Samuwele Wa Wumbirhi 13:1-39
13 Absalomu n’wana wa Davhida a a ni makwavu wa xisati wa ku saseka, vito la yena a ku li Tamara+ naswona Aminoni+ n’wana mun’wani wa Davhida a a mu rhandza.
2 Aminoni a a karhateka hintamu naswona a a nga gwenti hi makwavu wa yena Tamara, a a mu rhandza hintamu, hikusa a a nge se famba masangu ni wanuna naswona Aminoni a a swi vona swaku a ku nga na nchumu lexi a a ta xi yendla swaku a mu kuma.
3 Aminoni a a ni munghanu, lweyi vito la yena a ku li Yonadabi+ n’wana wa Ximeha+ makwavu wa Davhida; Yonadabi a a tlharihe hintamu.
4 Se a vutisa Aminoni a ku: “Hi mhaka muni wena n’wana wa hosi u tshama na u karhatekile siku ni siku? Ni byeli leswi swi ku karhataka.” Aminoni a mu hlamula a ku: “Ni rhandza Tamara makwavu+ wa Absalomu lweyi na yena a nga makwerhu.”
5 Yonadabi a ku: “Famba u ya yetlela u yendla ingaku wo vabya. Nkama papayi wa wena a nga ta ta swaku a ku pfuxela, mu byeli u ku: ‘Ni kombela u byela Tamara makwerhu, a ta a ta ni swekela swakudla. Loko a ni swekela swakudla leswi swekeliwaka lava vabyaka na ni mu vona, a gama a ni phamela ni ta swi dla.’”
6 Aminoni a yetlela a yendla ingaku o vabya, se hosi yi gama yi ta, yi ta mu pfuxela. Aminoni a byela hosi a ku: “Ni kombela u byela Tamara makwerhu swaku a ta, a ta ni hambela mabolu mambirhi ya ku fana ni mbilu na ni mu vona swaku a ni nyika ni dla.”
7 Kutani Davhida a rhuma munhu a ya kaya ka yena a ya byela Tamara a ku: “Ni kombela u ya kaya ka Aminoni makwenu wa wena, u ya mu swekela swakudla.”
8 Tamara a ya kaya ka makwavu wa yena Aminoni lani a a yetlele kona. A fika a teka trigu, a hamba mabolu na Aminoni a mu vona,
9 a gama a ma teka a mu nyika. Kambe Aminoni a yala ku dla, a ku: “Byela vanhu lava hinkwavu va huma!” Va gama vanhu hinkwavu va huma.
10 Aminoni a byela Tamara a ku: “Ni tiseli swakudla akwartu ni ta dlela kona.” Se Tamara a teka mabolu ya ku fana ni mbilu lawa a nga ma hamba, a ma yisa ka makwavu wa yena Aminoni akwartu lani a a yetlele kona.
11 A nkama a nga tshinela swaku a ta mu nyika swakudla, Aminoni a ku mu katla, a ku: “Yetlela na mina makwerhu.”
12 Kambe Tamara a ku: “Ihim, makwerhu! U nga ni pfinyi; leswo a swi yendliwi lani Israyele.+ U nga yendli nsila ya ku fana ni leyo.+
13 Ni nga hanyisa ku yini ni tingana ta ku tshamisa leswi? Naswona wena va ta ku vona na u li xiphunta lani Israyele. Ni kombela u vulavula ni hosi, a yi nge yali swaku u ni teka.”
14 Kambe a nga mu yingisanga, se a mu khoma hi nkanu, a mu pfinya.
15 Aminoni a gama a sungula ku mu nyenya hintamu, a mu nyenya ku tlula leswi a a mu rhandzisa swona. Kutani a ku: “Pfuka u famba!”
16 Tamara a mu hlamula a ku: “Ihim, makwerhu, a ku ni hlongola swi bihe hintamu ku tlula leswi u nga ni yendla swona!” Kambe Aminoni a nga mu yingisanga.
17 Kutani a vitana djaha leli a li li mutirhi wa yena a ku: “Ni kombela u susa munhu lweyi phambheni ka mina, u tlhela u khiya xipfalu loko se a fambile.”
18 (Tamara a a yambale mpahla ya lisima, leyi a yi yambaliwa hi vana va hosi lava kalaka va nge se tshama va famba masangu.) Se djaha leliyani li mu humesa handle li gama li khiya xipfalu.
19 Tamara a gama a tichela nkuma ka nhloko,+ a handzula mpahla ya yena ya ku saseka leyi a a yi yambalile; a gama a rhwala mavoko ka nhloko a famba na a rila.
20 A nkama makwavu wa yena Absalomu+ a nga mu vona a mu vutisa a ku: “I makwenu wa wena Aminoni a nga ku yendla leswi? Miyela Tamara, phela lwiya i makwerhu.+ U nga karhateki hi mhaka leyi.” Kutani Tamara a ya tshama yexe akaya ka Absalomu makwavu wa yena.
