Samuwele Wa Wumbirhi 17:1-29
17 Se Ayitofeli a byela Absalomu a ku: “Ni kombela ku langa 12.000 wa vavanuna swaku ni ta hlongolisa Davhida wusiku la namuntlha.
2 Ni ta mu kuma na a karhalile naswona na a nga na ntamu,+ ni gama ni mu chavisa; kutani vanhu hinkwavu lava nga na yena va ta baleka, ni gama ni dlaya yena ntsena.+
3 Ni ta ya teka vanhu hinkwavu va vuya ka wena. Loko munhu lweyi u mu lavetelaka se a file, vanhu hinkwavu va ta tlhelela ka wena naswona ku ta va ni ku rhula.”
4 Mhaka leyi yi tsakise Absalomu ni madoda hinkwawu ya Israyele.
5 Absalomu a ku: “Ni kombela mi ni vitanela Huxayi+ wa Muariki, hi ta twa swaku yena a li yini.”
6 Se Huxayi a ya ka Absalomu. Absalomu a fika a ku: “Ayitofeli a hi byele leswi. U li yini hi swona? Loko u nga pfumelelani na swona hi byeli swaku hi fanele hi yendla yini.”
7 Nkama a nga twa leswo Huxayi a byela Absalomu a ku: “Leswi Ayitofeli a nga swi hlaya a swi kahle!”+
8 Huxayi a tlhela a ku: “U swi tiva kahle swaku papayi wa wena ni masonchwa ya yena va ni matimba+ naswona va karhata ku fana ni ursu* leyi nga lahlekeliwa hi vana va yona anhoveni.+ Naswona papayi wa wena i sonchwa la matimba,+ a nge yetleli lani vanhu van’wani va nga ta yetlela kona.
9 Ni swoswi a tumbelile ka mimhakwa* leyi nga ka tintshava kumbe ka tindhawu tin’wani;+ loko o sungula a hi hlasela, lava nga ta swi twa va ta ku: ‘Lava nyimaka na Absalomu va hluliwile!’
10 Hambi wanuna lweyi a kalaka a nga chavi nchumu ku fana ni nghonyama a ta chava,+ hikusa tiko hinkwalu la Israyele la swi tiva swaku papayi wa wena a ni matimba+ ni swaku masonchwa lawa a nga na wona i tinhenha.
11 Leswi mina ni ku byelaka swona hi leswi: Vayisrayele hinkwavu a va tlhangani va ta ka wena ku sukela aDani anze Berxeba,+ va tala ku fana ni misava ya lwandle;+ se u fanele u va rhangela swaku va ya nyimpini.
12 Hi ta lwa na yena kun’wani ni kun’wani lomu hi nga ta mu kuma kona, naswona hi ta lwa na yena na hi li vanyingi ku fana ni mberha* loko yi na misaveni; a nga kona ni mun’we ka vona lweyi a nga ta pona, hambi ku li yena kumbe masonchwa ya yena.
13 Loko a baleka a ya tumbela ka doropa, tiko hinkwalu la Israyele li ta famba ni magoda ka doropa lolelo. Hi ta fika hi kokelela mimuru anze ka nkova ni xiribyani ni xa xin’we a hi nga ta xi siya.”
14 Se Absalomu ni vavanuna hinkwavu va Israyele va ku: “Leswi nga hlayiwa hi Huxayi wa Muariki swa yampsa+ ku tlula leswi nga hlayiwa hi Ayitofeli!” Phela Yehovha a a lava swaku leswi nga hlayiwa hi Ayitofeli+ swi nga tirhisiwi, hambileswi a swi twala. Yehovha a yendle leswo swaku a ta khatisa Absalomu.+
15 Huxayi a gama a ya byela muprista Zadoki na muprista Abiyatari+ a ku: “Leswi hi leswi Ayitofeli a nga byela Absalomu ni madoda ya Israyele kambe mina ni va byele leswi.
