Samuwele Wa Wumbirhi 15:1-37
15 Loko leswo hinkwaswu se swi yendlekile, Absalomu a tilavela nyolo* ni makavhalu ni 50 wa vavanuna lava a va ta tsutsuma phambheni ka yena.+
2 Absalomu a a rhandza ku pfuka nimpundzu a ya nyima tlhelweni ka ndlela leyi yaka ka nyanghwa wa doropa.+ Loko ku ta munhu lweyi a a ni mhaka leyi a yi lava ku thethiwa hi hosi,+ Absalomu a a mu vitana a fika a mu vutisa a ku: “U ta hi ka doropa lini?” Se yena a a mu hlamula a ku: “Mina mutirhi wa wena ni ta hi ka lin’we la tinxaka ta Israyele.”
3 Kutani Absalomu a a mu byela a ku: “Mhaka ya wena ya twala, kambe a ku na munhu wa le wuhosini lweyi a nga ta ku yingisela.”
4 Absalomu a a ku: “Loko a ni yo vekiwa swaku ni va muyavanyisi atikweni! Phela munhu mun’wani ni mun’wani lweyi a nga ni mhaka leyi lavaka ku thethiwa, a a ta ta ka mina, naswona mina a ni ta yi thetha kahle mhaka ya yena.”
5 Se loko ku ta munhu a fika a mu khizamela, Absalomu a a mu khoma hi voko a tlhela a mu bejara.*+
6 Absalomu a a yendla swoleswo ka Vayisrayele hinkwavu lava a va ta va ta byela hosi timhaka swaku ti ta yavanyisiwa; hi ku yendla leswo Absalomu a a yendla swaku Vayisrayele va mu rhandza.*+
7 Loko se ku hundze 4 wa malembe,* Absalomu a byela hosi a ku: “Ni kombela u ni tshika ni ya Hebroni+ ni ya yendla leswi ni nga tshembisa Yehovha,
8 hikusa mina mutirhi wa wena ni fungile+ nkama a na ha tshama Jesuri+ aSiriya, ni ku: ‘Loko Yehovha o ni yendla ni tlhela ni ya Yerusalema, ni ta mu yendlela gandzelo Yehovha.’”
9 A hosi yi mu byela yi ku: “Famba hi ku rhula.” A gama a famba a ya Hebroni.
10 Se Absalomu a rhuma vanhu ka tinxaka hinkwatu ta Israyele, va ya va byela va ku: “Loko mi twa limhondzo na li chayiwa vhelani mi huwelela mi ku: ‘Absalomu i hosi aHebroni!’”+
11 A ku ni 200 wa vavanuna lava a va ta hi Yerusalema lava nga famba na Absalomu; a va yo rhambiwa naswona va fambe na va nga tivi nchumu, a va nga swi tivi swaku ku yendleka yini.
12 Kutani a nkama a a yendla magandzelo, Absalomu a vitane Ayitofeli+ wa le Jilo, lweyi a a li mutsundzuxi wa Davhida;+ Ayitofeli a a tshama ka doropa lolelo.+ A mhaka ya ku yendla swaku Absalomu a va hosi a yi ya yi tiya naswona lava a va nyima na yena a va ya va tala.+
13 Hi ku famba ka nkama munhu mun’wani a ya ka Davhida a fika a ku: “Vavanuna va Israyele va nyima na Absalomu.”
14 Davhida a vhela a byela vatirhi va yena hinkwavu lava a va li na yena aYerusalema, a ku: “A hi fambeni, a hi balekeni+ hikusa a hi nga ta pona ka Absalomu! Hantlisani, hikusa a nga tshuka a hi kuma, se a hi dlaya a tlhela a helisa doropa hi xipada!”+
15 Vatirhi va hosi va yi byela va ku: “Hi ta yendla hinkwaswu leswi wena hosi u swi lavaka.”+
16 Hosi yi gama yi famba ni ndjangu wa yona hinkwawu, kambe yi siya 10 wa vasati va yona vavatsongo *+ swaku va hlayisa munti.*
17 Yi fambe ni vanhu hinkwavu lava a va li na yona, va fika va humula aBeti-Meraki.
18 Vanhu hinkwavu lava a va famba na Davhida va hundza phambheni ka yena na a va kambela.+ Ka vona a ku ni Vagwardu* va yena ni Vagati,+ ku nga 600 wa vavanuna lava a va ta hi Gati.+
19 Se hosi yi byela Itayi+ lweyi a a ta hi Gati yi ku: “A swi bohi swaku u famba na hina. Tlhela u ya tshama ni hosi ya nyuwani hikusa u ta hi ka tiko lin’wani, naswona u yo baleka ka tiko la wena.