21 A nkama Hosi Davhida a nga twa leswi nga yendleka, a kwata hintamu.+ Kambe a a nga lavi ku kwatisa n’wana wa yena Aminoni, hikusa a a mu rhandza hi mhaka ya leswi a a li n’wana wa yena wa ku sungula.
22 Absalomu a nga mu byelanga nchumu Aminoni, hambi swaswinene kumbe swa ku biha; hikusa Absalomu a a mu nyenya+ Aminoni hi mhaka ya leswi a nga pfinya Tamara makwavu wa yena.+
23 Nkama ku nga hundza malembe mambirhi, lava a va tsemeta tinyempfu ta Absalomu a va li Bali-Azori akusuhi ni Efrayimi,+ se Absalomu a rhamba vana hinkwavu va hosi swaku va ya ka fexta.+
24 Absalomu a ya ka hosi a fika a ku: “Mina mutirhi wa wena ni le ku tsemetiseni ka mavoya ya tinyempfu! Ni kombela swaku wena hosi ni vatirhi va wena mi famba na mina.”
25 Kambe hosi yi hlamula Absalomu yi ku: “Ihim, n’wananga! Loko ho ta hinkwerhu hi ta ku tikisela hintamu.” Hambileswi Absalomu a a tama a mu sindzisa, Davhida a nga pfumelanga ku famba na yena, kambe a mu katekisile.
26 Absalomu a byela hosi a ku: “Leswi wena u ta kalaka u nga swi koti, ni kombela u tshika Aminoni makwerhu a famba na hina.”+ Kutani hosi yi ku: “Hi mhaka muni u lava ku famba na yena?”
27 Kambe Absalomu a yi sindzisa, se yi tshika Aminoni ni vana va yona hinkwavu va famba na yena.
28 Absalomu a byela vatirhi va yena, a ku: “Tshamani na mi pfule matihlo; a nkama Aminoni a nga ta tsaka hi ku phuza vhinyu, ni ta mi byela ni ku: ‘Tlhavani Aminoni!’ Mi fanele mi mu dlaya. Mi nga chavi. Hi mina ni mi byelaka swaku mi mu dlaya. Tiyani mi nga chavi nchumu.”
29 Kutani vatirhi va Absalomu va dlaya Aminoni hi ku ya hi leswi Absalomu a nga va byela swona; vana lavan’wani hinkwavu va hosi va teka timbongolo* ta vona va baleka.
30 A nkama na va ha li ndleleni, Davhida a byeliwa swaku Absalomu a dlaye vana va yena hinkwavu, ni wa mun’we a nga salanga.
31 A nkama hosi yi nga twa leswo yi sekeleka yi nyima, yi handzula mpahla ya yona yi tlhela yi yetlela hansi, naswona ni vatirhi va yona hinkwavu lava a va nyime kolanu na vona va handzula mpahla ya vona.
32 Kambe Yonadabi+ n’wana wa Ximeha,+ makwavu wa Davhida, a ku: “Hosi ya mina u nga tshuki u pimisa swaku ku dlayiwe vana va wena hinkwavu, hikusa lweyi a nga dlayiwa i Aminoni ntsena.+ I Absalomu a nga va rhuma swaku va mu dlaya; a a lava ku yendla leswi+ ku sukela siku leli Aminoni a nga pfinya Tamara+ makwavu+ wa yena.
33 Kutani wena hosi u nga kholwi leswi vanhu va swi hlayaka loko va ku: ‘Vana hinkwavu va hosi va file’; i Aminoni ntsena a nga fa.”
34 Hi nkama wolowo, Absalomu a balekile.+ Se hi ku famba ka nkama, lweyi a a vonelela doropa a vona vanhu va vanyingi na va ta hi ndlela leyi a yi li ndzhaku ka yena leyi a yi li kusuhi ni ntshava.
35 A nkama Yonadabi+ a nga vona leswo, a byela hosi a ku: “Hi lava vana va wena hosi va vuyile, hi ku ya hi leswi ni nga ku byela swona.”
36 A nkama a nga gama ku vulavula, vana va hosi va nghena na va rila hintamu; a hosi ni vatirhi va yona na vona va rila hintamu.
37 Kambe Absalomu a baleke a ya ka Talmayi+ n’wana wa Amiyudi hosi ya Jesuri. Davhida a rile n’wana wa yena masiku ya manyingi.
38 A nkama Absalomu a nga baleka a ya Jesuri+ a tshame kohala malembe manharhu.
39 Hi wugamu Hosi Davhida a navela ku ya vona Absalomu, hikusa mbilu ya yena a yi rhulile ka ku vava loku a a ku twa hi mhaka ya ku fa ka Aminoni.
Tinhlamunselu ta le hansi
^ Kumbe: “mamula”. Ku nga vana va mbongolo ni kavhalu.
