa ku kala swi nga pimisi leswi ngo psaleliwa ku khomiwa swi dlayiwa ntsena; va vulavula swa ku biha hi swilo swa ku ni ku swi tiva a va swi tivi.+ Va ta helisiwa hi mhaka ya mahanyelo ya vona ya ku biha,
13 va tlhela va holeliwa hi mintirho ya vona ya ku biha.
Swa va tsakisa ku hanya mafurheni+ ninhlikanhi. I swivati, va tikhorisa hi tidjondzo ta vona ta mavunhwa na va dla na n’wina mafexteni.+
14 Matihlo ya vona ma tale hi ku mbuyeta+ naswona swa va tsandza ku tshika xidjoho; va xenga va ku kala va nga tiyanga. Mbilu ya vona yi djondzisiwe ku va ni makwanga.* I vana lava nga rhukiwa.
15 Va djikisiwile va tshika ndlela yayinene, va landzela ndlela ya Balamu+ n’wana wa Beyori, lweyi a nga rhandza ku hakeliwa hi ku yendla swa ku biha;+
16 kambe a kawukiwile hileswi a nga yendla swa ku biha.+ A twe mbongolo na yi vulavula, yi mu pfalela ku yendla swa ku biha.+
17 Va fana ni swihlovo swa ku kala mati, ni hunguva leyi fambisiwaka hi xidzedze; munyama wawukulu hintamu wu va nyimelile.+
18 Va vulavula swilo swa ku tsakisa swa ku a hi ntiyiso. Va xenga vanhu swaku va navela swilo swa ku tsakisa nyama+ hi mahanyelo ya vona ya tingana,* va xenga vanhu lava ha ku tshikaka ku hanya ni vanhu lava hanyaka hi xidjoho.+
19 Va tshembisa vanhu ku chunseka, kuve vona i swikarawa swa minchumu ya ku bola;+ hikusa loko munhu a hluliwa hi mun’wani a yendla xikarawa xa yena.*+
20 Loko va baleke swilo swa misava leswi chakisaka+ hileswi va tivaka ntiyiso hi Hosi ni Muponisi Yesu Kreste, va gama va tlhelela ka swilo swoleswo va tlhela va hanya hi swona, xiyimu xa vona xi bihe ngopfu ku tlula xa ku sungula.+
21 A swi ta yampsa loko a va nga yi tivanga ndlela ya ku lulama, ku tlula ku va va tiva minawu ya ku kwetsima va gama va yi tshika.+
22 Leswi xihlayahlaya xin’wani xa ntiyiso xi nga swi vula swi yendlekile ka vona: “Mbyana yi tlhelele ka mahlanta ya yona, na yona nguluve leyi a yi hlambisiwile yi tlhele yi ya wumbulukela ka madaka.”+
Tinhlamunselu ta le hansi
^ Vona Ntlhamuselo ka ntlawa lowu kokelaka tlhelo.
^ Kumbe: “mahanyelo ya ku nyenyentsa.” Hi Xigriki: “asélgeia.” Vona Ntlhamuselo.
^ Hi Xigriki: “ndlela ya ntiyiso.”
^ Ku nga ku navela ku va ni swa swinyingi ku tlula mpimu.
^ Vona Ntlhamuselo.
^ Kumbe: “mahanyelo ya ku nyenyentsa”. Hi Xigriki: “asélgeia”. Vona Ntlhamuselo.
^ Vona Xiyengetelo A5.
^ Vona Xiyengetelo A5.
^ Ku nga ku navela ku va ni swa swinyingi ku tlula mpimu.
^ Kumbe: “mahanyelo ya ku nyenyentsa”. Hi Xigriki: “asélgeia”. Vona Ntlhamuselo.
^ Kumbe: “lweyi a hluliwaka hi xanchumu, a ta va xikarawa xa nchumu xolexo.”
