Samuwele Wa Wumbirhi 12:1-31
12 Se Yehovha a rhuma Natani+ swaku a ya ka Davhida.+ A fika a ku: “Ka doropa lin’wani a ku ni vavanuna vambirhi, mun’we a a ganyile lweyi mun’wanyani a a li xisiwana.
2 Lweyi wa ku ganya a a ni tinyempfu ni tihomu ta tinyingi;+
3 kambe lweyi wa xisiwana a a ni xinyempfani xin’we xa xisati lexi a nga xi xava.+ A a xi hlayisa naswona a xi kula na xi tshama na yena ni vana va yena va madjaha. A xi dla swakudla swaswitsongo leswi a a li na swona xi tlhela xi nwa ka kopo ya yena naswona a xi yetlela ka xifuva xa yena. A xi fana ni n’wana wa ntombhi ka yena.
4 Siku lin’wani ku fike mupfhumba kaya ka wanuna lweyi wa ku ganya, kambe a nga tekanga nyempfu kumbe homu ka leswi a a li na swona a dlayela mupfhumba wa yena. A ye a ya teka xinyempfani xa wanuna lwiyani wa xisiwana a xi dlayela mupfhumba wa yena.”+
5 Davhida a kwata hintamu hi mhaka ya leswi nga yendliwa hi wanuna lweyi, se a byela Natani a ku: “Na funga hi Yehovha Xikwembu lexi hanyaka+ swaku wanuna lweyi a nga yendla leswi a fanele a dlayiwa!
6 Leswi a nga yendla swilo leswi swa ku biha a fanele a hakela xinyempfani lexi a nga xi dlaya hi 4 wa swinyempfani,+ hikusa a nga mu twelanga wusiwana.”
7 Natani a gama a byela Davhida a ku: “Phela wanuna wa kona hi wena! Yehovha Xikwembu xa Israyele a li: ‘Mina ni ku langile swaku u va hosi ya Israyele,+ ni tlhela ni ku ponisa ka Sawulo.+
8 A ni lava ku ku nyika hinkwaswu swa Sawulo+ ni tlhela ni ku nyika ni vasati va yena+ naswona ni ku veke swaku u va hosi ya Israyele ni ya Yuda.+ Loko leswo swi nga yeneli, a ni lava ku ku nyika swin’wani swa ku tlula leswo.+
9 Hi mhaka muni u ni delelile mina Yehovha hi ku yendla swilo swa ku biha? U dlaye Uriya lweyi wa Muheti hi xipada!+ U mu dlayisile hi xipada xa Vaamoni+ u gama u sala u teka nsati wa yena.+
10 Swoswi swi tivi swaku ndjangu wa wena wu ta tshama hi ku hlaseliwa hi xipada,+ hikusa u ni delelile hi ku teka nsati wa Uriya lweyi wa Muheti u mu yendla nsati wa wena.’
11 Yehovha a hlaya leswi: ‘Ni ta tisa khombo ka ndjangu wa wena;+ ni ta teka vasati va wena na u swi vona ni va nyika wanuna mun’wani,+ se yena a ta famba masangu na vona na vanhu hinkwavu va swi vona!+
12 Hambileswi u nga yendla minchumu leyi na yi nga voniwi hi munhu,+ mina ni ta swi yendla phambheni ka tiko hinkwalu la Israyele, na vanhu hinkwavu va swi vona funtshi na dlambu li voninga!’”
13 Davhida a byela Natani a ku: “Ni djohele Yehovha.”+ Natani a hlamula Davhida a ku: “Yehovha na yena wa ku rivalela.*+ A wu nga ta fa.+
14 Kambe leswi u kalaka u nga mu hloniphanga Yehovha ka mhaka leyi, n’wana lweyi wa ha ku psaliwaka a ta fa.”
15 Kutani Natani a muka.
Yehovha a gama a yendla swaku n’wana lweyi Batixeba na Davhida va nga mu psala, a sungula ku vabya.
16 Davhida a khongela hintamu ka Xikwembu xa ntiyiso hi mhaka ya n’wana lweyi, a titsona swakudla a tlhela a nghena akwartu ka yena a yetlela hansi wusiku hinkwalu.+
17 Madoda lawa a ma tirha ka yindlo ya yena ya wuhosi ma ta ma ta mu baba swaku a pfuka, kambe a nga pfumelanga naswona a a yala ku dla na vona.
