Samuwele Wa Wumbirhi 16:1-23
16 Nkama Davhida a nga hundzanyana henhla ka ntshava,+ Ziba+ mutirhi wa Mefiboxeti+ a a mu nyimelile kolanu; a a li ni timbongolo timbirhi na ti rhwale 200 wa mapawu, 100 wa mabolu lama nga hambiwa hi mawuvha ya ku womisiwa, ni 100 wa mabolu lama nga hambiwa hi makuwa* ni mihandzu ya mintxindzu* ni khuwani lalikulu la vhinyu.+
2 Se hosi yi vutisa Ziba yi ku: “Hi mhaka muni u te ni minchumu leyi?” Ziba a yi hlamula a ku: “Timbongolo leti ni ti nyika ndjangu wa wena hosi swaku wu ta famba hi tona, mapawu ni mihandzu ni swi nyika madjaha swaku ma ta dla, kasi a vhinyu ku ta phuza lava nga ta karhala amananga.”+
3 Hosi yi mu vutisa yi ku: “A kwini Mefiboxeti ntukulu wa Sawulo?”+ Ziba a yi hlamula a ku: “A sale Yerusalema, hikusa a te: ‘Namuntlha Vayisrayele va ta ni tlhelisela wuhosi la vhovho wa mina.’”+
4 Hosi yi byela Ziba yi ku: “Hinkwaswu leswi nga swa Mefiboxeti swi teki swi va swa wena.”+ Ziba a yi hlamula a ku: “Na khizama phambheni ka wena. Tama u va ni timpsalu ka mina, wena hosi.”+
5 Nkama Hosi Davhida a nga fika aBayurimi, wanuna mun’wani wa ndjangu wa ka Sawulo lweyi vito la yena ku nga Ximeyi,+ n’wana wa Gera, a huma a tshinelela Davhida na a mu rhuketela.+
6 A a djikidjela Davhida hi maribye ni vatirhi va yena hinkwavu, ni vanhu hinkwavu ku patsa ni masonchwa ya matimba lawa a ma famba matlhelweni ka Davhida ka tlhelo la xinene ni la ximatsi.
7 Ximeyi a a mu rhuketela a ku: “Famba, famba, mudlayi ndziwena, munhu wa ku kala a nga li wa nchumu!
8 Yehovha wa ku khatisa hi mhaka ya nandzu wa ngati wa ndjangu wa Sawulo, lweyi u nga mu tekela wuhosi kambe swoswi Yehovha a teke wuhosi a li nyika Absalomu n’wana wa wena. Se swoswi u kumana ni khombo leli hikusa u mudlayi!”+
9 Kutani Abixayi n’wana wa Zeruya+ a byela hosi a ku: “Hi mhaka muni mbyana leyi ya ku fa+ yi ku rhuketela wena hosi ya mina?+ Ni kombela u ni tshika ni ya yi tsema nhloko.”+
10 Kambe hosi yi ku: “Mi nghena kwini ka mhaka leyi n’wina vana va Zeruya?+ Mu tshikeni a ni rhuketela+ hikusa Yehovha a mu byele a ku:+ ‘Rhuketela Davhida!’ Se i mani lweyi a nga ni mfanelo ya ku mu vutisa a ku: ‘Hi mhaka muni u yendla leswi?’”
11 Kutani Davhida a byela Abixayi ni vatirhi va yena hinkwavu a ku: “Hambi hi n’wana lweyi ni ngo yo mu psala a lava ku ni dlaya,+ se munhu wa ka Benjamini+ a nga tsandzeka hi yini ku ni dlaya? Mu tshikeni a ni rhuketela, hikusa a byeliwe hi Yehovha!
12 Swi nga yendleka Yehovha a vona ku hlupheka ka mina,+ a gama yena Yehovha a ni katekisa ku hambana ni leswi ni nga rhuketelisiwa swona namuntlha.”+
13 Kutani Davhida ni vanhu va yena va tifambela, kambe Ximeyi a a famba hi le tlhelweni ka ntshava, a landzelela Davhida na a mu rhuketela,+ a mu djikidjela hi maribye a tlhela a mu chela hi wuthulu.
14 Loko se va fambe mpfhukanyana, a hosi ni vanhu hinkwavu lava a va li na yona va fika lomu a va ya kona na va karhalile, se va humula.
15 Hi nkama wolowo, Absalomu ni vavanuna hinkwavu va Israyele lava a va nyima na yena va fika Yerusalema naswona Ayitofeli+ na yena a a li kona.
16 A nkama Huxayi+ wa Muariki,+ munghanu wa Davhida a nga fika ka Absalomu, a fike a ku: “Hosi, hanya hi masiku!+ Hosi, hanya hi masiku!”
17 Se Absalomu a vutisa Huxayi a ku: “Eehh se wo djikela munghanu wa wena? Hi mhaka muni u nga fambanga na yena?”
18 Huxayi a hlamula Absalomu a ku: “Ihim, mina ni nyima ni lweyi a nga langiwa hi Yehovha, ni lweyi a nga langiwa hi vanhu lava ni vavanuna hinkwavu va Israyele. Naswona hi yena ni nga ta tshama na yena.
19 Kasi ni fanele ni tirhela mani loko ku nga li n’wana wa hosi? Ni ta ku tirhela ku fana ni leswi ni nga mu tirhelisa swona papayi wa wena.”+
20 Absalomu a vutisa Ayitofeli a ku: “U swi vonisa ku yini,+ hi fanele hi yendla yini?”
21 Ayitofeli a byela Absalomu a ku: “Famba masangu ni vasati vavatsongo* va papayi wa wena,+ lava a nga va siya swaku va hlayisa munti wa wuhosi.+ Vayisrayele hinkwavu va ta swi twa swaku u tiyendle nala wamukulu wa papayi wa wena, se lava nyimaka na wena va ta tiya nhlana.”
22 Kutani va gwimba tende ka vharanda leli nga henhla ka yindlo+ va gwimbela Absalomu, a gama a famba masangu ni vasati vavatsongo va papayi wa yena,+ na swi voniwa hi Vayisrayele hinkwavu.+
23 Ka masiku wolawo leswi a swi hlayiwa hi Ayitofeli+ a va swi vona swi fana ni rito la Xikwembu xa ntiyiso. Davhida na Absalomu na vona a va swi vona swi li swa lisima leswi a swi hlayiwa hi Ayitofeli.
Tinhlamunselu ta le hansi
^ Kumbe: “mapalmera”.
^ Kumbe: “mihandzu leyi kumekaka hi nkama wa ku hisa”.
^ Vona Ntlhamuselo.