20 Phela wa ha ku fika, a swi bohi swaku u famba u rhendzelekela na hina. Tlhela ni vamakwenu va wena naswona Yehovha a a ve ni timpsalu a tlhela a tshembeka ka wena!”+
21 Kambe Itayi a hlamula hosi a ku: “Na funga aphambheni ka Yehovha Xikwembu lexi hanyaka ni ka wena hosi ya mina, swaku hambiloko swo lava ni fa kumbe ni hanya, lani wena hosi ya mina u nga ta va kona, na mina ni ta va kolanu!”+
22 Nkama Davhida a nga twa leswo a byela Itayi+ a ku: “Famba u tsemakanya nkova.” Se Itayi wa le Gati a tsemakanya nkova ni vana va yena ni vanhu va yena hinkwavu.
23 Vanhu hinkwavu va Yerusalema a va rila loko va vona vanhu lava a va na Davhida va tsemakanya nkova; hosi a yi yo nyima ka Nkova wa Kedroni;+ kutani vanhu hinkwavu a va tsemakanya va famba hi ndlela leyi yaka mananga.
24 Zadoki+ na yena a a li kona kolanu ku patsa ni Valevhi+ hinkwavu lava a va tlakule areka+ ya ntwananu ya Xikwembu xa ntiyiso;+ se va veka Areka ya Xikwembu xa ntiyiso ahansi; Abiyatari+ na yena a a li kona nkama vanhu hinkwavu va nga suka hi ka doropa va tsemakanya nkova.
25 Hosi yi byela Zadoki yi ku: “Tlhelisa Areka ya Xikwembu xa ntiyiso adoropeni.+ Loko Yehovha a ni tsakela a ta yendla swaku ni tlhela ni vuya ni ta yi vona, ni ku vona lani yi tshamaka kona.+
26 Kambe loko a ku: ‘A wu ni tsakisi,’ a a ni yendli leswi yena a vonaka swi li kahle.”
27 Hosi yi vutisa muprista Zadoki yi ku: “A hi wena u kotaka ku vona minchumu ya ku hlamalisa hi ndlela ya singita?*+ Tlhela hi ku rhula u ya ka doropa, u famba na Ayimazi n’wana wa wena. Abiyatari na yena a a tlheli na Yonatani+ n’wana wa yena.
28 Kutani mina ni ta famba ni ya tshama ka tindhawu leti ku tsemakanyiwaka hi ka tona amananga, anze mi rhuma munhu a ta ni byela swaku ku yendleka yini.”+
29 Se Zadoki na Abiyatari va teka Areka ya Xikwembu xa ntiyiso va yi tlhelisa Yerusalema, na vona va fika va tshama kohala.
30 Davhida a a famba na a rila nkama a a khupuka Ntshava ya Mawolivhera;+ a a timbhonye nhloko naswona a a nga yambalanga nchumu ka minenge. Vanhu hinkwavu lava a va li na yena na vona a va timbhonye tinhloko naswona a va famba na va rila.
31 Se Davhida a byeliwa leswi: “Ayitofeli i mun’we wa lava lavaka ku yendla swaku Absalomu a va hosi.”+ Davhida a ku: “Yehovha,+ ni kombela swaku leswi Ayitofeli a nga ta swi hlaya swi voniwa swi li swa wuphunta!”+
32 Nkama Davhida a nga fika henhla ka ntshava lomu vanhu a va gandzela kona Xikwembu, a kume Huxayi+ wa Muariki+ na a mu nyimelile, mpahla ya yena a yi davukelile naswona a a ni wuthulu ka nhloko.
33 Kutani Davhida a mu byela a ku: “Swi ta ni tikela ku famba na wena.
34 Kambe loko wo tlhela u ya ka doropa u fika u byela Absalomu u ku: ‘Ni mutirhi wa wena, Hosi ya mina. A ni li mutirhi wa papayi wa wena, kambe swoswi se ni mutirhi wa wena;’+ wena a wu ta ni pfuna hi ku yendla swaku leswi Ayitofeli a nga ta swi hlaya swi nga tirhi.+
35 Muprista Zadoki na muprista Abiyatari va ta va na wena koseniya. Hinkwaswu leswi u nga ta swi twa na swi ta hi kaya ka hosi va byeli.+
36 Ku na Ayimazi+ n’wana wa Zadoki na Yonatani+ n’wana wa Abiyatari, se hinkwaswu leswi u nga ta swi twa u nga va rhuma swaku va ta ni byela.”
37 Huxayi munghanu wa Davhida+ a gama a nghena ka doropa a tlhangana na Absalomu lweyi na yena a a nghena ka doropa la Yerusalema.
Tinhlamunselu ta le hansi
^ Kumbe: “n’qolo; kalichi”.
^ Kumbe: “n’quta; nyunta.”
^ Kumbe: “a yiva timbilu ta Vayisrayele.”
^ Kumbexana: “40 wa malembe”.
^ Vona Ntlhamuselo.
^ Kumbe: “yindlo ya wuhosi.”
^ Hi Xiheberu: “Vapeleti ni Vakereti”.
^ Hi Xiheberu: “muvoni wa swivono.”