18 A n’wana a gama a fa hi siku la wu 7, kambe vatirhi va Davhida a va chava ku mu byela swaku n’wana a file. A va ku: “A nkama n’wana a wa ha hanya hi vulavule na yena, kambe a nga hi yingisanga. Se swoswi hi ta mu byelisa ku yini swaku n’wana a file? Phela loko ho tshuka hi mu byela, a ta yendla swa ku tlula leswi a nga swi yendla.”
19 Nkama Davhida a nga vona vatirhi va yena na va vulavulela hansi, a tekele ku swi vona swaku n’wana a file. Davhida a vutisa vatirhi va yena a ku: “A n’wana a yo fa ke?” Va mu hlamula va ku: “Ina, a file.”
20 Se Davhida a pfuka a hlamba a tlhela a tola mafurha,+ a yambala mpahla yin’wanyani, a ya ka tende+ la Yehovha a fika a khizama a khongela. Nkama a nga gama a muke kaya ka yena a fika a kombela swakudla se va mu nyika a dla.
21 Vatirhi va yena va mu vutisa va ku: “Hi mhaka muni u yendla leswi? A nkama n’wana a wa ha hanya, a wu titsona swakudla u tlhela u tshamela ku rila; kambe nkama n’wana a nga fa u hantle u pfuka u tlhela u dla swakudla.”
22 A va hlamula a ku: “A nkama n’wana a ha hanya a ni titsona swakudla+ ni tlhela ni tshamela ku rila hikusa a ni tibyela ni ku: ‘Swi nga yendleka Yehovha a ni twela wusiwana, a tshika n’wana a hanya.’+
23 Leswi se a nga fa, na ha titsonela yini swakudla? Indjhe ni nga ha swi kota ku mu pfuxa?+ Mina ni ta fa ku fana na yena a nga fa,+ kambe yena a nge vuyi ka mina swoswi.”+
24 Kutani Davhida a tiyisa nsati wa yena Batixeba+ a tlhela a famba masangu na yena. Hi ku famba ka nkama a psala* n’wana wa djaha lweyi va nga mu chula swaku i Solomoni*+ naswona Yehovha a a mu rhandza.+
25 Yehovha a gama a rhuma muprofeta Natani+ swaku a ya mu chula vito la Yedidiya,* hikusa Yena a a mu rhandza.
26 Yowabu a tama a lwa ni doropa la Raba+ ku nga doropa la Vaamoni+ se a teka doropa leli hosi a yi tshama ka lona.+
27 Kutani Yowabu a rhuma vanhu va ya byela Davhida va ku: “Ni hlule doropa la Raba+ naswona ni teke doropa leli nga ni mati.
28 Swoswi hlengeleta masonchwa hinkwawu lawa ma nga sala u ya gwimba matende kusuhi ni doropa leli, u lwa na lona u li teka. Loko u nga yendli leswo, ni ta li teka se ku ta dzunisiwa mina.”*
29 Davhida a hlengeleta masonchwa hinkwawu a ya ka doropa la Raba, a fika a lwa na lona, a li teka.
30 Kutani a teka harhi leyi a yi li ka nhloko ya Malikomo. Harhi leyi a yi hambiwe hi woru yi tlhela yi sasekisiwa hi maribye ya lisima, a yi peza 34 wa makilu;* yi game yi tekiwa yi vekiwa ka nhloko ya Davhida. A tlhela a teka ni minchumu hinkwayu+ leyi a yi li kona ka doropa.+
31 A teka vanhu lava a va li kona ka doropa lolelo, a va tirhisa ka ku saha maribye ni ku tirha hi minchumu leyi nga lotiwa ya nsimbi ni ku tirha hi mabewula ya nsimbi ni ku yendla switini.* Davhida a yendle leswo ka madoropa hinkwawu ya Vaamoni. Hi wugamu, yena ni masonchwa ya yena va tlhelele aYerusalema.
Tinhlamunselu ta le hansi
^ Kumbe: “a ta tima xidjoho xa wena.”
^ Kumbe: “veleka”.
^ Vito leli li huma ka rito la Xiheberu leli vulaka “Ku Rhula”.
^ Leswi vulaka “Lweyi A Rhandziwaka Hi Yehovha”.
^ Hi Xiheberu: “ni ta li chula vito la mina.”
^ Hi Xiheberu: “talenta yin’we.” Vona Xiyengetelo B14.
^ Kumbe: “matijolu.”