16 Swoswi kahlulani mi rhuma vanhu va ya byela Davhida va ku: ‘Wusiku la namuntlha u nga tshami ka tindhawu leti ku tsemakanyiwaka hi ka tona amananga kambe tsemakanya Nambu wa Yordani; loko u nga yendli leswo, wena ni vanhu hinkwavu lava u nga na vona mi ta dlayiwa.’”*+
17 Yonatani+ na Ayimazi+ a va tshama Eni-Rojeli,+ se mutirhi mun’wani wa xisati a ya va byela hinkwaswu, va gama va famba va ya byela Davhida hikusa a va nga swi lavi ku nghena ka doropa la Yerusalema swaku va voniwa hi vanhu.
18 Kambe djaha lin’wani li va vonile li gama li ya byela Absalomu. Va baleka hi ku hantlisa va ya Bayurimi+ akaya ka wanuna mun’wani lweyi a a ni xihlovo, va fika va tumbela ndzeni ka xihlovo.
19 Se nsati wa wanuna yelweyo a teka nchumu a mbhonya xihlovo, a gama a yaneka trigu ahenhla ka xona; a nga kona lweyi a nga tiva mhaka leyi.
20 Vatirhi va Absalomu va fika kaya ka wansati lweyi va mu vutisa va ku: “Ayimazi na Yonatani va kwini?” Wansati a va hlamula a ku: “Va hundze hi kola va famba ingaku va ya hala ka nambu.”+ Se va va lavetela kambe a va va kumanga, va gama va tlhela va ya Yerusalema.
21 A nkama vatirhi va Absalomu va nga famba, Ayimazi na Yonatani va sale va huma ka xihlovo va ya ka Hosi Davhida. Va fike va mu byela va ku: “Suka hi ku hantlisa u tlulela nambu, va gama va mu byela leswi Ayitofeli a nga swi hlaya.”+
22 Kutani Hosi Davhida ni vanhu lava a a li na vona va hantlisa va tlulela Nambu wa Yordani. A nkama li nga xa, hinkwavu se a va tlulelile.
23 Loko Ayitofeli a vona swaku leswi a nga swi hlaya a swi tirhisiwanga, a teka mbongolo a famba hi yona akaya ka yena ka doropa leli a nga psaliwa ka lona.+ A fika a byela ndjangu wa yena leswi wu faneleke wu swi yendla,+ a gama a tisunga.+ A fise swoleswo a gama a lahliwa lomu vavhovho va yena va nga lahliwa kona.
24 Hi nkama wolowo, Davhida a ya aMahanayimi,+ kasi Absalomu a a tlulela Nambu wa Yordani ni vavanuna hinkwavu va Israyele lava a va nyima na yena.
25 Absalomu a veka Amasa+ swaku a va murhangeli wa masonchwa a pfaleta Yowabu;+ Amasa a a li n’wana wa Itira wa Muyisrayele na Abigayili+ n’wana wa Nahaxi, makwavu wa xisati wa Zeruya, mamani wa Yowabu.
26 Se Absalomu ni Vayisrayele va fika va gwimba matende ka tiko la Jiliyadi.+
27 Nkama Davhida a nga fika aMahanayimi, Xobi n’wana wa Nahaxi wa le Raba+ lweyi a a tshama ka tiko la Vaamoni, na Makiri+ n’wana wa Amiyeli lweyi a a tshama Lo-Debari na Barzilayi+ wa Mujiliyadi lweyi a a li wa Rojelimi
28 va mu tisela masangu, mabaziya, swibya swa vumba, trigu, maxalani,* mpupu, mbhacha, tifijawu, timbaweni,
29 wulombe, mantega, tinyempfu ni keju.* Va tise minchumu hinkwayu leyi swaku va ta yi nyika Davhida ni vanhu lava a va li na yena swaku va ta dla,+ hikusa va te: “Vanhu lava nga mananga va twa ndlala ni torha naswona va karhalile.”+
Tinhlamunselu ta le hansi
^ Kumbe: “bere”.
^ Ku nga mbhovo lowu kumekaka ka ntshava kumbe ka ribye.
^ Kumbe: “mub’etho”.
^ Hi Xiheberu: “mintiwa.”
^ Kumbe: “sevhada”.
^ Ku nga keju la ku hambiwa hi leiti la tihomu.
